Pagsulti Bahin sa Himaya sa Pagkahari sa Diyos
“Sila managsulti bahin sa himaya sa imong pagkahari, ug managsulti bahin sa imong pagkagamhanan.”—SALMO 145:11.
KATUYOAN ni Jehova nga hatagan kita ug katakos sa pagsulti. (Exodo 4:11) Una sa tanan, aron ang atong mga ngabil “mopaagos ug pagdayeg” kaniya. (Salmo 119:171, 172) Sumala sa gipamulong ni salmistang David: “Ang tanan mong mga buhat managpasidungog kanimo, Oh Jehova, ug ang imong mga balaan managdayeg kanimo. Sila managsulti bahin sa himaya sa imong pagkahari, ug managsulti bahin sa imong pagkagamhanan, aron ang imong mga buhat nga gamhanan igapadayag ngadto sa mga anak sa tawo ug ang himaya sa pagkahalangdon sa iyang pagkahari. Ang imong pagkahari maoy pagkahari sa walay kataposan, ug ang imong gingharian hangtod sa tanang kaliwatan.”—Salmo 145:10-13.
2. Sa unsang mga paagi kita mapukaw sa “pagpaagos ug pagdayeg” sa Diyos?
2 Ang dinihogang mga sumusunod ni Jesu-Kristo ug ang ilang mga kaubang “dakong panon” maikagon sa pagdayeg kang Jehova, ang “Hari sa walay kataposan.” (Pinadayag 7:9; 15:3) Pinaagi sa kuging pagtuon sa Bibliya uban sa Ang Bantayanang Torre ug ubang Kristohanong mga publikasyon ingong mga giya, atong mabatonan ang tukmang kahibalo bahin sa Diyos nga samag tubod sa lunsay, makapapresko, makahatag-kinabuhing tubig. Busa, sa atong kahimtang ‘ang tubod sa atabay sa kaalam maingon sa usa ka sapa nga nagaagos.’ (Proverbio 18:4) Kita matukmod sa “pagpaagos ug pagdayeg” sa balay-balay nga pagpamatuod ug ubang mga porma sa pag-alagad sa kanataran. Apan adunay Kasulatanhong katarongan usab alang sa dili-pormal nga pagpamatuod.
Kasulatanhong mga Sumbanan
3 Ang unang pagmantala nga gihimo ni Jesus nahitabo tapos sa pagdihog kaniya sa balaang espiritu diha sa iyang abtanan, diin iyang gidapit si Juan, Andres, ug tingali si Pedro. Migugol silag usa ka adlaw didto, dayag nga nakadawat ug igong pagpamatuod nianang dili-pormal nga kahimtang. (Juan 1:35-42) Ilalom usab kadto sa dili-pormal nga mga kahimtang—“samtang naglakaw”—nga nakita ni Jesus si Mateo diha sa buhisanan ug nakadawat ug positibong resulta dihang siya miingon: “Sumunod ka kanako.”—Mateo 9:9.
4. Unsay giingon ni Jesus dihang nagpamatuod sa usa ka babayeng taga Samaria, ug unsay miresulta niini?
4 Si Jesus mao ang labing maayong pananglitan sa ‘tubod sa kaalam nga nagaagos.’ Bisan pa nga naglingkod siya nga gigutom ug gikapoy sa daplin sa atabay duol sa Sychar, siya mipamatuod sa usa ka babayeng taga Samaria nga miduol sa pagkalos ug tubig. “Ang bisan kinsa nga magainom sa tubig nga akong igahatag kaniya dili na gayod pagauhawon pa,” miingon si Jesus, “kay ang tubig nga akong igahatag mahimo diha kaniya nga tuboran sa tubig nga nagaagos sa paghatag ug kinabuhing dayon.” Kining impormal nga pagpamatuod mitultol sa pagsangyaw ni Jesus sa usa ka pundok nga nakapukaw sa mga babaye sa pagduol ug sa pagpamati sa iyang gipamulong.—Juan 4:6-42.
5. Unsang pananglitan sa impormal nga pagpamatuod ang nahatag ni Filipe ug ni apostol Pablo?
5 Si Filipe nga ebanghelisador nakasugat ug karwahi ug mipamatuod sa impormal nga paagi sa nagsakay niini, kinsa nagbasa sa tagna ni Isaias. Gidapit sa pagsakay sa karwahi, gisaysay ni Filipe “ang maayong balita mahitungod kang Jesus” ngadto sa eunoko nga Etiopianhon, diin ang iyang mapabilhong pagpamati miresulta sa iyang pagpabawtismo. (Buhat 8:26-38) Dihang natangtang ang talikala ni Pablo tungod sa dakong linog sa Filipos, mipamatuod siya sa impormal nga paagi sa tigbilanggo. Ang resulta? “Ang tanan, siya ug ang iyang panimalay gibawtismohan dihadiha.”—Buhat 16:19-34.
6. Unsang bahin sa impormal nga pagpamatuod ang nalangkit sa buluhaton sa mga disipulo ni Jesus human nga gibato si Esteban?
6 Karon, ang impormal nga pagpamatuod maoy usa sa mga paagi sa pagmantala sa maayong balita diha sa dapit nga gidili ang atong Kristohanong buluhaton. Apan, bisan pa nga lutoson kita, ang atong mga kasingkasing mopukaw kanato sa pagsulti mahitungod sa himaya sa pagkahari sa Diyos. Tapos nga gibato hangtod nga namatay si Esteban, ang kadaghanan sa gilutos nga mga disipulo nagkatibulaag. Apan, nagpadayon sila sa pagmantala sa maayong balita, ug piho nga lakip ang impormal nga pagpamatuod sa ilang paningkamot sa pagsangyaw sa Gingharian.—Buhat 8:4-8; 11:19-21.
7. Dihang nabilanggo, unsay gihimo ni Pablo, ug busa mobangon ang unsang mga pangutana?
7 Ang impormal nga pagpamatuod maoy usa sa paagi sa pagsulti bahin sa himaya sa pagkahari sa Diyos kon kita nabilanggo o dili makagawas sa atong mga balay tungod sa sakit o balatian. Binilanggo si Pablo sa balay sulod sa duha ka tuig nga gibantayan sa sundalong Romanhon. Apan inay maluya, iyang gipatigom ang mga tawo ug “malulutong giabiabi niya ang tanan nga miadto kaniya, giwali ang gingharian sa Diyos kanila ug nagpanudlo sa mga butang mahitungod kang Ginoong Jesu-Kristo nga may dakong kagawasan sa pagsulti.” (Buhat 28:16-31) Pagkamaayong pananglitan! Kon usa ikaw ka saksi ni Jehova nga dili makagawas sa balay, mahimo mo ba ang samang butang?
8. Unsa ka epektibo ang impormal nga pagpamatuod ni Pablo?
8 Sanglit baylo-baylo ang mga guwardiya ni Pablo, lainlaing mga tawo ang nakadungog kaniya nga nagsulti sa uban bahin sa himaya sa pagkahari sa Diyos. Apan, kita makatino, nga nagpamatuod usab siya direkta sa mga guwardiya. Epektibo kaayo ang impormal nga pagpamatuod nga tungod niana si Pablo nakasulat: “Ang nahitabo kanako nakaalagad hinoon sa pagpauswag sa maayong balita, nga tungod niana nahibaloan sa tanang Bantay sa Pritoryo ug sa uban pa nga ako nabilanggo tungod kang Kristo; ug ang kadaghanan sa mga igsoon diha sa Ginoo, masaligon tungod sa akong pagkabinilanggo, ug misamot pa sa pagkamaisogon sa pagsulti sa pulong sa Diyos sa walay kahadlok.” (Filipos 1:12-14) Sama kang Pablo, kon kita mabilanggo man ugaling ug walay mga higayon sa pormal nga pagpamatuod, makasulti gihapon kita bahin sa pagkahari sa Diyos. Ug pagkadako sa kaisog ang mapasilsil niini diha sa atong mga igsoon!
9, 10. Unsang sekular nga ebidensiya nga nagpamatuod sa impormal nga paagi ang unang mga Kristohanon?
9 Ang impormal nga pagpamatuod komun kaayo sa unang mga Kristohanon nga bisan sa ulahi na nga mga tuig kini ang gikaingon: “Gikan sa Kristohanong magsusulat, tingali sa Cartago kapin kun kulang sa mga 200, among nakuha ang larawan . . . [nga] may kalabotan sa mga tawo nga edukado kaayo. Tulo ka batan-ong mga abogado, nga suod nga mga higala, nagpalabay sa piyesta-opisyal diha sa daplin sa baybayon. Duha mga Kristohanon, ang ikatulo pagano. Ang ilang pagsultihay midangat sa relihiyon . . . Ang asoy sa dugay nga debate natapos, ‘Namauli kami nga malipayon, kaming tulo. Ang usa malipayon tungod kay siya nakadangat sa Kristohanong pagtuo, ang duha tungod kay ilang naagak siya ngadto niana.’ Ang sinulat wala mag-angkon nga aktuwal kini nga hitabo; usa kini ka Apology, ni Minucius Felix. Apan kini naglarawan sa mga butang nga nahitabo tali sa mga tawong tinugahan.” (Church History 1—The First Advance: AD 29—500, ni John Foster, panid 46, 48) Oo, kining sugilanona nagpakita nga wala mawala ang impormal nga pagpamatuod tali sa nag-angkong mga Kristohanon niadtong panahona.
10 Mahitungod sa unang mga Kristohanon, kini ang giingon usab: “Padayong miuswag ang gidaghanon sa Kristohanong mga magtutuo, kinsa, bisan asa sila moadto, kon sa ilang naandang negosyo o tungod sa paglutos, miwali mahitungod kang Kristo . . . Tali niadtong mibuhat sa ilang negosyo, sa ilang propesyon, sa ilang adlaw-adlaw nga buluhaton, bisan unsa pang matang, ang mga paagi sa pagpakaylap sa ilang pagtuo, daghan kaayo.” (The Missionary Enterprise, ni Edwin Munsell Bliss, panid 14) Oo, ang unang mga magwawali sa Gingharian nagpamatuod sa pormal ug impormal nga paagi.
Pagpalandong Daan ug Pagpangandam
11. Unsay atong nakat-onan bahin sa paghatag ug pagtagad ni Jesus sa kamatuoran sa Diyos?
11 Sama kang Jesus ug sa iyang unang mga sumusunod, angay nga magpamatuod kita sa pormal ug sa impormal nga paagi. Ang paghimo niini sa epektibong paagi nagkinahanglan ug pagpamalandong daan ug pagpangandam. Aron makapamatuod sa impormal nga paagi o sa pagpanudlo, si Jesus migamit ingong pananglitan ug mga bata, pagkaon, sapot, ug mga langgam, bulak, mga kahimtang sa klima, ug trabaho. (Mateo 4:18, 19; 6:25-34; 11:16-19; 13:3-8; 16:1-4) Kita usab makagamit ug bisan unsang tema ingong basehanan sa pagkuha sa atensiyon sa kamatuoran sa Diyos.
12. Dihang magplanong mobiyahe, sa unsang paagi makapangandam ang usa alang sa impormal nga pagpamatuod?
12 Makapamatuod kita sa impormal nga paagi sa mga tawong nanglingkod sa mga parke, nanaglinya sa mga shopping center, ug uban pa. Sa Atenas, si Pablo nagwali “sa adlaw-adlaw diha sa tiyanggihan sa tanan niyang mahibalag.” (Buhat 17:17) Apan kinahanglang mangandam kita sa impormal nga pagpamatuod. Pananglitan, nagplano ka ba sa pagbiyahe pinaagig ayroplano, tren, o bus? Nan pagdalag Bibliya ug pila ka mga tract, magasin, o mga brosyur. Ang pagbasag Kristohanong publikasyon diha sa sakyanan o sa ubang dapit sagad makapukaw ug kolokabildo.
13. Iilustrar kon unsaon nimo sa paghatag ug pagpamatuod sa usa ka tigulang samtang nagabiyahe.
13 Hinungdanon ang mahigalaong introduksiyon. Ang librong Reasoning From the Scriptures may sugyot nga mga instroduksiyon nga magamit sa pag-alagad sa kanataran, apan ang uban niini mahimong himoong simple aron magamit sa impormal nga pagpamatuod. Pananglitan, kon nagbiyahe ka tapad sa usa ka tigulang, tingali moingon ka: “Akong ngalan mao si——. Dugay na akong nagpalandong bahin sa katuyoan sa kinabuhi. Ang kadaghanang mga tawo puliki kaayo sa pagpangitag kuwarta nga halos wala na silay panahon sa pagpalandong sa katuyoan sa kinabuhi. Apan, dihang magkatigulang na kita, atong mamatikdan nga mubo ra ang kinabuhi ug tingali mahibulong: ‘Mao ba lamang kini ang katuyoan sa kinabuhi?’ Nagtuo ka ba nga ang Diyos adunay katuyoan sa atong paglungtad?” Hatagig higayon aron makatubag. Dayon mahimong hisgotan nimo ang katuyoan sa Diyos alang sa katawhan ug komentohi ang dagkong mga butang nga gisaad diha sa Pinadayag 21:3, 4. Alang sa epektibong impormal nga pagpamatuod, imong magamit usab ang ubang maayong mga punto nga nakat-onan diha sa mga meting sa kongregasyon ug sa Kristohanong mga publikasyon.
Malaoman ang Maayong mga Resulta
14. Unsang kalamposan ang nahimo sa usa ka igsoong lalaki sa pagpamatuod sa impormal nga paagi sa panahon sa iyang pagbiyahe?
14 Sama kang Jesus ug sa iyang unang mga sumusunod, mahimong molampos usab kita dihang magpamatuod sa impormal nga paagi. Sa pag-ilustrar: Dihang nagsakay sa ayroplano, nakigsulti ang usa ka Saksi sa opisyal sa militar nga minyo sulod sa 20 ka tuig. Ang asawa niadtong tawhana migamit ug mga droga, misulay sa paghikog sa makadaghan, ug gustong makigbulag kaniya aron mouban sa lalaking mas bata. Dihang gihisgotan sa Saksi ang Kasulatanhong tabang nga iyang ginadawat gikan sa Ang Bantayanang Torre ug sa kaubang basahon niining Pagmata! misuskriber ang opisyal ug gusto nga ipadala ang magasin ngadto sa iyang asawa. Nakadungog ang ubang mga pasahero sa gisulti sa Saksi. Ang resulta? Aw, tungod sa pagpamatuod niadtong higayona, nakabaton siyag 22 ka suskrisyon ug nakapahimutang ug 45 ka magasin ug 21 ka libro!
15, 16. (a) Paghatag ug mga pananglitan sa malamposong impormal nga pagpamatuod sa kaubang mga trabahante. (b) Unsay gisugyot niining mga resultaha diha kanimo?
15 Unsay ikasulti bahin sa impormal nga pagpamatuod sa kauban sa trabaho? Nagbilin ang usa ka igsoong lalaki ug mga kopya sa atong mga basahon diha sa lawak-hugasan sa iyang trabahoan. Gibasa sa kauban sa trabaho ang magasin, gikontak ang igsoon, ug misuskriber niini. Midawat usab ang tawo sa pagtuon sa Bibliya ug mibulag sa iyang mahugaw nga kinabuhi, apan mogawas ang asawa sa balay sa higayong hisgotan ang ngalan sa Diyos. Dihang gustong moluwat ang tawo gikan sa lokal nga simbahan, miduaw ang ministro aron hisgotan kini, ang naabtan lamang mao ang asawa sa lalaki. Nakurat siya sa pagkakulang sa pagtuo sa ministro ug sa iyang kabakakan nga gisulti bahin sa mga Saksi ni Jehova, tungod kay nakita man niya nga nausab sa maayo ang iyang bana. Iyang gisultihan ang ministro: “Pagsulat lang ug sertipikasyon sa pag-undang alang kanako ug sa akong mga anak usab!” Sa ulahi, kining tawhana ug ang iyang asawa nahimong bawtismadong mga Saksi.
16 Sa katuigang milabay, usa ka igsoong lalaki nga nagpuyo na karon sa Tinipong Bansa mipamatuod sa impormal nga paagi sa kauban sa trabaho sa Inglaterra ug gidala ang batan-ong lalaki sa salida nga gihikay sa mga Saksi ni Jehova. Sa katloan ug usa ka tuig sa ulahi, ang igsoon nakadawat ning sulata: “Gusto ko lang isulti kanimo karon nga ang pagpamatuod nga imong gihimo [sa batan-ong lalaki] nabaslan, kay sa mga duha ka tuig sa ulahi nakaistorya niya ang laing igsoong lalaki, nakapahimutang ug mga magasin, ug gidala siya sa lokal nga Kingdom Hall . . . Siya nahimong Saksi, gibawtismohan sa 1959, ug karon usa na ka ansiano sa iyang kongregasyon . . . Sa mga 14 ka tuig sa ulahi ang iyang anak asawa nahimong Saksi ug gibawtismohan usab. Sa milabay ang duha ka tuig gibawtismohan ang iyang anak nga babaye ug karon usa na ka regular payunir sa North Derbyshire . . . Gikan nianang pagpamatuod nga imong gihimo balik didto sa Ashford, kadtong tawhana, ang iyang asawa ug anak nga babaye, usa ka ig-agaw ug iyang anak nga babaye, bana ug lima ka anak, ug usa ka anak sa anak nga babaye sa ig-agaw nahimong mga Saksi. . . . Buot kong mopasalamat kanimo, Ted, daghan kaayong salamat, kay ako mao ang tigtukod ug asiro, ug ang sugilanon nga akong giasoy maoy akong kaugalingong sugilanon bahin sa imong pagpamatuod kanako ug kon unsay miresulta niini.”
17. Unsang mga kahigayonan ang nabatonan sa mga batan-ong mga alagad ni Jehova alang sa impormal nga pagpamatuod?
17 Kamong mas bata pang mga alagad ni Jehova adunay maayo usab nga teritoryo sa pagpamatuod—ang mga imong kauban sa tunghaan ug mga magtutudlo. Nagapamatuod ka ba sa impormal nga paagi diha sa mga essay, oral nga mga pagrepaso, ug uban pa? Ingong tuborang materyal alang sa essay, ang usa ka taga Ecuador nga estudyante sa hayskol nga gidumalahan sa pagtuon migamit sa Enero 22, 1986, nga seryal sa hapin sa Pagmata! nga “Hiroshima—Nakalimtan na ba ang Pagtulon-an Niini?” Ang iyang sinulat nakadawat ug maayong komendasyon sa mga maghuhukom diha sa usa ka internasyonal nga bangga ug nakapremyog libreng biyahe ngadto sa Japan. Siyempre, ang pagdaog sa bangga dili mao ang katuyoan sa Kristohanong mga publikasyon. Apan kini nag-ilustrar sa bili sa maong literatura ug sa pagkaepektibo sa pagpamatuod sa kadayegan sa Diyos diha sa eskuylahan.
18. Unsay misangpot gikan sa paghatag ug mubong pagpamatuod sa usa ka tawo nga nangitag kuwartong kaabangan?
18 Tungod sa pinansiyal nga katarongan, gipaabangan sa igsoong babaye ang usa ka kuwarto. Dihang gitubag ang tawag sa telepono nga nangutana bahin niana, iyang gisultihan ang babayeng mitawag nga usa siya sa mga Saksi ni Jehova ug dili motugot ug mga buhat nga malaw-ay diha sa iyang panimalay. Kinahanglang mopaulig sayo ang mga bisita, ug ang mga lalaking bisita kinahanglang makita sa tanang panahon. Nagpanuko ang mitawag, dayon siya miingon: “Nagtuon ako sa tin-edyer pa ako, apan wala akoy interes niini. Busa mieskuyla ako sa kolehiyo.” Gipangutana kon gusto ba niyang mobalik sa pagtuon, siya mitubag, “Oo.” Sa ulahi, ang mitawag, ang iyang inahan, ug ang iyang igsoong babaye nahimong dedikadong mga alagad ni Jehova—tungod kay ang igsoong babaye mipamatuod sa impormal nga paagi.
19. Unsay miresulta sa impormal nga pagpamatuod diha sa usa ka babaye sa Bahamas?
19 Sa Bahamas gitulisok ang tanlag sa usa ka Katolikong babaye tungod kay wala na siya makasimba sulod sa lima ka tuig. Busa sa usa ka nag-ulang Dominggo sa buntag, mipaingon siya sa simbahan. Miabot ang tulo ka Saksi, ug gipasakay siya sa kotse—ug gisangyawan. Dihang nakaabot na sila sa simbahan, gusto niyang makadungog ug dugang pa ug mikuyog kanila samtang nagmaneho sila aron sa paghapit sa estudyante sa Bibliya. Miagi na usab sila sa simbahan, apan gusto pa siyang makadungog ug dugang pa ug busa miuban sa Kingdom Hall. Ang pakigpulong sa publiko naghisgot sa mismong tema nga gihisgotan diha sa kotse. Gisugdan ang pagtuon sa Bibliya, ug gibulagan ang lalaki nga iyang puyo-puyo (ang amahan sa iyang upat ka anak), ug gibawtismohan siya sa kombensiyon sa Nassau sa 1986. Pagkadako sa iyang kalipay nga may mipamatuod kaniya sa impormal nga paagi!
Padayon sa Pagsulti Bahin sa Pagkahari sa Diyos!
20. (a) Sa unsang paagi lantawon ang impormal nga pagpamatuod kon bahin sa pag-alagad sa kanataran? (b) Unsay gisugyot kon magpanuko ang usa sa paghatag ug impormal nga pagpamatuod?
20 Dili kapulihan ang regular nga pag-alagad sa kanataran sa mga Saksi ni Jehova sa pagpamatuod sa impormal nga paagi. Ang pagsangyaw sa balay-balay sa matin-aw Kasulatanhon ug epektibo. (Buhat 5:42; 20:20, 21) Bisan pa, mabungahon ang impormal nga pagpamatuod, ug angay nga makigbahin ang mga Saksi ni Jehova niana. Bisan haing dapit nga adunay tawo—mga paryente, kaubang mga estudyante, kauban sa trabaho, uban pa—dunay mga higayon sa pagsulti mahitungod sa himaya sa pagkahari sa Diyos. Busa ayaw pasanta sa kaulaw ug kahadlok. (Proverbio 29:25; 2 Timoteo 1:6-8) Kon magpanuko ka sa pagpamatuod sa impormal nga paagi, nganong dili mag-ampo sama sa gilutos nga mga disipulo ni Jesus? Sila mihangyo: “Jehova, . . . itugot sa imong ulipon ang pagsulti sa imong pulong nga walay kahadlok.” Gitubag ba ang ilang mga pag-ampo? Oo, kay “ang dapit nga ilang gitigoman nauyog; ug silang tanan napuno sa balaang espiritu ug nanagsulti sa pulong sa Diyos nga walay kahadlok.”—Buhat 4:23-31.
21. Unsay mopalihok sa tawo sa paghatag pamatuod ilalom sa tanang mga sirkumstansiya?
21 Busa, ugmara ang positibong tinamdan diha sa impormal nga pagpamatuod. Pasagding mapalihok ka sa gugma sa Diyos sa pagpamatuod ilalom sa tanang matang sa sirkumstansiya. Magmainiton, padayon sa pagpaagos sa kamatuoran sa tanang higayon. Oo, padayon sa pagsulti bahin sa himaya sa pagkahari sa Diyos.
Unsay Imong mga Tubag
◻ Unsay Kasulatanhong basehanan sa impormal nga pagpamatuod?
◻ Unsa ang pila ka paagi aron makapangandam alang sa impormal nga pagpamatuod?
◻ Kon magpamatuod kita sa impormal nga paagi, unsang mga resulta ang atong mapaabot?
◻ Unsaon nato paglantaw ang impormal nga pagpamatuod may kalabotan sa regular nga pag-alagad sa kanataran?
1. Una sa tanan, nganong gihatagan kita ni Jehova ug katakos sa pagsulti?
3. Palihog pagkutlog mga pananglitan sa impormal nga pagpamatuod may labot kang Jesu-Kristo?
[Hulagway sa panid 23]
Kon dili ka makagawas sa balay, nagapamatuod ka ba sama kang Pablo dihang nabilanggo?
[Hulagway sa panid 25]
Ang pagpangandam makahimo kanato sa paghatag ug impormal nga pamatuod sa epektibong paagi