Pangitaa Pag-una ang Gingharian—Pinaagig Kanunayng Pagtanyag ug mga Halad sa Pagdayeg
1 Kadtong nagapangita pag-una sa Gingharian kanunayng nagasulti bahin kang Jehova ug sa iyang Gingharian. (Sal. 145:11-13) Kada adlaw adunay mga kahigayonan sa pagsulti bahin sa maayong balita. (Sal. 96:2) Ang salmista mipahayag: “Sa Diyos kita magadayeg sa tanang adlaw.” (Sal. 44:8) Kon gibati nato ang ingon, kita magmasiboton sa pagpakig-ambit nga makanunayon diha sa ministeryo sa Gingharian.
2 Si Jehova wala magpahilunag tinong mga kinahanglanon kon pila ang panahon nga angay natong gugolon sa ministeryo, apan siya nagadasig kanato sa pagdayeg kaniya “kanunay.” (Heb. 13:15) Kon ang atong mga kahimtang motugot, kinahanglang himoon natong tumong sa paggugol ug pipila ka panahon sa pagdayeg kang Jehova matag semana. Kadtong nagabuhat na niana mahimong makaalagad nga pupanahon ingong oksilyare payunir o bisan sa makanunayong paagi. Ang pipila nga nagaalagad na ingong mga oksilyare payunir makapalista ingong mga regular payunir.
3 Posible ba alang kanato sa pagpauswag sa atong halad sa pagdayeg? Ang kasibot mapalihok pinaagig apresasyon. Ang personal nga pagtuon sa Pulong sa Diyos nagaugmad ug apresasyon. Ang mga tigom sa kongregasyon makapalihok nato sa pagpahayag nianang maong apresasyon sa mapuslanong mga paagi. Ang suod nga pagpakig-uban sa ubang masibotong mga magdadayeg ‘magpasibot nato sa maayong mga buhat.’ (Heb. 10:24) Pinaagig bug-os nga pagpahimulos niining mga taganaha, mapauswag nato ang atong halad sa pagdayeg.
4 Ang propetisang si Ana naghatag ug maayong panig-ingnan sa pag-alagad kang Jehova. Bisag 84 anyos na, siya “wala gayod mawala diha sa templo, nga nagahatag ug sagradong pag-alagad adlaw ug gabii.” (Luc. 2:37) Ang iyang tibuok-kalag nga pagkalangkit sa mga kalihokan sa kongregasyon nagataganag pagdasig kanato karon.
5 Si Pablo nagrekomendar nga kadtong “mga lig-on angay mopas-an sa mga kaluyahon niadtong mga dili lig-on.” (Roma 15:1) Hayan may pipila sa inyong kongregasyon nga makabenepisyo sa imong malulotong pag-abag ug pagdasig. Ang usa ka magmamantala mahimong nanginahanglag kasakyan o usa nga ikauban sa pagsangyaw. Sa uban ang pagkaluya mahimong usa ka suliran, ug basin makatagana ka ug makapalig-ong suporta aron pagpasig-uli sa kasibot sa maong tawo sa pag-alagad sa Gingharian.—1 Tes. 5:14.
6 Imposible ang paghingalan sa tanang butang nga nahimo na o buhaton pa ni Jehova alang kanato. Wala gayoy paagi nga makabayad kita kaniya niining mga panalangina. Busa adunay kusganong mga katarongan alang sa ‘tanang nagaginhawa sa pagdayeg kang Jehova!’—Sal. 150:6.