Dayega si Jehova sa Adlaw-Adlaw
1 Ang atong Diyos, si Jehova, mao ang tuboran sa tanang kinabuhi ug kalipay. Siya takos sa pagdayeg gikan sa tanan niyang mga linalang. Matag usa, buot kitang mosulti sama sa salmista: “Magadugang ang akong pagdayeg kanimo. Ang akong baba magamantala sa imong pagkamatarong, sa imong kaluwasan sa tibuok nga adlaw.” (Sal. 71:14, 15) Sa paghimo niini, kinahanglang mangita kita ug mga paagi sa pagdayeg kang Jehova sa adlaw-adlaw.
2 Ang unang mga Kristohanon nagtaganag maayong ehemplo sa pagdayeg kang Jehova. Mahitungod sa 3,000 nga nabawtismohan sa Pentekostes, ang Buhat 2:46, 47 nag-ingon: “Sa adlaw-adlaw sila kanunayng atua sa templo uban ang panag-uyon, . . . nga nagadayeg sa Diyos ug nakakaplag ug pabor sa tanang katawhan.” Sila nakakat-on sa kahibulongang mga kamatuoran bahin kang Jehova ug sa iyang Mesiyas. Ang ilang kalipay nakapadasig pa sa uban sa pagpaminaw ug pagkat-on ug sa pagdayeg kang Jehova.
3 Adunay mga Kahigayonan sa Matag Adlaw: Karong adlawa daghan ang nakakaplag nga sila makadayeg kang Jehova sa adlaw-adlaw pinaagi sa di-pormal nga pagsangyaw. Ang abanteng pagplano makatabang kanila nga mahimong mas pang mabungahon. Usa ka igsoong babaye kinsa nagtinguha nga makig-ambit sa di-pormal nga pagsangyaw nakakaplag nga adunay nagbuak sa duha ka bintana ug misulod sa iyang kotse. Mitawag siya sa mag-aayo ug unya nangandam sa pagsangyaw sa maong tig-ayo. Ang iyang pagpangandam naglakip sa pag-ampo alang sa pagtultol ni Jehova. Siya nagpamatuod sa maong tig-ayo sa usa ka oras ug nakapahimutang kaniya sa librong Mabuhing Walay Kataposan.
4 Laing igsoong babaye kanunay nga nakahibalag sa usa ka silingan samtang nagpasuroysuroy sa ilang mga iro. Usa ka adlaw, sa tininuod ilang nahisgotan ang bahin sa mga problema sa kinabuhi, ug kadto mitultol sa dugang pang mga panaghisgot. Miabot ang panahon, usa ka pagtuon sa Bibliya ang nasugdan. Nga makapainteres, ang maong silingan sa ulahi mitug-an nga wala unta siya makapaminaw sa mga Saksi ni Jehova kon sila nagduaw pa sa iyang pultahan, sanglit siya wala motuo sa Diyos o sa Bibliya.
5 Ang pipila makahimo sa pagpanaksi sa dihang ang mga tigbaligya moanha sa ilang pultahan. Usa ka igsoong babaye sa Ireland giduaw sa usa ka tawo nga nagbaligyag life insurance. Siya misaysay nga nagalaom siya sa pagtagamtam ug kinabuhing walay kataposan. Kini maoy bag-o alang niining Romano Katolikong lalaki. Iyang gidawat ang librong Live Forever, mitambong sa usa ka tigom sa sunod semana, ug miuyon nga himoag usa ka pagtuon sa Bibliya. Karon kining maong ahente usa na ka bawtismadong igsoon.
6 Magmaalisto kita sa mga kahigayonan sa pagdayeg kang Jehova sa adlaw-adlaw. Maghupot ug pipila ka magasin o tracts diha sa dayag ug itanyag sa mga bisita. Pipila ka batan-ong Saksi sa eskuylahan nagbutang ug mga basahon sa Bibliya ibabaw sa ilang talad-sulatanan ingong paagi nga makasugod ug panaghisgot uban kaniya nga makamatikod niana ug mosuknag mga pangutana. Batoni sa hunahuna ang usa o duha ka reperensiya sa Kasulatan nga imong magamit. Mangayo ug tabang kang Jehova. Ikaw mapanalanginan sa paghimo niini.—1 Juan 5:14.