Ipakita Nato ang Atong Pagpabili
Ang Memoryal Saulogon sa Abril 17
1. Unsay gipahayag sa salmista nga ilabinang haom sa panahon sa Memoryal?
1 Kay mapasalamaton sa kaluoy ug pagluwas ni Jehova, ang salmista nangutana: “Unsay akong igabayad kang Jehova tungod sa tanan niyang mga kaayohan kanako?” (Sal. 116:12) Ang mga alagad sa Diyos karon mas daghag rason nga magpasalamat. Kasiglohan human masulat kining inspiradong mga pulong, gihatag ni Jehova sa katawhan ang labing bililhong gasa—ang lukat. Samtang mangandam kita sa paghandom sa kamatayon ni Kristo sa Abril 17, angay gayod kitang magmapasalamaton.—Col. 3:15.
2. Unsa ang pipila ka rason kon nganong atong pabilhan ang lukat?
2 Mga Panalangin sa Lukat: Pinaagi sa lukat, kita ‘mapasaylo sa atong mga sala.’ (Col. 1:13, 14) Kini nagpaarang kanato sa pagsimba kang Jehova uban ang hinlong tanlag. (Heb. 9:13, 14) Kita dunay kagawasan sa pagpakigsulti kang Jehova diha sa pag-ampo. (Heb. 4:14-16) Kadtong magpasundayag ug pagtuo sa lukat dunay dakong paglaom nga mabuhing walay kataposan!—Juan 3:16.
3. Sa unsang paagi nato ikapakita ang atong pagpabili kang Jehova tungod sa lukat?
3 Ipakita ang Pagpabili: Usa ka paagi mao ang pagbasa kada adlaw sa mga teksto sa Bibliya nga gieskedyul panahon sa Memoryal ug palandongon kini. Ang artikulong “Andam Ka na ba Alang sa Labing Hinungdanong Adlaw sa Tuig?” sa Pebrero 1, 2011 nga Bantayanang Torre makatabang kanato sa paghimo niini. Diha sa pag-ampo, ikasulti nato kang Jehova ang atong dakong pagpabili sa lukat. (1 Tes. 5:17, 18) Ang pagtambong sa Memoryal agig pagsunod sa sugo ni Jesus nagpakita nga kita mapasalamaton. (1 Cor. 11:24, 25) Dugang pa, atong masundog ang dakong gugma ni Jehova pinaagi sa pagdapit sa labing daghan sa pagtambong.—Isa. 55:1-3.
4. Unsay atong determinasyon?
4 Ang mapabilhong mga alagad ni Jehova dili mag-isip sa Memoryal ingong ordinaryong panagkatigom. Kini ang labing hinungdanong panagkatigom niining tuiga! Samtang nagkaduol ang Memoryal, hinaot nga ang atong determinasyon sama sa salmista kinsa misulat: “Dayega si Jehova, Oh kalag ko, ug ayaw kalimti ang tanan niyang mga buhat.”—Sal. 103:2.