Dumalaha ang mga Pagtuon sa Bibliya sa Librong Mabuhing Walay Kataposan
1 Nga nagtumong sa librong Mabuhing Walay Kataposan, ang usa ka babaye mipahayag: “Sunod sa Bibliya mismo, akong nakaplagan kining libroha nga labing tukma ug makapalihok nga tipik sa literatura nga akong nabasa sukad!” Kitang tanan mouyon nga kining libroha maoy usa sa kinamaayohan nga napatik sukad sa pagbulig sa katawhan sa pagsabot sa Bibliya ug sa pagpalihok kanila nga mahimong aktibong mga magdadayeg kang Jehova.
2 Sa 1982, sa dihang ang librong Mabuhing Walay Kataposan giluwatan, 60,098 ka magmamantala nagdumalag 26,056 ka pagtuon sa Bibliya sa Pilipinas. Sa Nobyembre, 1992, 111,665 ka magmamantala nagdumalag 95,357 ka pagtuon sa Bibliya. Hangtod ning petsaha, 62 ka milyon nga kopya niining libroha ang napatik diha sa 115 ka pinulongan. Pagkadakong epekto ang nahimo niining libroha diha sa atong tibuok kalibotang buluhaton!
3 Ipahiluna ang mga Tumong: Kining talagsaong pagtubo maoy resulta sa panalangin ni Jehova ug sa kasibot sa iyang katawhan sa pag-abag sa mga tawo uban sa nagaluwas-kinabuhing mensahe sa Bibliya. (Roma 10:13-15; 1 Tim. 2:4) Atong giila ang pagkadinalian sa mga panahon ug ang panginahanglan sa kakugi sa pagmantala sa Gingharian sa Diyos.
4 Samtang ang organisasyon nagaabante, sa unsang paagi kita nagabuhat sa tinagsatagsa? Kita ba determinado nga makabatog bug-os nga pakig-ambit diha sa paghimog tinun-an nga buluhaton? Aron pagpalampos niini, kinahanglan tang magpahilunag personal nga mga tumong. Kita ba mas pa nga magmakugihon sa pagsundal sa interes? Nganong dili magpahilunag tumong sa pagsugod ug bag-ong pagtuon sa Bibliya sa bulan sa Abril?
5 Kinsa ang Makadumalag Pagtuon sa Bibliya? Daghang magmamantala gikan sa daghang kagikan may kangaya sa pagdumalag pagtuon sa Bibliya diha sa librong Mabuhing Walay Kataposan. Tungod sa yanong estilo niini, bisan ang bag-ohang mga magmamantala makaambit niining buluhatona. Dugang pa, daghan kanato nagtuon niini sa personal, busa sinati ta sa mga kaundan niini. Usa ka magmamantala nga walay pagtuon sa Bibliya sa wala pa maggamit sa librong Mabuhing Walay Kataposan misulat: “Ako adunay tulo ka pagtuon ug ang ikaupat andam nang masugdan. Dili ko ikabungat ang igong pagpasalamat tungod sa paghimo sa mga pagtuon sa Bibliya nga sayon ang pagdumala.”
6 Ang mga batan-on, usab, nagadumalag mga pagtuon diha sa librong Mabuhing Walay Kataposan. Usa ka batan-ong igsoong lalaki nagabilin sa libro diha sa iyang talad-sulatanan sa tunghaan. Kini nagbukas sa dalan alang sa pipila ka pagtuon sa Bibliya. Ang pipila ka batan-on misulay sa pagpakisayod sa mga ginikanan nga ilang nahinagbo diha sa balaybalay nga ministeryo alang sa pagtugot nga magtuon sa Bibliya uban sa ilang mga anak. Ang atong mga anak dili gayod batan-on pa kaayo nga mosulti bahin sa saad ni Jehova sa walay kataposang kinabuhi sa paraisong yuta.
7 Bisan batan-on o edaran, usa sa labing dakong mga kalipay nga mabatonan ni bisan kinsa diha sa ministeryo mao ang pagdumalag usa ka pagtuon sa Bibliya sa balay. Busa paampoa ang matag usa kanato alang sa tabang ni Jehova ug magpahimulos sa tanang kahigayonan sa pagmantala sa atong paglaom sa dayag. Gamitang librong Mabuhing Walay Kataposan sa pagbulig sa uban nga makakat-on kon sa unsang paagi sila mahimong makigbahin sa pagdayeg sa atong Diyos, si Jehova.—Sal. 148:12, 13.