Imo Bang Madugangan ang Pagdayeg Kang Jehova Sulod sa Abril?
1 Si David adunay kinasingkasing nga tinguha sa pagdayeg kang Jehova, ug busa siya miingon: “Ako magadayeg gayod kang Jehova uban sa akong baba, ug diha sa taliwala sa daghang katawhan ako magadayeg kaniya.” (Sal. 109:30) Ang Abril maoy usa ka maayong panahon sa ‘pagdugang ngadto sa tanan niyang pagdayeg’ pinaagig pagdugang sa atong pagpakig-ambit sa ministeryo. (Sal. 71:14) Nagaplano ka ba sa pagbuhat niini pinaagig pagduyog sa mga ranggo sa oksilyare payunir?
2 Pagplano Karon: “Ang mga plano sa makugihon nagapadulong gayod sa kaayohan,” miingon ang Proverbio 21:5. Kini nagapasabot sa pagdala sa maong butang ngadto kang Jehova diha sa pag-ampo, pagbutang kaniya nga una sa imong mga plano. (Prov. 3:5, 6) Sunod susiha ang imong eskedyol sa pagtino kon diin mahimo ang mga pagpasibo sa paggugol ug duha ka oras sa kada adlaw diha sa ministeryo. Ang “pagpalit” sa nahiangayng panahon gikan sa ubang mga kalihokan magatugot kanimo sa paggugol ug dugang panahon sa pagwaling buluhaton.—Efe. 5:16.
3 Pakighisgot ug Pakigtambayayong: Si apostol Pablo naghisgot sa pipila nga nahimong “makapalig-ong tabang” kaniya sa pagpalampos sa iyang ministeryo. (Col. 4:11) Ipakighisgot ang imong mga plano sa uban nga buot magpalista sa Abril. Ang ilang suportar ug pagpakig-uban makadalag espirituwal nga mga kaayohan. Ang magtatan-aw sa pag-alagad makatabang kanimo kon ikaw may mga pangutana bahin sa mga kahikayan sa pagsangyaw.
4 Ang pakigtambayayong sulod sa pamilya makatabang sa pipila ka membro sa pag-oksilyare payunir. Ang eskedyol alang sa mga gimbuhaton sa panimalay mahimong sa temporaryo ipasibo. Ang panaghisgot sa pamilya niining mga panginahanglana makatabang sa pagpalampos sa imong tumong. Ang maayong komunikasyon ug kooperasyon mao ang yawi sa kalamposan.
5 Hupti ang Postibong Panglantaw: Ayaw dayon pag-ingon nga dili ka makaoksilyare payunir tungod sa dili paborableng mga kahimtang. Ang mga batan-on sa tunghaan, retiradong mga tawo, mga asawang may mga anak, mga ulo sa pamilya nga nagatrabahong bug-os panahon, ang tanan nakaarang sa pag-oksilyare payunir sa Abril. Sila miuyon sa salmista nga “diha sa bahin sa mga matarong ang pagdayeg maoy tukma,” ug sila andam sa pagtanyag ug dugang paningkamot sa paggugol ug 60 ka oras sa ministeryo. (Sal. 33:1) Kon ikaw dili makahimo sa pagpalista, nganong dili makig-ambit sa kalipay pinaagig pagdugang sa imong kalihokan ingong usa ka magmamantala?
6 Alang sa daghan, ang pag-oksilyare payunir sa Abril maoy tikanganan ngadto sa regular payunir nga pag-alagad. Nga nakapauswag sa ilang kalihokan, ilang nakaplagang mas sayon ang pagpalista ingong mga regular nga payunir.
7 Ang Abril maoy paborableng panahon alang sa dugang teokratikanhong kalihokan, tungod sa maayong klima ug mga bakasyon sa tunghaan. Sagad mahimo nato ang dugang pagsangyaw sa sayong kabuntagon ug sa mga gabii. Oo, ang pag-oksilyare payunir sa Abril maoy usa ka maayong paagi sa pagdugang sa pagdayeg kang Jehova.