Tabangi ang Uban sa Pagpahimulos sa Lukat
Ang Memoryal sa Kamatayon ni Kristo Saulogon sa Abril 12
1. Unsa ang usa ka paagi nga ang katawhan sa Diyos magpadayag sa ilang pagkamapasalamaton sa lukat?
1 “Salamat sa Diyos tungod sa iyang dili-mahubit nga walay bayad nga gasa.” (2 Cor. 9:15) Kanang mga pulonga haom nga naghubit kon unsay atong pagbati bahin sa pagkamaayo ug mahigugmaong-kalulot nga gipakita sa Diyos ngadto sa iyang katawhan pinaagi sa iyang Anak, si Jesu-Kristo. Ang maong pagkamapasalamaton ilabinang madayag samtang kita magtigom sa Abril 12 sa pagsaulog sa Memoryal sa kamatayon ni Kristo.
2. Gawas sa mga alagad ni Jehova, kinsa pa ang nagatambong sa saulog sa Memoryal, ug unsay kinahanglan nilang buhaton aron makapahimulos sa lukat?
2 Uban sa mga alagad ni Jehova, mga diyes milyones pa ang nagatambong sa saulog sa Memoryal matag tuig. Sa paghimo niana, ilang gipasundayag ang pagkamapasalamaton sa halad ni Kristo. Hinuon, aron makapahimulos sa lukat, kinahanglang sila magpasundayag ug pagtuo niana. (Juan 3:16, 36) Sa unsang paagi matabangan nato sila sa pag-ugmad sa maong pagtuo? Panahon sa Memoryal, mahimo natong dasigon sila sa pagtuon sa Bibliya ug sa pagtambong sa senemanang mga tigom sa kongregasyon. Tagda ang mosunod nga mga sugyot.
3. Sa unsang paagi masugdan nato ang usa ka pagtuon sa Bibliya uban niadtong atong gidapit sa Memoryal?
3 Mga Pagtuon sa Bibliya: Sa dihang imong dapiton ang mga interesado sa pagtambong sa Memoryal, nganong dili sulayan ang pagsugod ug usa ka pagtuon sa Bibliya uban kanila ginamit ang librong Gitudlo sa Bibliya? Isaysay ngadto sa tawo ang bahin sa saulog sa Memoryal pinaagi sa pag-abli sa mga panid 206-8 ug sa paghisgot sa ulohang “Ang Panihapon sa Ginoo—Usa ka Saulog nga Makapasidungog sa Diyos.” Mahimo nimong hisgotan kanang impormasyona sa usa o duha ka pagduaw, tingali ingong pagtuon sa Bibliya diha sa pultahan. Sa dihang mahuman na ninyo paghisgot kana, lagmit maikag siya sa paghisgot sa kapitulo 5, “Ang Lukat—Ang Labing Maayong Gasa sa Diyos.” Sa dihang maestablisar na ang regular nga pagtuon sa Bibliya, baliki ug hisgoti ang unang upat ka kapitulo sa libro.
4. Kinsay mahimo natong sugdan ug pagtuon sa Bibliya panahon sa Memoryal?
4 Kinsay mahimo natong sugdan ug pagtuon sa Bibliya ginamit kini nga paagi? Tingali ang pipila nimo ka isigkatrabahante, eskolmet, o silingan gustong makighisgot niana. Mahimong duolon sa mga brader ang dili-magtutuong mga bana sa mga sister sa kongregasyon. Ug ayaw kalimti usab ang pagtanyag ug pagtuon sa imong dili-Saksi nga mga paryente. Dugang pa, gusto natong mohimog linaing paningkamot sa pagdapit niadtong kanhi aktibong nakig-uban sa kongregasyon sa pagtambong sa Memoryal. (Luc. 15:3-7) Hinaot maningkamot kita sa pagtabang kanila sa pagpahimulos sa lukat.
5. Sa unsang paagi madasig nato ang mga ginatun-an sa Bibliya ug ang uban pang mga interesado sa pagtambong sa senemanang mga tigom sa kongregasyon?
5 Mga Tigom sa Kongregasyon: Ang Memoryal mao ang unang tigom nga natambongan sa daghang ginatun-an sa Bibliya ug sa uban pang mga interesado. Apan, sa unsang paagi madasig nato sila sa pagpahimulos sa uban pa natong mga tigom sa kongregasyon? Ang Mayo 2005 nga Atong Ministeryo sa Gingharian, panid 1, naghatag niining mosunod nga mga sugyot: “Hisgoti ang ulohan sa sunod nga pakigpulong publiko. Ipakita kanila ang materyal nga pagatun-an panahon sa Pagtuon sa Bantayanang Torre ug sa Pagtuon sa Libro sa Kongregasyon. Isaysay ang Teokratikanhong Tunghaan sa Ministeryo ug ang Tigom sa Pag-alagad. Kon aduna kay asaynment sa tunghaan, mahimo nimong ensayohon kana uban kanila. Ipaambit ang talagsaong mga punto nga gipresentar panahon sa mga tigom. Dapita sila sa pagtambong sukad gayod sa unang pagtuon.”
6. Sa unsang duha ka paagi makatabang kita sa mga matinud-anog-kasingkasing sa pagpahimulos sa lukat?
6 Sa dihang ang mga matinud-anog-kasingkasing regular nang nagtuon sa Bibliya ug nagtambongan na sa mga tigom sa kongregasyon, kasagarang sila kusog nga mouswag sa espirituwal. Busa, hinaot dasigon nato ang uban sa pagpahimulos niining espirituwal nga mga tagana ug sa pagbaton ug kaayohan gikan sa kinalabwang gasa sa Diyos—ang lukat.