Abiabiha Sila!
1. Unsa ang labing maayong higayon nga kita makahatag ug pamatuod, ug ngano?
1 Ang tinuig nga pagsaulog sa Memoryal usa gayod ka maayong higayon nga ikaw makahatag ug pamatuod. Tagda kini: Karong tuiga, kapig napulo ka milyong bisita ang gidahom nga motambong sa Memoryal ug makadungog bahin sa duha ka kinadak-ang gugma nga gipasundayag pinaagi sa halad lukat. (Juan 3:16; 15:13) Masayran nila ang mga panalangin nga ilang mabatonan tungod sa maong gasa ni Jehova. (Isa. 65:21-23) Apan dili ra ang mamumulong ang makahatag ug pamatuod sa maong okasyon. Mahimo usab kini sa tanang manambong pinaagi sa pag-abiabi sa mga bisita.—Roma 15:7.
2. Sa unsang paagi kita mainitong makaabiabi sa mga bisita?
2 Inay mangita lang kag kalingkoran ug maghulat sa pagsugod sa programa, di ba mas maayo nga ilailahon kadtong anaa sa duol nimo? Ang mga bisita basin gikulbaan ug wala masayod kon unsay himoon panahon sa programa. Ang mainiton natong pahiyom ug pagtimbaya makaparelaks nila. Aron masayran kon kinsay mitambong kay nakadawat ug imbitasyon, tingali pangutan-on nimo siya kon una ba kining higayon nga siya mitambong sa atong tigom o kon may kaila ba siya sa kongregasyon. Tingali dapiton nimo siya sa pagtapad nimo aron duna siyay matamdan nga Bibliya ug songbok. Kon sa Kingdom Hall mo nagsaulog, tingali isuroy nimo siya kadiyot niini. Human sa pakigpulong, gahinig panahon ang pagtubag sa iyang mga pangutana. Kon nagdali mo kay may laing kongregasyon nga mosunod ninyo, tingali ingnon nimo siya: “Gusto nakong madunggan kon unsay imong ikasulti bahin sa programa. Puwede bang makuha nako ang imong adres ug contact number?” Dayon pakigsabot nga duawon nimo siya sa laing adlaw. Ang mga ansiyano kinahanglang alisto sa pagdasig sa di-aktibong mga magmamantala nga mitambong.
3. Nganong hinungdanon nga kita magpakitag inisyatibo sa pag-abiabi sa mga bisita panahon sa Memoryal?
3 Alang sa daghang bisita, mao unya kini ang unang higayon nga ilang masaksihan ang kalipay, pakigdait, ug panaghiusa sa katawhan sa Diyos. (Sal. 29:11; Isa. 11:6-9; 65:13, 14) Unsa kahay impresyon nga magpabilin sa ilang hunahuna? Nagdepende kini sa atong inisyatibo sa pag-abiabi kanila.