Kon Unsaon Pagpauswag ang mga Katakos sa Pagpakigsulti

SA KASAGARAN dili ka ba malisdan sa pagpakigsulti sa uban? Alang sa daghan, ang paghunahuna lang gani nga makigsulti, ilabina sa tawo nga dili nila kaila, makapahadlok na. Kanang mga tawhana basin maulawon. Sila tingali mahibulong: ‘Unsay akong ipakigsulti? Unsaon nako pagsugod ang panaghisgot? Unsaon nako pagpadayon kana?’ Ang masaligon, mahigalaong mga tawo basin may hilig nga sila na lang kanunay ang mosulti. Ang ilang suliran tingali mao ang pagpasulti sa uban ug ang pagkat-on nga maminaw sa kon unsay isulti. Busa kitang tanan, maulawon man o mahigalaon, kinahanglang padayong mag-ugmad sa arte sa pagpakigsulti.

Sugdi sa Panimalay

Aron molambo ang imong katakos sa pagpakigsulti, nganong dili sugdan sa panimalay? Ang makapalig-ong pagpakigsulti makaamot ug dako sa kalipay sa pamilya.

Ang pangunang yawi sa pagpakigsulti sa ingon mao ang dulot nga pagkamatinagdanon sa usag usa. (Deut. 6:​6, 7; Prov. 4:​1-4) Kon kita matinagdanon, kita makigsulti, ug kita maminaw kon dunay buot isulti ang laing tawo. Ang laing importanteng yawi mao ang pagkaadunay bililhong isulti. Kon kita adunay regular nga programa sa personal nga pagbasa ug pagtuon sa Bibliya, daghan gayod unya ang atong ikapaambit. Ang maalamong paggamit sa pulyeto nga Pagsusi sa Kasulatan sa Adlaw-Adlaw makasugnib ug panaghisgot. Nianang adlawa, basin duna kitay sadya nga kasinatian sa pag-alagad sa kanataran. Mahimong nakabasa kitag impormatibo o kahimut-anang impormasyon. Himoon gayod natong batasan nga ipaambit kini panahon sa makapadasig nga sultihanay sa pamilya. Makatabang usab kini kanato sa pagpakigsulti sa mga tawo sa gawas sa pamilya.

Pagpakigsulti sa Usa ka Estranyo

Daghang tawo magpanuko nga maoy mouna sa pagpakigsulti sa tawo nga dili nila kaila. Apan tungod sa gugma alang sa Diyos ug sa ilang silingan, ang mga Saksi ni Jehova maningkamot pag-ayo nga makakat-on kon unsaon pagpakigsulti aron ipaambit ang mga kamatuoran sa Bibliya ngadto sa uban. Unsay makatabang nimo aron mouswag niining bahina?

Ang prinsipyong gihisgotan sa Filipos 2:4 maoy bililhon. Kita gidasig nga magtagad, “dili lamang sa personal nga interes sa mga butang labot sa [atong] kaugalingon, kondili sa personal nga interes usab sa uban.” Hunahunaa kana niining paagiha: Kon wala pa nimo mahimamat kanang tawhana kaniadto, ikaw iyang isipon nga usa ka estranyo. Unsaon man nimo nga siya mobating relaks? Ang mainitong pahiyom ug mahigalaong timbaya makatabang. Apan duna pay dugang tagdon.

Mahimong nabalda nimo ang iyang mga gihunahuna. Kon ikaw maningkamot sa pagpakighisgot kaniya kon unsay anaa sa imong hunahuna nga dili magtagad kon unsay anaa sa iyang hunahuna, mosanong kaha siya nga mauyonon? Unsay gihimo ni Jesus sa dihang nahimamat niya ang usa ka babaye sa usa ka atabay sa Samaria? Naghunahuna ang babaye sa pagkalos ug tubig. Gisugdan ni Jesus ang iyang pagpakigsulti kaniya pinasukad nianang puntoha, ug sa wala madugay kini nahimong makapadasig nga panaghisgot sa espirituwal.​—Juan 4:7-26.

Kon ikaw mapaniiron, makasabot ka usab kon unsay gihunahuna sa mga tawo. Malipayon o masulub-on bang tan-awon ang maong tawo? Siya ba edaran na, o maluyahon? May nakita ka bang ilhanan nga may mga bata diha sa panimalay? Haruhay bang tan-awon o kakha-tuhak ang pangabuhi sa maong tawo? Ang mga dayandayan sa panimalay o personal nga mga alahas nagbutyag ba ug relihiyosong tinuohan? Kon ang imong pagtimbaya maglambigit nianang mga puntoha, ang tawo mahimong mag-isip nga ikaw duna diay interes nga sama sa iya.

Kon ang tagbalay dili nimo makita sa personal, nga basin madungog lang nimo ang iyang tingog luyo sa gisirad-ang pultahan, unsa kahay imong ikahinapos? Ang tawo mahimong nagkinabuhi sa kahadlok. Magamit mo ba kanang impormasyona aron masugdan ang pagpakigsulti diha sa pultahan?

Sa ubang mga dapit mahimong ikaestorya nimo ang usa ka tawo pinaagi sa pagsulti kaniya bahin sa imong kaugalingon​—kon kinsa ka, kon nganong mibutho ka sa iyang pultahan, kon nganong nagtuo ka sa Diyos, kon nganong nagsugod ka pagtuon sa Bibliya, ug kon sa unsang paagi ang Bibliya nakatabang nimo. (Buh. 26:4-23) Siyempre, kinahanglang himoon kini nga maalamon nga may tin-awng tumong diha sa kaisipan. Kini, sa baylo, mopalihok tingali sa tawo sa pagsulti bahin sa iyang kaugalingon ug kon unsay iyang panglantaw sa mga butang.

Sa ubang mga kultura, ang pagkamaabiabihon ngadto sa mga estranyo maoy naandan. Tingali pasudlon ug palingkoron ka dayon sa mga tawo. Sa dihang makalingkod ka na, kon maluloton kang mangomosta bahin sa kahimtang sa pamilya ug sinserong maminaw sa ilang tubag, ang tagbalay mahimong maminaw usab sa imong isulti. Ang ubang mga tawo magpakita pa ganig mas mainitong kaikag sa mga bisita, busa ang pasiunang mga pagtimbaya tingali dugay. Sa lakat niana, makaplagan nilang duna silay mga butang nga inyong gikausahan. Kini mosangpot sa mapuslanong espirituwal nga panaghisgot.

Unsa na man kon may daghang tawo sa imong dapit nga nagsultig mga pinulongan nga lahi sa imoha? Unsaon man nimo pagsangyaw nianang mga tawhana? Kon makakat-on kag bisan yanong mga timbaya sa pipila nianang mga pinulongana, masabtan sa mga tawo nga ikaw interesado kanila. Kini mahimong magbukas sa dugang panaghisgot.

Kon Unsaon Pagpadayon ang Pagpakigsulti

Aron magpadayon ang pagpakigsulti, magmaikagon sa mga hunahuna sa laing tawo. Dasiga siya sa pagpahayag sa iyang kaugalingon kon siya andam sa pagbuhat sa ingon. Makatabang ang mga pangutana nga maayong pagkapili. Ang punto de bista nga mga pangutana labing maayo kay sagad kining magpatunghag tubag nga dili lang oo o dili. Pananglitan, human mahisgoti ang usa ka suliran diha sa lokal, ikaw makapangutana: “Sa imong hunahuna unsay nakaingon niining kahimtanga?” o “Sa imong hunahuna unsay makasulbad niini?”

Kon ikaw mangutana, paminaw ug maayo sa tubag. Ipakita ang imong tiunay nga interes pinaagi sa pagtubag, pagyango, o pagkompas. Pahumana siya sa pagsulti. Uban ang bukas nga hunahuna, tagda ang iyang gisulti. “Magmaabtik sa pagpaminaw, magmahinay sa pagsulti.” (Sant. 1:19) Inigtubag nimo, ipakita nga naminaw ka gayod sa iyang gisulti.

Apan, matikdi nga dili tanang tawo motubag sa imong mga pangutana. Gikan sa pipila ka tawo mahimong balosan ka lamag naiknat nga kilay o usa ka pahiyom. Ang uban moingon lamag oo o dili. Ayawg kaluya. Magmapailobon. Ayaw ipugos ang pagpakigsulti. Kon ang tawo andam maminaw, pahimusli ang kahigayonan nga ipaambit ang makapalig-ong Kasulatanhong mga hunahuna. Ngadtongadto, ikaw mahimong isipon sa tawo nga usa ka higala. Dayon tingali andam na niyang ipaambit ang iyang mga hunahuna nga mas mapadayganon.

Samtang makigsulti ka sa mga tawo, hinumdomi nga mobalik ka pa. Kon ang tawo magpatunghag daghang pangutana, tubaga ang pipila niini apan ibilin ang usa o duha alang sa sunod ninyong panaghisgot. Ingna siya nga ikaw manukiduki, ug dayon ipaambit kaniya ang mga resulta. Kon siya walay mga pangutana, mahimong taposon mo ang imong pagpakigsulti pinaagig usa ka pangutana nga imong gituohang makapainteres kaniya. Ingna siya nga hisgotan kana sa sunod duaw. Ang daghang ideya makaplagan sa basahong Nangatarongan Pinasukad sa Kasulatan, sa brosyur nga Unsay Gikinahanglan sa Diyos Kanato?, ug sa ulahing mga isyu sa Ang Bantayanang Torre ug Pagmata!

Sa Dihang Kauban sa mga Isigkamagtutuo

Sa dihang makahimamat kag usa sa mga Saksi ni Jehova sa unang higayon, mouna ka ba sa pag-ilaila kaniya? O magtindog ka lang nga way timik? Ang gugma alang sa atong mga igsoon angayng mopalihok nato nga gustong makig-ilaila kanila. (Juan 13:35) Unsaon man nimo pagsugod? Mahimong ipaila lamang nimo ang imong ngalan ug mangutana sa iyang ngalan. Ang pagpangutana kaniya kon sa unsang paagi siya nakakat-on sa kamatuoran sagad mosangpot sa makapaikag nga pagpakigsulti ug motabang ninyo nga magkailhanay. Bisan kon ang imong isulti dili larinong pagkasulti, ang imong pagpaningkamot magpadayag ngadto sa laing tawo nga may kaikag ka kaniya, ug kana ang importante.

Unsay makatampo sa makahuloganong pagpakigsulti uban sa usa ka membro sa imong kongregasyon? Ipakita ang tiunay nga interes ngadto sa tawo ug sa iyang pamilya. Mao pa bay pagkahuman sa tigom? Komentohi ang mga ideya nga nadunggan nimong makatabang. Mapuslanon kini para ninyong duha. Mahimong hisgotan mo ang usa ka punto nga makapaikag gikan sa bag-ong isyu sa Ang Bantayanang Torre o Pagmata! Kinahanglang dili kini himoon aron magpasiatab o magtigi sa kahibalo. Buhata kini aron ipaambit ang butang nga nakaplagan mong makapaikag pag-ayo. Mahimong hisgotan mo ang bahin sa asaynment nga tingali nadawat sa usa kaninyo diha sa Teokratikanhong Tunghaan sa Ministeryo ug dayon magbayloay ug mga ideya kon unsaon kini paghimo. Mahimong ipaambit mo usab ang mga kasinatian gikan sa ministeryo sa kanataran.

Siyempre, ang atong kaikag sa mga tawo sagad mosangpot sa pagpakigsulti bahin sa mga tawo​—sa mga butang nga ilang gisulti ug gihimo. Ang pasiaw mahimong bahin usab sa atong pagpakigsulti. Makapalig-on ba ang atong isulti? Kon isilsil nato sa kasingkasing ang tambag sa Pulong sa Diyos ug mapalihok sa diyosnong gugma, ang atong pagpakigsulti tino gayong makapalig-on.​—Prov. 16:​27, 28; Efe. 4:​25, 29; 5:​3, 4; Sant. 1:26.

Sa dili pa kita makigbahin sa ministeryo sa kanataran, kita mangandam. Nganong dili mangandam ug makapainteres nga impormasyon nga ikapaambit sa pagpakigsulti sa mga higala? Sa dihang ikaw makabasa o makadungog ug makapaikag nga mga balita, hinumdomi ang mga punto nga buot mong ipaambit sa uban. Sa ngadtongadto, daghan ka na unyag kapilian. Ang pagbuhat niini makapaarang nimo nga makapalapad sa imong hunahuna gawas pa sa paghimo lamag mga komento bahin sa adlaw-adlaw nga rutina sa kinabuhi. Labaw sa tanan, hinaot nga ang imong sinultihan maghatag pamatuod kon unsa ka bililhon ang Pulong sa Diyos alang kanimo!​—Sal. 139:17.