Nagagamit Ka ba ug Tukmang Pasiuna?
1 Sa dihang buksan sa tagbalay ang pultahan, kita giatubang sa hagit sa pagpaila sa mensahe sa Gingharian diha sa tukmang paagi. Sulod sa sunod napulo ka segundos, ang tagbalay sagad modesider kon siya ba magpatalinghog o mopapahawa sa Saksi. Hibalo kita nga ang mensahe nga atong dala importante kaayo, ug gusto ta gayong motabang niadtong atong ikasulti. (Roma 10:14) Pero ato lamang mahimo kini kon ang atong pasiuna makapatagad sa tagbalay.—Col. 4:6; itandi ang Proverbio 25:11.
2 Sa pagtagad sa pagkatukma sa atong pasiuna, kinahanglang suknaon ta ang atong kaugalingon kon kaha atong gipasagdan ang paggamit nga sublisubli sa samang introduksiyon tungod kay kana daling mahinumdoman o ganahan kita niana. Aduna bay mga pulong sa atong pasiuna nga basin magpatunghag pagpihigpihig diha sa pipila ka teritoryo? Kana ba espisipiko gayod aron pukawon ang interes gikan sa sinugdan, o magpatugot ba kana sa tagbalay nga pahunongon ang panaghisgot sa dili pa gani kita makahisgot sa atong ulohan? Sa unsang paagi atong mapukaw ang interes sa tagbalay nga sayo pa sa panaghisgot? Ang epektibong mga introduksiyon dili kay motungha lamang. Kini nagakinahanglan ug inantigong pangandam ug regular nga mga pagbansay.
PAGPILI SA HUSTONG PASIUNA
3 Sugod sa panid 9 sa librong Nangatarongan, aduna ing ekselenteng seksiyon bahin sa “Mga Pasiuna nga Gamiton sa Ministeryo sa Kanataran.” Ang pagsubli sa unang mga pulong niini nga seksiyon mahimong mapuslanon. Kita gipahinumdoman nga ang lainlaing mga paagi gikinahanglan alang sa lainlaing matang sa mga teritoryo, mga tawo, ug mga kahimtang.
4 Samtang ipaila mo ang mensahe sa Gingharian, imo bang ikapakita kon sa unsang paagi makaayo kana sa tagbalay sa personal nga paagi? Ingong ehemplo, tagda ang unang pasiuna ubos sa “Krimen/Kaluwasan” sa panid 10 sa librong Nangatarongan. Diha sa unang pulong, ang usa ka ulohan nga hinungdanon kaayo ngadto sa tagbalay gipaila. Ang panaghisgot nga nagasunod nagabutyag sa luna sa Gingharian sa pagwagtang sa krimen.
5 Unsaon ta man sa pagwagtang sa mga babag ngadto sa kahinangop sa tagbalay sa pagpaminaw? Ang mga ulohan sa mga panid 14 ug 15 sa librong Nangatarongan nagtanyag ug ekselenteng mga sugyot. Pananglitan, palandonga kon unsaon mo sa paggamit ang pasiuna ubos sa “Sa Dihang Moingon ang Kadaghanan: ‘Aduna Akoy Kaugalingong Relihiyon.’” Magamit mo ba kining paagiha diha sa inyong teritoryo?
6 Sa unsang paagi atong ikapakita ang tinuod nga interes sa tagbalay? (Mar. 6:34) Ang usa ka mahigalaong pahiyom makabulig. Ang pagkamahigalaon mopadani sa uban. Ang atong interes ikapakita usab pinaagig pagpalig-on kaniya sa paghimog iyang mga komento. Ang usa ka panig-ingnan niini makita diha sa ikaduhang pasiuna ubos sa “Gingharian” sa panid 12. Gigamit mo ba kini? Sagad ang mga tawo moangay nga makahatag sa ilang opinyon, ug sila mapakisayron kon unsay imong ikapangutana. Apan kita kinahanglang maminaw sa ilang tubag ug dayon ipahiangay ang atong presentasyon aron makakuhag bentaha sa atong nahibaloan sa ilang mga panghunahuna.
MAGMAALISTO SA MGA KAHIMTANG
7 Sa moduol ka ug ganghaan, panid-i ang mga palibot. Aduna bay mga dulaan diha sa tugkaran, mga seninang gihayhay, relihiyosong mga butang diha sa ganghaan, ubp.? Sa moanha sa ganghaan ang tagbalay, lalaki ba o babaye ang mosugat nato, usa nga batan-on o tigulang, usa ka inahan o amahan, o usa ka bata? Ang bisan hain niining puntoha makaabag kanato sa pagpili ug haom nga pasiuna nga ipatukma sa mga panginahanglan sa maong tawo nga atong mahibalag.
8 Ang mga pasiuna diha sa librong Nangatarongan nasulayan na ug nakaplagan nga malamposon. Nganong dili manlimbasog nga gamiton kini diha sa inyong teritoryo? Lagmit nga imong makaplagan nga uban sa maayong pangandam, ang imong mga pasiuna mahimong mas epektibo ug ang imong ministeryo mas malamposon.—Mat. 13:18-23.