Dayega Kanunay si Jehova
1 Adunay pipila ka kalihokan nga hinungdanon kaayo alang kanato nga kini takos kanunay sa atong pagtagad. Kini mao ang pagkaon, pagginhawa, ug pagkatulog. Ang apostol Pablo nagbutang sa pagsangyaw sa maayong balita sa susamang matang sa dihang siya nagdasig: “Managtanyag kita kanunay sa Diyos ug halad sa pagdayeg.” (Heb. 13:15) Busa ang pagdayeg kang Jehova maoy usa ka butang nga kinahanglan natong panlimbasogan sa paghimo sa matag adlaw.
2 Si Jesus miingon: “Kinahanglan kong ipahayag ang maayong balita sa gingharian sa Diyos.” (Luc. 4:43) Sulod sa panahon sa iyang tulo-ug-tunga-ka-tuig nga ministeryo, ang tanang butang nga iyang gihimo sa matag adlaw maoy diretsong naglangkit sa pipila ka bahin sa paghimaya sa Diyos. Gibati usab kining paagiha ni Pablo. Matikdi ang 1 Corinto 9:16: “Alaot ako kon wala ko ipahayag ang maayong balita!” Ang ubang maunongong mga Kristohanon gidasig nga kanunayng andam sa paghimo ug depensa sa ilang pagtuo ngadto sa uban. (1 Ped. 3:15) Karong adlawa ang madasigong mga payunir ug mga magmamantala sa kongregasyon naningkamot nga masundog ang maong maayong mga ehemplo.
3 Sa dihang atong tagdon ang kasibot ni Jesus, kita matukmod sa pagsunod pag-ayo sa iyang mga lakang. (1 Ped. 2:21) Unsaon man nato nga sa adlaw-adlaw makapahimulos sa mga kahigayonan sa pagdayeg kang Jehova sa dihang aduna kitay bug-os-panahong sekular nga trabaho? Unsa naman kon adunay mga obligasyon sa pamilya nga nanginahanglan ug dakong bahin sa atong panahon? Kadaghanan sa mga batan-on okupado sa gikinahanglang pag-eskuyla. Ang pipila tingali mobati nga dili posible ang pagdayeg ni Jehova nga aktibo sa matag adlaw. Ang pipila mahimong magpalabay sa entirong bulan nga walay pakig-ambit sa maayong balita sa ubang paagi.
4 Si Jeremias maoy usa kinsa dili makapabiling magpakahilom. Sa dihang napakyas siya sa makadiyot sa pagsulti sa ngalan ni Jehova, iyang gibati ang dili maantos nga kalayo nga nagdilaab sulod niya. (Jer. 20:9) Bisan tuod aduna siyay mga problema, si Jeremias kanunayng nakakaplag ug mga paagi sa pagsulti sa mensahe ni Jehova ngadto sa uban. Ato bang masundog ang iyang ehemplo ug maghimog mga kahigayonan sa pagdayeg sa atong Maglalalang matag adlaw?
5 Ang atong pakigsulti bahin kang Jehova kinahanglang dili limitado sa pormal, nahikay-daang mga panahon alang sa pagsangyaw uban sa laing mga magmamantala sa teritoryo sa kongregasyon. Ang gikinahanglan lamang nato mao ang mapatalinghogong igdulungog. Atong mahinagbo ang katawhan matag adlaw—sila moanha sa atong panimalay, atong ikauban sila sa trabahoanan, o nagasakay kita uban kanila sa bus. Ang gikinahanglan lamang mao ang mahigalaong pagtimbaya ug usa ka makalihok-hunahuna nga pangutana o komento nga makasugod ug panaghisgot. Daghan ang nakakaplag niini nga ilang labing mabungahong paagi sa pagpanaksi. Sa dihang kita adunay daghan kaayong kahigayonan nga makasulti ngadto sa uban bahin sa maayong balita, dili gayod nato mahunahuna nga atong palabyon ang usa ka bulan nga walay paghatag ug pagpanaksi sa Gingharian.
6 Ang pribilehiyo sa pagdayeg kang Jehova dili gayod mahunong. Sama sa gipahayag sa salmista, sa Salmo 150:6. Kon ang atong kasingkasing motukmod kanato sa pagbuhat niana kanunay, atong pahimuslan matag adlaw ang kahigayonan sa pagsugid bahin kang Jehova ug sa iyang Pulong.