Bahin 2—Pahimusli ang Matag Higayon sa Pagpamatuod
1 Ginatos ka linibo sa katawhan ang nasinati sa kamatuoran pinaagig impormal nga pagpamatuod. Kon kining paagiha sa pagpamatuod bug-os nga magamit, dugang pang mga minilyon ang maabot sa mensahe sa maayong balita. Ingong mga alagad ni Jehova, kinahanglan padayong ipasanag ta ang atong kahayag. Sa unsang paagi atong mabuhat kini sa paaging mas bug-os pa?—Mat. 5:15, 16; Filip. 2:15.
2 Adunay lainlaing mga paagi nga kita makahimog mga higayon sa pagpamatuod sa impormal nga paagi. Sa panahon sa tingpaniudto nga pahulay, samtang nagahulat diha sa opisina, o nagabiyahe sa publikong sakyanan, ang ubang mga igsoon nagabatasan sa pagbasa sa Bibliya o usa sa mga magasin o libro sa Sosyedad. Pinaagig pagkaalisto sa reaksiyon o sa bisan unsang interes nga gipakita niadtong naglingkod sa duol, ang usa ka panaghisgot mahimong moresulta kon kita yanong mopakig-ambit sa usa ka punto gikan sa atong nabasa.
3 Sagad dili malisod sa pagsugod ug panaghisgot uban sa usa ka tawo bahin sa kasagarang hitabo nga makapainteres sa lokal. Kon pangayoon ta ang tabang ni Jehova sa pag-ampo ug unya manlimbasog, atong matagamtam ang maayo kaayong mga resulta. Ang usa ka yano kaayong paagi sa paghimog mubo ug impormal nga pagpamatuod mao ang pagtanyag sa usa sa atong tracts. Kini ilabinang mapuslanon diha sa mga kahimtang nga diyutay ra gayod ang panahon sa panaghisgot. Ang ‘tracts’ gamay lang ug sayon nga madala apan nasudlan sa gamhanang mensahe. Kadaghanan kanato makagamit niana sa mas masubsob.
GAMITA ANG BASAHONG NANGATARONGAN
4 Usa ka mapuslanong tabang alang sa tanang bahin sa pagsangyaw sa Gingharian mao ang librong Nangatarongan. Daghan sa mga pasiuna sa mga panid 9-15, maingon man sa impormasyon ubos sa “Mga Tigsumpo sa Panaghisgot” sa mga panid 15-24 ikapahiangay man ngadto sa impormal nga pagpamatuod ug magamit sa pagsugod ug mga panaghisgot. Pananglitan, ang usa ka pasiuna sa panid 11 nag-ingon: “Imo bang nabasa kini sa mantalaan niining semanaha? (Ipakita ang haom tinabas-mantalaan.) Unsay hunahuna mo . . . ?” Pagkayano, apan epektibo sa pagsugod ug panaghisgot! O kita makapangutana kon ang maong tawo nakamatikod ba sa paagi nga ang mga buhatan sa balita nagkutlo sa iladong mga tawo kinsa nagagamit sa terminong “Armageddon” nga gitumong ngadto sa nukleyar nga gubat. Ato dayong masukna kon sa iyang hunahuna magkahulogan sa unsa ang Armageddon ngadto sa katawhan. Ang materyal nga anaa sa panid 9 ikapahiuyon man ngadto sa panaghisgot.
5 Sa dihang mahimo ta ang impormal nga pagpamatuod, maayong tugotan ang atong gikasulti nga hatagan ug higayon nga mosulti sa iyang kaugalingon. Kinahanglan kitang mabuot ug matinahoron sa tanang panahon. Kon maminaw kita pag-ayo sa isulti sa laing tawo, kita makatino kon unsa ang iyang intereses ug unya makabungat sa mga pulong nga magpagana sa iyang espirituwal nga kahimtang. (Prov. 25:11) Kon posible, ato gayong kuhaon ang mga ngalan ug mga adres niadtong nagapakitag interes aron ang dugang kontak mahimo sa pag-ugmad sa maong interes. Mao man usab, kinahanglang huptan ta ang rekord sa oras nga atong magugol sa impormal nga pagpamatuod aron kini sa husto ikareport.
6 Kon gibati mo nga dili malamposon sa paghimog impormal nga pagpamatuod, ayawg kaluya. Ang imong mga panikaysikay sa pagpugas sa mga binhi sa kamatuoran sa Gingharian pinaagig impormal nga pagpamatuod hayan mobunga ra sa ulahi. Sagad, mao ang pagkatigom sa kamatuoran nga gipugas pinaagig impormal nga pagpamatuod ang magpatunghag maayong mga resulta. Usab, ang mga tawo nga atong mahibalag sa impormal nga paagi sagad dili makontak pinaagig buluhatong pamalaybalay tungod sa mga eskedyol sa trabaho. Bisan kon wala kitay basahon sa Bibliya nga ikapahimutang sa mga tawo, ang binaba nga pagpamatuod makapalampos ug dako sa ikaayo. Aduna ing minilyon nga mga tawo nga atong maabot kon pahimuslan ta ang matag higayon sa paghimog impormal nga pagpamatuod.