Bahin 1—Pahimusli ang Matag Higayon sa Pagpamatuod
1 Ang apostol nga si Pablo mitambag sa Hebreohanong mga Kristohanon: “Magatanyag kita kanunay ngadto sa Diyos sa usa ka halad sa pagdayeg, nga mao, ang bunga sa mga ngabil nga nagahimog katilingbanong kasugiran sa iyang ngalan.” (Heb. 13:15) Usa ka paagi sa pagbuhat niini mao ang regular nga pagsuportar sa mga kahikayan sa pag-alagad sa kanataran. Ang laing epektibong paagi sa pagtanyag ngadto sa Diyos ug halad sa pagdayeg mao ang pagpahimulos sa mga kahigayonan sa paghatag ug impormal nga pagpamatuod.
2 Sa atong matag adlaw nga kalihokan, ang kadaghanan kanato makakontak man sa ubang mga tawo. Kon kita alisto sa pag-ila sa mga kahigayonan ug unya manlimbasog, kita makahimo gayod sa pagpugas sa daghang binhi sa kamatuoran sa Gingharian. Hayan nagakinahanglan lang kini ug mubong komento o usa ka pangutana bahin sa mga kahimtang sa kalibotan aron halingon ang panaghisgot nga mobukas sa dalan alang sa pagpamatuod.
MANGANDAM
3 Ang malamposong impormal nga pagpamatuod nagakinahanglan ug abanteng pagpangandam. Kita ba mahinangop sa pagpanikaysikay? Kon atong analisahon kon unsa ang atong buhaton nianang adlawa, hunahunaon ang mga tawo nga hayan mahibalag ta, ug tagdon kon unsa kahay isulti aron makasugod sa panaghisgot, atong makaplagan nga mas sayon sa pagpamatuod sa impormal nga paagi. Paneguroa nga adunay tracts, mga magasin, o ubang literatura nga ikatanyag. Komosta man ang Bibliya? Ang bulsa-gidak-on nga Bibliya sayon nga moigo sa usa ka pitaka o bulsa ug magamit segon sa itugot sa higayon.
4 Dugang pa, kinahanglan kitang hibalo sa karong mga hitabo nga maylabot sa tagna sa Bibliya. Ang “Pagpaniid sa Kalibotan” ug “Kahulogan sa Balita” nga mga bahin diha sa atong mga magasin maoy hinungdanong mga tabang niining puntoha. Kon ibutang ta sa hunahuna ang maong mga balita, kita makaarang sa pagpaila sa mga ulohan nga magpadani ug dako.
HIMOANG UNANG PANINGKAMOT
5 Adunay daghang kahigayonan sa kada adlaw sa paghatag pamatuod. Bisan ang mga magmamantala sa ospital nahimong epektibo sa paghisgot sa kamatuoran ngadto sa mga doktor, mga nars, mga trabahante sa ospital, mga bisita, ug ubang mga pasyente. Gigamit sa ubang mga magmamantala ang ilang pahulay sa trabaho sa tingpaniudto o sa eskuwelahan ug ang panahon sa paghulat alang sa usa ka kasabotan. Ang mga kahigayonan sa pagpamatuod moabot man samtang nagasuroy-pamalit, sa dihang nagabakasyon, o sa nagabiyahe pinaagig bus, ayroplano, o tren. Ang uban epektibo sa pagpamatuod diha sa ilang kaugalingong balay sa dihang ang mga ahente, mga tawong nagahatod ug unsa mang butang, mga silingan, mga paryente, ug uban pa nagaduaw kanila.
6 Sa dihang mopaingon ngadto sa mga asembliya o mga kombensiyon, atong magamit ang higayon sa pagpakigsulti sa mga tawo ug ipatin-aw kon asa kita paingon ug kon ngano. Kon kita mohunong sa pagtubil ug gasolina, mokaon sa mga restawrant, o magasuroy-pamalit, kita gayod mangita ug angay nga mga paagi sa pagpamatuod sa impormal nga paagi.—Eccl. 11:6.
7 Ang kinasingkasing nga pagpabili sa kamatuoran ug ang pagkadinalian sa mga panahon kinahanglang magpalihok kanato sa pagpahimulos sa matag higayon aron ipugas ang mga binhi sa kamatuoran sa Gingharian pinaagi impormal nga pagpamatuod.—Mat. 24:14.