Dayega si Jehova Pinaagig Di-Pormal nga Pagpamatuod
1 Ang maunongong mga alagad ni Jehova mangitag mga kahigayonan sa pagdayeg kaniya matag adlaw. (Sal. 96:2, 3; Heb. 13:15) Ang usa ka paagi nga atong mahimo kana mao ang pagpamatuod sa di-pormal nga paagi. Daghang magsisimba ni Jehova karon ang mapasalamaton nga dunay nagtanyag kanila sa mensahe sa Gingharian pinaagi sa di-pormal nga pagpamatuod.
2 Ang paghatag ug di-pormal nga pagpamatuod ngadto sa usa ka tawo sagad magbukas ug dalan alang sa uban sa pagpamati sa mensahe sa Gingharian. Pananglitan, ang panaghisgot ni Jesus uban sa babayeng Samarianhon didto sa atabay ni Jacob mitultol sa daghan nga mainteres sa maayong balita. (Juan 4:6-30, 39-42) Samtang sila si Pablo ug Silas nabilanggo sa Filipos, gisangyawan nila ang magbalantay sa bilanggoan, ug ang tibuok panimalay sa maong tawo midawat sa kamatuoran.—Buh. 16:25-34.
3 Mga Kahigayonan: Unsang mga kahigayonan ang imong mabatonan aron makapamatuod sa di-pormal nga paagi? Ang uban mihimo niana sa dihang mamalit, mosakay ug publikong mga sakyanan, o magpaabot sa doktor. Ang uban makasangyaw panahon sa tingpaniudto diha sa trabahoan o sa eskuylahan. Ang pagbutang lang sa usa sa atong mga publikasyon sa Bibliya diha sa dayag mahimong makaaghat sa uban sa pagpakisayod bahin sa atong tinuohan.—1 Ped. 3:15.
4 Kon Unsaon Pagsugod: Ang usa ka maulawon nga siyete-anyos nga batang babaye nakadungog diha sa tigom kon unsa ka hinungdanon nga mosangyaw ang tanan. Busa kon mouban siya sa iyang inahan sa pagpamalit, butangan niyag duha ka brosyur ang iyang bag. Samtang puliki ang iyang inahan diha sa palitanan, ang batang babaye mitanyag ug brosyur ngadto sa usa ka babaye, kinsa mahigalaong midawat niini. Sa dihang gipangutana siya kon sa unsang paagi siya nakabaton ug kaisog sa pagduol sa maong babaye, kining maulawon nga batang babaye mitubag: “Miingon lang ko, Andam, Pahimutang, Larga! Ug miduol ako!”
5 Aron makapamatuod sa di-pormal nga paagi, kitang tanan nagkinahanglan ug kasibot sama nianang iya sa batang babaye. Unsay makatabang kanato? Pag-ampo alang sa kaisog nga makasulti. (1 Tes. 2:2) Pag-andam ug pangutana o komento sa usa ka ulohan nga makapainteres nga imong magamit sa pagsugod ug panaghisgot. Dayon saligi nga panalanginan ni Jehova ang imong mga paningkamot.—Luc. 12:11, 12.
6 Ang pagpamatuod nga di-pormal ngadto sa mga tawo nga atong mahibalag matag adlaw magdalag kadayeganan kang Jehova ug makapalipay kanato. Kini mahimong makatabang ug usa ka tawo nga makasubay sa dalan paingon sa kinabuhing walay kataposan.