Iwali ang Paagi sa Diyos sa Kalinaw ug Kasegurohan
1 Ang mga tawo nakahimog daghang laraw alang sa kalinaw ug kasegurohan, apan walay mausa niini nga nakatagbaw sa panginahanglan sa katawhan sa tibuok kalibotan. Bisan tuod relihiyoso, ang rasanhon, ug nasodnong mga pagdumot daw dagkong mga babag ngadto sa usa ka hilwas ug malinawong kalibotan, ang matuod nga mga Kristohanon nahibalo nga ang tinuod nga mga babag mao si Satanas nga Yawa ug ang pagdumili sa tawo sa pagpasakop ngadto kang Jehova nga Diyos.—Sal. 127:1; Jer. 8:9; 1 Juan 5:19.
2 Sa Abril, manlimbasog ta nga makabulig sa atong mga silingan nga makasabot nga ang paagi sa Diyos ngadto sa kalinaw ug kasegurohan mao ang bugtong paagi ug nga si Jehova ang may ultimang kasulbaran sa tanang suliran sa katawhan.
3 Gamitang Bag-ong Tracts: Ikapaambit ta kining makapalig-ong mensahe pinaagig paggamit sa bag-ong mga tracts nga giluwatan sa atong “Mga Tigdala sa Kahayag” Distritong Kombensiyon. Ang usa ka yanong pasundayag nagpakita kon unsaon paggamit ang Tract No. 19, Kini Bang Kalibotana Molungtad?, aron pagsugod ug panaghisgot ug motultol ngadto sa usa ka pagtuon sa Bibliya. Ang talagsaong katumanan sa tagna ni Jesus bahin sa kataposan niining kalibotana angayng magpatagad sa daghan.
4 Minilyon sa katawhan karong adlawa ang naluya, ug sila nangandoy sa usa ka panahon sa kahupayan ug sa matuod nga kalinaw ug kasegurohan. Kahupayan Alang sa Naluya (Tract No. 20) mahimong usa ka tinuod nga tinubdan sa pagdasig sa daghan.
5 Ang Tract No. 21, nga Magkalipay sa Kinabuhing Pamilyahanon, nagataganag praktikal nga tambag diha sa kon unsay mahimo sa pagpauswag sa kinabuhing pamilyahanon bisan karon samtang nagahulat sa usa ka kahibulongang kaugmaon diha sa bag-ong kalibotan sa Diyos.
6 Ang Tract No. 22 nagahatag ug madayganong tubag sa pangutanang Kinsa Gayod ang Nagamando sa Kalibotan? Kini nagasaysay kon nganong ang mga tawo naggamit sa labing mangilngig nga mga paagi sa pagsakit ug pagpamatay sa usag usa bisan pa sa tinguha sa kadaghanang tawo alang sa malinawon ug hilwas nga kinabuhi. Adunay daotang espiritung mga puwersa sa langitnong mga dapit, ug ang labing mahanasong panglimbong ni Satanas mao ang paghaylo sa daghan nga motuo nga siya ug ang iyang mga demonyo wala gayod maglungtad.
7 Pagsugod ug mga Pagtuon sa Bibliya: Ang usa ka pagtuon sa Bibliya masugdan uban sa usa ka tract, usa ka brosyur, usa ka magasin, o usa ka libro. Kon ang tagbalay aduna nay usa sa atong mga basahon, itanyag ang pagpasundayag kon sa unsang paagi kini magamit diha sa pagtuon sa Bibliya. Ang bag-ong tracts ug ang bag-ong brosyur nga Tinuod Bang May Pagtagad ang Diyos Kanato? maoy ekselenteng mga himan nga magamit sa pagsugod ug mga pagtuon sa Bibliya.
8 Ang lunsay nga kasegurohan moabot lamang gikan sa Maglalalang, si Jehova nga Diyos. Hinaot nga gamiton tag maayo ang mga tabang sa pagpanudlo nga atong nabatonan sa pagwali sa paagi sa Diyos sa kalinaw ug kasegurohan.—Isa. 2:3, 4.