Makasangyaw Ka ba sa Di-Pormal nga Paagi?
1. (a) Unsa ang di-pormal nga pagsangyaw? (b) Unsa ka daghan sa nanambong karon ang unang nakadungog sa kamatuoran pinaagi sa di-pormal nga pagsangyaw?
1 Pila sa inyong kongregasyon ang unang nakadungog sa kamatuoran pinaagi sa di-pormal nga pagsangyaw? Tingali ikaw mahingangha sa tubag. Ang di-pormal nga pagsangyaw maoy usa ka paagi sa pagpaambit sa maayong balita ngadto sa mga tawo nga atong gikahibalag sa matag adlaw—samtang magbiyahe, mobisita sa mga paryente o silingan, o mag-shopping, ingon man sa dihang anaa sa eskuylahan, trabahoan, ug sa uban pang dapit. Sa usa ka grupo nga may kapin sa 200 ka bawtismadong mga Saksi, 40 porsiyento kanila ang unang nasangyawan sa di-pormal nga paagi! Busa, kini nga paagi sa pagsangyaw epektibo kaayo.
2. Unsa nga mga pananglitan sa di-pormal nga pagsangyaw ang atong mabasa sa Kasulatan?
2 Ang mga ebanghelisador sa unang siglo sagad nagsangyaw sa di-pormal nga paagi. Pananglitan, sa dihang mipanaw agi sa Samaria, gisangyawan ni Jesus ang usa ka babaye nga nagkalos ug tubig sa tuboran ni Jacob. (Juan 4:6-26) Gisugdan pagsangyaw ni Felipe ang usa ka Etiopianhong opisyal sa palasyo nga nagbasa sa basahon ni Isaias pinaagi sa pagpangutana: “Nakasabot ka ba gayod sa imong ginabasa?” (Buh. 8:26-38) Sa dihang nabilanggo sa Filipos, gisangyawan ni Pablo ang usa ka magbalantay sa bilanggoan. (Buh. 16:23-34) Sa ulahi, samtang si Pablo gibilanggo sa iyang giabangan nga balay, “iyang ginadawat nga maluloton ang tanan nga mangadto kaniya, nga nagwali sa gingharian sa Diyos ngadto kanila ug nagtudlo sa mga butang mahitungod sa Ginoong Jesu-Kristo.” (Buh. 28:30, 31) Ikaw usab makasangyaw sa di-pormal nga paagi bisan ikaw maulawon. Sa unsang paagi?
3. Unsay makatabang kanato nga mabuntog ang pagkamaulawon?
3 Kon Unsaon Pagsugod: Daghan kanato ang malisdan sa pagsugod sa pagpakigsulti sa mga dili kaila. Bisan gani sa mga kaila, daw magpanuko kita sa pagsangyaw. Apan, kita madasig sa pagpakigsulti kon kita mamalandong sa pagkamaayo ni Jehova, sa bililhong kamatuoran nga iyang gihatag sa iyang mga alagad, ug sa grabeng kalisdanan sa katawhan sa kalibotan. (Jon. 4:11; Sal. 40:5; Mat. 13:52) Dugang pa, kita makapangayog tabang ni Jehova aron kita ‘makabaton ug kaisog.’ (1 Tes. 2:2) Usa ka estudyante sa Gilead miingon: “Sagad akong mamatikdan nga dakog tabang ang pag-ampo kon ako malisdan sa pagpakigsulti sa mga tawo.” Kon ikaw magpanuko sa pagpakigsulti, himoa ang usa ka mubo ug hilom nga pag-ampo.—Neh. 2:4.
4. Sa sinugdan, unsa nga tumong ang mahimo natong buhaton, ug ngano?
4 Sa di pormal nga pagsangyaw, dili nato kinahanglang sugdan ang panaghisgot pinaagig pormal nga introduksiyon o usa ka teksto. Tingali makatabang kanato kon himoon natong tumong nga makasugod lamang ug usa ka panaghisgot, nga dili maghunahunang mohatag dayon ug pamatuod. Daghang magmamantala ang miingon nga tungod sa pagbuhat niini, sila wala na magpanuko sa ulahi sa paghisgot sa maayong balita. Kon ang usa ka tawo dili buot makig-estorya, dili nato siya pugson. Panamilit nga matinahoron ug pakig-estorya na lang sa uban.
5. Unsay nakatabang sa usa ka maulawon nga sister sa pagsangyaw sa di-pormal nga paagi?
5 Sa dihang mag-shopping, ang usa ka maulawon nga sister motan-aw ug mopahiyom sa iyang mahibalag. Kon ang tawo mopahiyom usab, siya makighinabi kaniya sa makadiyot. Kon positibo gani ang iyang sanong, ang sister dili na magpanuko sa pagpadayon sa pag-estorya. Siya mamati pag-ayo ug mamalandong kon unsa nga topiko ang makapainteres kaniya. Niining paagiha, siya nakapahimutang ug daghang literatura ug gani nakasugod ug pagtuon sa Bibliya.
6. Sa unsang paagi kita makasugod ug panaghisgot sa di-pormal nga paagi?
6 Pagsugod sa Panaghisgot: Unsay atong isulti aron masugdan ang panaghisgot? Sa dihang si Jesus nakigsulti sa babaye didto sa atabay, gisugdan niya kini sa pagpangayo kaniya ug tubig. (Juan 4:7) Busa tingali kita makasugod ug panaghisgot pinaagi sa usa ka mahigalaong timbaya o pangutana. Sa imong pakig-estorya, tingali ikaw makakitag kahigayonan nga ikapaambit ang usa ka Kasulatanhong punto ug makatanom ug binhi sa kamatuoran. (Eccl. 11:6) Ang pipila nagmalamposon pinaagi sa paghisgot ug makapaikag nga topiko, nga tungod niana ang usa maaghat sa pagpangutana. Pananglitan, samtang maghulat sa doktor, mahimong sugdan nimo ang panaghisgot pinaagi sa pag-ingon: “Maayo unta kon dili na gyod ko masakit.”
7. Sa unsang paagi ang pagkamaayong maniid makatabang kanato sa pagsangyaw sa di-pormal nga paagi?
7 Kon kita maayong maniid, kita dali rang makasugod ug panaghisgot. Kon atong naobserbahan nga ang usa ka ginikanan may buotan nga mga anak, mahimo natong dayegon ang ginikanan ug mangutana, “Unsay nakatabang kanimo nga nagmalamposon ingong ginikanan?” Gihinumdoman sa usa ka sister kon unsa nga topiko ang gihisgotan sa uban diha sa iyang trabahoan ug dayon siya nagpaambit ug espesipikong impormasyon sumala sa kon unsay gikainteresan sa iyang mga kauban sa trabaho. Sa dihang iyang nahibaloan nga ang usa ka babaye nga kauban niya sa trabaho nagplanong magminyo, iyang gihatagan kini ug Pagmata! nga naghisgot kon unsaon pagplano ang kasal. Kini mitultol ug dugang mga panaghisgot sa Bibliya.
8. Sa unsang paagi magamit nato ang atong publikasyon sa pagsugod ug mga panaghisgot?
8 Ang laing paagi nga kita makasugod ug panaghisgot mao ang pagbasa sa atong mga publikasyon nga makita sa uban. Ang usa ka brader magbasa ug artikulo sa Bantayanang Torre o Pagmata! nga may makapaikag nga ulohan. Kon iyang namatikdan nga may motan-aw sa iyang magasin, siya mosuknag pangutana o mohimog mubong komento bahin sa artikulo. Kini sagad motultol sa usa ka panaghisgot ug sa paghatag ug pagpamatuod. Ang pagbutang ug usa sa atong mga publikasyon sa dapit diin kini daling makita mahimong makapainteres sa mga kauban sa trabaho o klasmet ug makapaaghat kanila sa pagpakisayod bahin niini.
9, 10. (a) Unsaon nato pagpangitag kahigayonan aron makasangyaw sa di-pormal? (b) Giunsa nimo kini paghimo?
9 Pangitag Kahigayonan: Tungod sa pagkadinalian sa buluhatong pagwali, kinahanglan gayod natong planohon ang di-pormal nga pagsangyaw. Mangita gayod kita ug kahigayonan nga makasangyaw samtang ginahimo ang atong adlaw-adlaw nga mga buluhaton. Hunahunaa daan ang mga tawo nga posible nimong mahibalag, ug palandonga kon sa unsang paagi ikaw makasugod ug mahigalaong panaghisgot. Pagdala kanunayg Bibliya ug ingon man mga literatura nga imong ikapaambit niadtong nagpakitag interes.—1 Ped. 3:15.
10 Kay maayong mangitag mga paagi, daghang magmamantala ang nagmalamposon sa di-pormal nga pagsangyaw. Gigamit sa usa ka sister ang pasilidad nga lulinghayawan sa guwardiyado-kaayo nga apartment nga iyang gipuy-an aron didto pormahon ang jigsaw puzzle nga may matahom nga mga talan-awon. Kon mohunong ang mga tawo ug modayeg sa matahom nga talan-awon, gamiton niya kini nga kahigayonan aron makasugod ug panaghisgot ug sultihan sila sa saad sa Bibliya bahin sa “usa ka bag-ong langit ug usa ka bag-ong yuta.” (Pin. 21:1-4) Duna ka bay nahunahunaang mga paagi aron makasangyaw sa di-pormal?
11. Unsaon nato pag-ugmad sa interes niadtong nasangyawan nato sa di-pormal nga paagi?
11 Ugmara ang Gipakitang Interes: Kon dunay maminaw kanimo, paningkamoti nga maugmad ang iyang interes. Kon haom, tingali ikaw moingon kaniya: “Nalipay kaayo ko sa atong panaghisgot. Unsaon ka nako pagkontak aron magkaestorya tag usab?” Ang pipila ka magmamantala maghatag sa ilang adres ug numero sa telepono ngadto sa interesado ug moingon: “Nalipay ko sa atong panaghisgot. Kon gusto nimong masayod ug dugang bahin sa atong gihisgotan, nia ang akong adres ug numero sa telepono.” Kon dili ka personal nga makaduaw kaniya, paghatag ug Please Follow Up (S-43) nga porma sa sekretaryo sa inyong kongregasyon aron ikahatag kini sa kongregasyon nga makaatiman sa interesado.
12. (a) Nganong kita maghupot ug rekord ug magtaho sa oras nga atong gigugol sa di-pormal nga pagsangyaw? (b) Unsa ang mga bunga nga nabatonan sa di-pormal nga pagsangyaw? (Tan-awa ang kahon nga “Nagmabungahon ang Di-Pormal nga Pagsangyaw!”)
12 Ang oras nga atong gigugol sa di-pormal nga pagsangyaw kinahanglang itaho. Busa, tinoa nga ikaw adunay rekord niini, bisag pipila lang kini ka minuto. Hunahunaa kini: Kon ang matag magmamantala makagugol ug lima ka minuto sa di-pormal nga pagsangyaw, kana makadugang ug kapin sa 17 ka milyong oras kada bulan!
13. Unsay makapalihok kanato sa pagsangyaw sa di-pormal nga paagi?
13 Kita aduna gayoy mga katarongan nga mosangyaw sa di-pormal nga paagi—ang gugma alang sa Diyos ug sa silingan. (Mat. 22:37-39) Tungod kay atong gipabilhan pag-ayo ang mga hiyas ug mga katuyoan ni Jehova, kita madasig sa pagsulti bahin sa “himaya sa kahalangdon sa iyang pagkahari.” (Sal. 145:7, 10-12) Ang tiunay nga kahingawa alang sa atong mga silingan magpalihok kanato nga pahimuslan ang matag kahigayonan sa pagpaambit sa maayong balita samtang duna pay panahon. (Roma 10:13, 14) Pinaagig abanteng pagplano ug pagpangandam, kitang tanan makasangyaw sa di-pormal nga paagi ug makasinati sa kalipay sa pagpaambit sa kamatuoran sa matinud-anog kasingkasing nga tawo.
[Blurb sa panid 4]
Tingali makatabang kanato kon himoon natong tumong nga makahimamat ug mga tawo ug makasugod ug usa ka panaghisgot
[Blurb sa panid 5]
Kay maayong mangitag mga paagi, daghang magmamantala ang nagmalamposon sa di-pormal nga pagsangyaw
[Kahon sa panid 5]
Mga Sugyot Kon Unsaon Pagsugod ang Panaghisgot
◼ Pag-ampo alang sa tabang
◼ Pilia kadtong daw mahigalaon ug wala magdali
◼ Tan-aw kaniya, pahiyom, ug hisgoti ang mga butang diin siya usab interesado
◼ Paminaw pag-ayo
[Kahon sa panid 6]
Nagmabungahon ang Di-Pormal nga Pagsangyaw!
• Samtang nagpaayo sa iyang awto didto sa talyer, gisangyawan sa usa ka brader kadtong mga tawo nga tua didto ug gihatagan silag mga handbill aron imbitahon sila sa pahayag publiko. Usa ka tuig sa ulahi didto sa kombensiyon, may usa ka brader nga wala niya hiilhi ang mainitong mitimbaya kaniya. Siya diay ang usa sa mga tawo nga iyang gihatagan ug handbill didto sa talyer usa ka tuig na ang milabay! Ang tawo mitambong sa pahayag publiko ug mihangyog pagtuon sa Bibliya. Siya ug ang iyang asawa nabawtismohan.
• Usa ka sister nga nakadangat sa kamatuoran pinaagi sa di-pormal nga pagsangyaw ang naghimo sa mga tawo nga iyang mahimamat pinaagi sa iyang tulo ka anak ingong iyang linaing teritoryo. Lakip sa iyang teritoryo mao ang mga silingan ug mga ginikanan nga iyang mahimamat sa eskuylahan ug sa mga miting sa mga ginikanan. Sa matag higayon nga iyang ipailaila ang iyang kaugalingon, siya sinserong moingon nga ang Bibliya nakatabang gayod kaniya sa pagmatuto sa iyang mga anak, ug unya siya mopadayon sa paghisgot ug laing topiko. Kay siya nakasugod na ug panaghisgot kanila, mas sayon na alang kaniya ang pagsangyaw kanila sa sunod nga mga higayon. Niining paagiha, natabangan niya ang 12 ka tawo nga magpabawtismo.
• Sa dihang ang usa ka sister gitanyagan ug insyurans sa usa ka ahente, gipahimuslan niya ang kahigayonan sa paghatag ug pamatuod. Iyang gipangutana ang ahente kon buot ba niyag insyurans nga mogarantiya ug maayong panglawas, kalipay, ug kinabuhing walay kataposan. Ang ahente miingon nga oo, ug nangutana kaniya kon unsa nga insyurans ang iyang gipasabot. Gipakita sa sister kaniya ang mga saad sa Bibliya ug gitanyagan siyag usa sa atong mga publikasyon, ug gihurot niya kinig basa sa usa ka gabii. Gihikay nga madumalahan siyag pagtuon sa Bibliya. Siya misugod sa pagtambong sa mga tigom, ug sa ulahi siya nabawtismohan.
• Samtang nagsakay ug ayroplano, gisangyawan sa usa ka sister ang babaye nga tapad niya. Sa dihang miabot na sila, gihatag sa sister ang iyang adres ug numero sa telepono ngadto sa babaye ug gidasig siya nga magtuon ug Bibliya sa sunod higayon nga moduaw kaniya ang mga Saksi ni Jehova. Pagkasunod adlaw, duha ka Saksi ang miduaw sa babaye. Siya misugod ug pagtuon sa Bibliya, nagmauswagon, nabawtismohan, ug sa wala madugay nagdumala ug tulo ka pagtuon sa Bibliya.
• Usa ka 100-anyos nga brader nga buta kinsa nagpuyo sa usa ka nursing home ang sagad moingon, “Kinahanglan nato ang Gingharian.” Tungod niini daghang nars ug mga pasyente ang nangutana kaniya bahin niini, ug busa iyang gipatin-aw kanila kon unsa ang Gingharian. Usa sa mga babaye nga nagtrabaho didto nangutana sa brader kon unsay buhaton niya sa paraiso. Siya mitubag, “Makakita na ko ug makalakaw na pag-usab ug sunogon nako kining akong wheelchair.” Kay buta man siya, iyang gihangyo ang babaye nga basahan siya sa magasin. Sa dihang miduaw ang anak nga babaye sa brader, gihulaman sa babaye ang magasin aron dad-on kini sa ilang balay. Usa ka nars ang nag-ingon sa anak sa brader, “May bag-ong panultihon na kami dinhi sa nursing home: ‘Kinahanglan nato ang Gingharian.’”
• Samtang ang usa ka sister milinya aron mopalit ug pagkaon diha sa restawran, nadunggan niya ang tigulang nga mga lalaki nga naglingkod sa duol nga naghisgot bahin sa politika. Usa kanila miingon nga ang gobyerno dili makasulbad sa atong mga problema. Miingon ang sister, ‘Ako na kining higayon.’ Siya miampo sa makadiyot ug miduol kanila. Human ipailaila ang kaugalingon, iyang gisultihan sila bahin sa usa ka gobyerno nga mosulbad sa mga problema sa katawhan, ang Gingharian sa Diyos, ug gitanyagan sila ug brosyur. Dihadiha ang manedyer miduol kaniya. Ang sister nagtuo nga papahawaon siya. Hinunoa, kini miingon nga siya naminaw sa ilang panaghisgot ug gusto sab niya nga makabaton ug brosyur. Ang usa ka trabahante nga naminaw usab miduol kaniya nga naghilak. Siya diay nagtuon kaniadto sa Bibliya ug buot niyang ipadayon ang iyang pagtuon.