Pagtanyag sa Maayong Balita—Pagsangyaw sa Di-pormal nga Paagi
1 Samtang nagpahulay ubay sa atabay ni Jacob, gisugdan ni Jesus ang pagpakigsulti sa usa ka babayeng Samaritanhon. (Juan 4:5-30) Bisan pag gikapoy ug giuhaw, iyang gihimo ang di-pormal nga pagsangyaw. May maayong sangpotanan ba kadto? Segurado! Kadto misangpot nga daghang Samaritanhon ang nagtuo kang Jesus.—Juan 4:39-42.
2 Nasayran sa daghan karong adlawa nga ang di-pormal nga pagsangyaw usa ka ekselenteng paagi sa pagpakaylap sa maayong balita ug gipahimuslan nila ang makalipayng mga kasinatian. Apan ikaw tingali mangutana kon asa ug kanus-a ka makasangyaw sa di-pormal nga paagi. Sa unsang paagi mahimo kini?
KON ASA UG KANUS-A
3 Ang usa makasangyaw sa di-pormal nga paagi sa halos tanang kahimtang ug dapit. Daghang magmamantala nagasangyaw sa di-pormal nga paagi sa dihang mopaingon ug mopauli gikan sa trabaho o sa dihang magbiyahe sa bakasyon. Ang uban nagapahimulos sa mga pahulay human sa paniudto. Ang uban nagasangyaw samtang mamalit. Usa ka magtiayon nagsangyaw ngadto sa usa ka matadero sa usa ka dakong merkado, ug sa nagpakita siyag interes, ilang gipadayon ang panaghisgot didto sa iyang balay nianang gabhiona mismo.
4 Ang luya o masakitong mga magmamantala nagmalamposon sa pagsangyaw ngadto sa mga bisita, medikal nga mga tawo, ug mga attendant sa ospital. Ang pipila ka igsoon makigsulti sa mga bisita nga moduaw sa ilang balay. Ang uban nagaduol sa mga tawong nagapahayahay sa publikong mga parke. Ang mga hulatanan sa ayroplano o bus maayo usab nga mga dapit sa di-pormal nga pagsangyaw.
KON UNSAON KINI PAGHIMO
5 Usa ka igsoong lalaki miingon: “Akong nadiskobrehan nga kasagarang makatabang ang pag-ampo kon maglisod ako sa pagpakigsulti sa mga tawo.” Busa pangitag mga paagi sa pagpakigsulti sa mga tawo, ug hangyoa si Jehova sa pagbukas sa dalan. Magmahigalaon ug mainiton. Sulayi ang pagsugod sa estorya sa butang nga tingali gikaikagan ninyong duha.
6 Hinuon, kon mahimo, buot natong ibilin sa tawong interesado ang usa ka basahon. Kini nagkahulogang angay kitang magplano daan ug magbatog mga ‘tract,’ mga magasin, mga pulyeto, o brochures. Ang atong bag-o gagmayng mga ‘tract’ bililhon gayong mga tabang sa di-pormal nga pagsangyaw. Ang pipila milampos gayod sa pagsugod sa mga estoryahay pinaagi sa pagbilig ‘brochures’ o mga magasin diha sa ilang talad trabahoan o sa lamesa sa balay. Kana tingali makadani sa kauban sa trabaho o bisita ug mosangko sa mabungahong pagsangyaw.
7 Hikaya ang pagsunod (pagsundal) sa tanang interes. Tinoa ang pagtaho sa panahon ingong pag-alagad sa kanataran. Pinaagi sa pagpaningkamot sama sa gihimo ni Jesus, panalanginan ka usab ni Jehova sa pagpakaylap sa maayong balita pinaagig di-pormal nga pagsangyaw.