Sa Unsang Paagi Atong Matabangan ang mga Manambong sa Memoryal?
1. Unsang dakong pamatuod ang ihatag sa Marso 22, 2008?
1 Sa Marso 22, 2008, makadawat ang milyonmilyong tawo sa tibuok kalibotan ug dakong pamatuod. Ang mga manambong sa Memoryal makadungog bahin sa dakong gugma ni Jehova pinaagi sa pagtaganag lukat alang sa katawhan. (Juan 3:16) Sila makakat-on bahin sa Gingharian ug kon sa unsang paagi gamiton kini ni Jehova sa pagpalampos sa iyang katuyoan sa tibuok yuta. (Mat. 6:9, 10) Ila mismong makita ang gugma ug panaghiusa sa katawhan sa Diyos ug masinati ang atong pagkamaabiabihon.—Sal. 133:1.
2. Sa unsang paagi atong matabangan ang mga estudyante sa Bibliya nga manambong sa Memoryal?
2 Mga Estudyante sa Bibliya: Ang pipila sa mga manambong mao kadtong bag-o pa lang gitun-an sa Bibliya. Ipailaila sila sa mga igsoon. Sultihi sila bahin sa senemanang mga tigom, ug isuroy sila kadiyot sa Kingdom Hall. Panahon sa pakigpulong, ang mamumulong magdasig kanila nga mopadayon sa paghimog espirituwal nga pag-uswag. Inyong magamit ang iyang mga komento aron sa pagdasig sa inyong mga ginatun-an.
3. Sa unsang paagi atong madasig ang di-aktibong mga magmamantala nga manambong?
3 Di-Aktibo: Ang uban sa mga manambong maoy di-aktibong mga magmamantala. Paningkamoti nga maabiabi sila pag-ayo. Likayi ang pagsuknag personal nga mga pangutana o mga pulong nga makapaulaw. Pagkahuman sa Memoryal, kinahanglang duawon sa mga ansiyano ang mga di-aktibo nga nanambong, dayegon sila sa ilang mga paningkamot, ug mainiton silang dapiton sa sunod nga tigom sa kongregasyon.
4. Sa unsang paagi ang matag usa kanato makatabang sa mga bisita?
4 Mga Bisita: Ang uban niadtong manambong lagmit atong mga kaila o mga membro sa pamilya kinsa personal natong gidapit. Ang uban mahimong nakadawat ug imbitasyon panahon sa espesyal nga kampanya. Kon may nakita ka nga dili nimo kaila, paningkamoti nga ipailaila ang imong kaugalingon ug abiabiha sila. Tingali wala pa sila makatambong sa atong mga tigom sukad. Sa inyong pag-estoryahay lagmit imong mahibaloan kon unsaon sila pagkontak. Pinaagi sa personal nga pagduaw o daklit nga pagtawag sa telepono pipila ka adlaw human sa Memoryal, mahimo nimong ugmaron ang dugang interes ug tanyagan silag pagtuon sa Bibliya.
5. Unsay mahimo natong isulti aron makasugod ug pagtuon sa Bibliya?
5 Ang impormasyon sa pakigpulong sa Memoryal mahimong gamiton aron itanyag ang librong Gitudlo sa Bibliya sa pagbalikduaw. Pananglitan, basahon sa mamumulong ang Isaias 65:21-23. Sa imong pagbalikduaw, mahimo nimong hisgotan ang pakigpulong ug moingon, “Akong ipakita nimo ang laing mga panalangin nga mahimong posible tungod sa lukat.” Dayon hisgoti ang panid 4-5 sa librong Gitudlo sa Bibliya. O makaingon ka, “Daghan ang naghunahuna kon kanus-a nato masinati ang katumanan sa tagna ni Isaias.” Dayon hisgoti ang parapo 1-3 sa kapitulo 9. Ang laing paagi mao ang paghisgot sa komento sa mamumulong sa Memoryal, pagtanyag sa librong Gitudlo sa Bibliya, ug pagpasundayag sa pagtuon.
6. Unsang mga kahigayonan ang atong nabatonan samtang atong tumanon ang sugo ni Jesus sa paghandom sa iyang kamatayon?
6 Hinaot ang matag usa kanato magmaalisto sa mga kahigayonan nga tabangan ang mga estudyante sa Bibliya, di-aktibong mga magmamantala, ug mga bisita nga manambong. (Luc. 22:19) Si Jehova tinong magapanalangin sa mga pag-uswag sa kalihokan sa atong pag-alagad sa Gingharian.