“Ipadayon Ninyo ang Pagbuhat Niini sa Paghandom Kanako”
Ang Kamatayon ni Jesus Handomon sa Abril 2
1. Nganong usa man ka hinungdanong petsa ang Abril 2, 2007?
1 Sa Abril 2, 2007, milyonmilyong katawhan sa tibuok kalibotan ang magtigom aron sa paghandom sa haladnong kamatayon ni Jesus. Si Jesus namatay ingong tigpaluyo sa pagkasoberano sa iyang langitnong Amahan, nga naghatag ug pamatuod nga bakak ang sumbong ni Satanas nga Yawa nga ang mga tawo nag-alagad lamang sa Diyos tungod sa hinakog nga mga motibo. (Job 2:1-5) Ang Panihapon sa Ginoo nagpahinumdom usab kanato nga pinaagi sa iyang kamatayon ingong hingpit, walay-sala nga tawo, si Jesus ‘naghatag sa iyang kalag nga usa ka lukat baylo sa daghan.’ (Mat. 20:28) Busa, si Jesus nagsugo sa iyang mga tinun-an: “Ipadayon ninyo ang pagbuhat niini sa paghandom kanako.” (Luc. 22:19) Ang pagpabili niining talagsaong gasa sa Diyos nagdasig ba kanimo sa pagpangandam na karon alang sa paghandom niining kinalabwang buhat sa gugma?—Juan 3:16.
2. Sa unsang paagi atong maandam ang atong kasingkasing alang sa Memoryal?
2 Andama ang Imong Kasingkasing: Pinaagi sa pagkonsiderar sa mga hitabo sa hinapos nga mga adlaw sa kinabuhi ni Jesus ingong tawo, atong maandam ang atong kasingkasing alang sa pagsaulog sa Memoryal. (Esd. 7:10) Sa pagtabang kanato niining bahina, usa ka eskedyul sa linaing pagbasa sa Bibliya ang makita diha sa Pagsusi sa Kasulatan sa Adlaw-Adlaw—2007 ug sa 2007 Calendar. Kining gieskedyul nga pagbasa halos katumbas sa mga adlaw diin ang mga hitabo nga nalangkit sa kamatayon ni Jesus nahitabo sumala sa kalendaryo nga atong gigamit karon. Ang mga adlaw ug petsa nga gihisgotan diha sa mga asoy sa Bibliya gibase sa Hudiyohanong kalendaryo, nga nag-ihap sa mga adlaw gikan sa pagsalop sa adlaw ngadto sa sunod nga pagsalop sa adlaw. Kining mga paagiha sa pag-ihap sa adlaw gitagad ug gipakita diha sa eskedyul sa pagbasa sa Bibliya sa Memoryal. Ang pagrepaso sa maong impormasyon diha sa pagbasa sa Bibliya ug ang mainampoong pagpamalandong sa dulot nga gugma sa Diyos motabang kanato sa pagpahimulos gayod sa pagsaulog sa Memoryal.
3. Sa unsang paagi atong matabangan ang mga interesado ug mga di-aktibo sa pagpahimulos sa Memoryal?
3 Dapita ang Uban sa Pagtambong: Ang pasukip sa Pebrero nga Atong Ministeryo sa Gingharian nagpahibalo sa usa ka espesyal nga kampanya sa pagdapit sa mga tawo sa pagtambong niining hinungdanong okasyon. Nakahimo ka na bag mga kahikayan aron makapakigbahin sa bug-os niini nga kampanya? Nakahimo ka na bag listahan sa imong mga kaila nga imong dapiton, ug nakasugod ka na ba sa pagkontak kanila? Planoha nga makaabot ug sayo sa gabii sa Memoryal aron imong maabiabi ang imong mga dinapit ug ang uban pang interesadong mga tawo. Tingali buot nimong tuparan sila sa paglingkod, nga magseguro nga aduna silay Bibliya ug songbok. Ipailaila sila sa uban diha sa kongregasyon. Pagkahuman sa programa, paggahin ug panahon sa pagtubag sa ilang mga pangutana. Dapita sila sa pagtambong sa espesyal nga pakigpulong publiko nga ihatag sa Abril 15. Paneguroon gayod sa mga ansiyano nga kadtong nakig-uban na sa kongregasyon apan nahimong di-aktibo makadawat ug imbitasyon sa Memoryal ug sa espesyal nga pakigpulong.
4. Sa unsang paagi atong matabangan ang mga tawo sa paghimog dugang pag-uswag sa espirituwal pagkahuman sa pagsaulog sa Memoryal?
4 Tabangi ang Bag-ohang mga Interesado ug ang mga Di-Aktibo nga Mouswag: Ang mamumulong sa Memoryal magpatin-aw sa mubo sa atong kahikayan sa pagtuon sa Bibliya ug magdasig sa mga bag-ohan sa pagpadayon sa pagkat-on bahin kang Jehova. Mahimo nimong gamiton ang iyang gisulti ingong basehanan sa pagtanyag ug dugang espirituwal nga tabang niadtong imong gidapit. Kon sila wala pa magtuon sa Bibliya sa pagkakaron, paneguroa nga maduaw dayon sila pagkahuman sa Memoryal ug ipasundayag ang libreng pagtuon sa Bibliya. Aron mouswag sila sa espirituwal, sila kinahanglang motambong usab sa mga tigom sa kongregasyon. (Heb. 10:24, 25) Aron makab-ot kini, dasiga sila sa pagtambong nga regular. Kinahanglan hikayon sa mga ansiyano nga maduaw ang di-aktibong mga Kristohanon nga mitambong sa Memoryal ug tabangan sila nga mapabilhan ang mga punto nga gipresentar sa pakigpulong. Kini lagmit makadasig kanila sa pagpakig-uban pag-usab sa kongregasyon.
5. Unsang kaayohan ang atong makuha gikan sa pagsaulog sa Memoryal?
5 Ang pagsaulog sa Memoryal maoy higayon nga kita mamalandong pag-ayo sa nabuhat ni Jehova ug ni Jesus alang kanato. Ang maong pagpamalandong magpalalom sa atong gugma alang kanila ug mag-apektar sa atong panggawi. (2 Cor. 5:14, 15; 1 Juan 4:11) Karon na ang panahon sa pag-andam sa atong kaugalingon ug sa interesadong mga tawo alang niining hinungdanong okasyon diin nianang panahona atong “gimantala ang kamatayon sa Ginoo.”—1 Cor. 11:26.