Nindot Pagkadisenyong Bag-ong mga Tract!
1. Unsang mga materyal nga magamit sa ministeryo nga nindot ug bag-o nga pagkadisenyo?
1 Lima ka bag-ong tract ang giluwat sa 2013 nga “Ang Pulong sa Diyos Kamatuoran!” Distritong mga Kombensiyon. Dugang pa, ang Kingdom News Num. 38, nga nag-ulohang “Mabuhi ba Gyod Pag-usab ang mga Patay?” mao ang ikaunom niini nga mga tract. Kining tanang tract nindot ug bag-og disenyo. Nganong gibag-o ang porma niini? Dihang magtanyag kita niini sa balay ug balay, unsaon nato paggamit ang mga bahin sa bag-ong disenyo niini?
2. Unsay katuyoan sa bag-ong disenyo?
2 Nganong Gibag-o ang Disenyo?: Ang epektibong mga presentasyon sa pagsangyaw sagad naglakip niining upat ka paagi: (1) Pangutan-a ang opinyon sa tagbalay aron makasugod ug panag-estorya. (2) Paghisgot ug teksto. (3) Hatagig literatura ang tagbalay nga mabasa. (4) Pagpatunghag pangutana nga tubagon sa sunod higayon, ug paghimog kahikayan sa pagbalikduaw. Tungod niining bag-ong disenyo sa mga tract, dili kita maglisod sa pagsunod niining upat ka paagi.
3. Unsaon nato pagtanyag ang usa sa bag-ong mga tract diha sa ministeryo?
3 Kon Unsaon Kini Paggamit: (1) Human mangatahoran, ipakita sa tagbalay ang makapainteres nga mga pangutana sa atubangan sa tract, ug pangayoa ang iyang opinyon. (2) Paklia ang tract, ug hisgoti ang “Kon Unsay Giingon sa Bibliya.” Basaha ang teksto direkta sa Bibliya kon itugot sa panahon. Kon dunay panahon ang tagbalay, hisgoti ang “Kon Unsay Kaayohan Niini Alang Kanimo.” (3) Hatagi siyag tract, ug dasiga siya sa pagtapos ug basa niini sa iyang kombenyenteng panahon. (4) Una ka pa molakaw, ipabasa kaniya ang pangutana sa likod ubos sa “Hunahunaa Kini” ug pagsabot kamo kanus-a ka mobalik sa paghisgot sa tubag sa Bibliya.
4. Kon interesado ang tagbalay, unsay atong isulti diha sa pagbalikduaw?
4 Ang pagbalikduaw sayon usab. Basaha lang ang gikutlo nga mga teksto sa likod sa tract sa pagtubag sa pangutana nga imong gisukna sa miaging pagduaw. Una ka pa molakaw, ipakita ang hulagway sa brosyur nga Maayong Balita ug ang gihisgotang leksiyon nga dunay dugang impormasyon bahin sa ulohan, ug ihatag ang brosyur. Kon iya kining dawaton, pakigsabot sa paghisgot niini sa sunod nimong pagduaw. Ikaw nakasugod na ug pagtuon sa Bibliya! O imbes kini nga brosyur ang ihatag, mahimong laing tract ang ihatag ug pakigsabot nga mobalik ka aron sa paghisgot niini.
5. Unsa ka bililhon ang mga tract diha sa atong ministeryo?
5 Kapin na sa 130 ka tuig nga gigamit ang mga tract diha sa atong ministeryo. Bisag ang gidak-on ug porma niini lainlain, kini epektibo kaayong gamit sa pagsangyaw. Hinaot atong pahimuslan kining bag-ong disenyo aron padayong mapakaylap ang kahibalo sa Bibliya sa tibuok kalibotan.—Prov. 15:7a.