Ipakita ang Pagkamapasalamaton sa Kinalabwang Gasa sa Diyos
1. Nganong magmapasalamaton kita kang Jehova?
1 Sa daghang “maayong gasa” nga gihatag ni Jehova, ang lukat sa iyang minahal nga Anak mao ang kinalabwan. (Sant. 1:17) Daghang panalangin ang matagamtam tungod niini, lakip ang kapasayloan sa atong mga sala. (Efe. 1:7) Magmapasalamaton gayod kita tungod niini. Sa panahon sa Memoryal, palandongon nato kining bililhong gasa.
2. Unsaon nato pagtabang sa atong pamilya ug sa atong kaugalingon aron magmapasalamaton kita sa lukat?
2 Ugmara ang Pagkamapasalamaton: Aron magmapasalamaton ang atong pamilya sa lukat, mas maayong gamiton ang gabii sa Pamilyahanong Pagsimba sa pagrepaso sa impormasyon bahin sa lukat una pa ang Memoryal sa Marso 30. Maayong hisgotan usab ang linaing mga teksto sa Bibliya nga ipabasa panahon sa Memoryal. Pamalandongon nato ang mga kaayohan sa lukat diha kanato ug kon unsay epekto niini sa imong panglantaw kang Jehova, sa imong kaugalingon, sa uban, ug sa umaabot. Praktisa usab ninyo ang duha ka bag-ong awit para sa Memoryal, ang numero 8 ug 109.—Sal. 77:12.
3. Unsaon nato pagpakita nga kita mapasalamaton?
3 Kon Unsaon sa Pagpakita nga Kita Mapasalamaton: Ang atong pagkamapasalamaton sa lukat mopalihok kanato sa pagsulti sa uban bahin kang Jehova ug sa iyang dakong gugma sa pagpadala sa iyang Anak. (Sal. 145:2-7) Sa Marso, Abril, ug Mayo, ikapakita sa ubang pamilya nga sila mapasalamaton pinaagi sa paghikay nga makaoksilyare payunir ang bisan usa ka membro sa pamilya. Kon dili kini mahimo, ikaw ba makagugol ug mas daghang oras sa pagsangyaw? (Efe. 5:16) Kay kita mapasalamaton, tabangan usab nato ang uban sa pagtambong sa Memoryal. (Pin. 22:17) Paghimog listahan sa mga balik-duaw, gitun-an sa Bibliya, mga paryente, kauban sa trabaho, ug mga silingan nga imbitahon, ug pakigbahin sa bug-os sa espesyal nga kampanya sa pagpangimbitar alang sa Memoryal.
4. Sa unsang mga paagi atong mapahimuslan pag-ayo ang panahon sa Memoryal?
4 Panahon sa Memoryal, makahigayon na usab kita sa pagpakita kang Jehova nga kita mapasalamaton gayod sa iyang gasa alang sa katawhan. Hinaot pahimuslan nato kining panahona sa pagpakita nga kita mapasalamaton sa lukat ug sa tanang “dili-matugkad nga bahandi ni Kristo.”—Efe. 3:8.