Andam Ka Bang Mosangyaw sa Di-Pormal nga Paagi?
1. Unsang pananglitan ang nagpakita nga ang pagsangyaw sa di-pormal nga paagi mahimong epektibo?
1 Ang pagsangyaw sa di-pormal nga paagi mahimong epektibo gayod. Mabasa sa Bibliya ang daghang pananglitan sa di-pormal nga pagsangyaw nga may maayong mga resulta. (Juan 4:7-15) Unsay atong mahimo aron kita maandam sa pagsangyaw sa di-pormal nga paagi?
2. Sa unsang paagi ang atong pamesti ug pamostura makatabang kanato nga mahimong andam sa pagpamatuod?
2 Pamesti ug Pamostura: Mas dali natong ikapaambit sa uban ang atong pagtuo kon atong hatagag hustong pagtagad ang atong pamesti ug pamostura sa tanang panahon. (1 Tim. 2:9, 10) Kon dili maayo ang atong pamesti, lagmit magpanuko kita sa pagsangyaw. Sa kasukwahi, ang atong hapsay, hinlo nga hitsura basin mopalihok sa uban sa pagsukna kanato kon nganong ingon kita niana mamesti. Pananglitan, samtang nagbiyahe, ang usa ka Saksing magtiayon nga desenteg pamesti milingkod tupad sa usa ka lalaking Muslim. Kay nakadayeg sa ilang pamesti, ang lalaki nangutana kon sila ba mga Kristohanon. Kini misangpot sa tulo-ka-oras nga panaghisgot sa Bibliya.
3. Agig pagsunod sa panig-ingnan ni Jesus, giunsa nimo pagsugod ang usa ka panaghisgot?
3 Pagsugod ug mga Panaghisgot: Sa dihang nahimamat ni Jesus ang usa ka babayeng Samarianhon sa atabay ni Jacob, iyang gisugdan ang panaghisgot pinaagi sa pagpangayo sa babaye ug tubig nga mainom. Sa samang paagi, mahimo natong sugdan ang usa ka panaghisgot pinaagi sa pipila ka pulong o pagsuknag usa ka yanong pangutana. Bisan pa tingalig magpanuko kita usahay, kon kita mosalig sa tabang ni Jehova, kita mahimong ‘makabaton ug kaisog’ sa pagsugod ug usa ka panaghisgot.—1 Tes. 2:2.
4. Sa unsang paagi kita maandam sa pagsangyaw sa di-pormal nga paagi?
4 Pagpangitag Kahigayonan: Daghang magmamantala ang nakahimo sa pagsangyaw sa di-pormal nga paagi. Susiha ang imong mga kahimtang, ug hunahunaa ang mga tawo nga lagmit imong mahibalag sa adlaw-adlaw. Pagdala ug haom nga mga literatura ug usa ka Bibliya. Magmapaniiron ug pagbaton ug interes sa mga tawo sa imong palibot. Kon imong hunahunaon daan ang mga kahigayonan nga basin imong masinatian nianang adlawa, lagmit ikaw maandam sa paghatag ug maayong pamatuod.—Filip. 1:12-14; 1 Ped. 3:15.
5. Nganong angay natong planohon ang pagsangyaw sa di-pormal nga paagi?
5 Adunay duha ka rason kon nganong angay natong pahimuslan ang mga kahigayonan nga mosangyaw sa di-pormal nga paagi—ang gugma alang sa Diyos ug ang gugma alang sa silingan. (Mat. 22:37-39) Tungod sa pagkadinalian sa buluhatong pagsangyaw, angay gayod natong planohon ang pagsangyaw sa di-pormal nga paagi. Kita kinahanglang andam sa pagpahimulos sa matag haom nga kahigayonan aron ipaambit sa uban ang maayong balita sa Gingharian samtang aduna pay panahon.—Roma 10:13, 14; 2 Tim. 4:2.