Pagpauswag sa Atong Kahanas sa Ministeryo—Pagsugod ug Panaghisgot Aron Makasangyaw sa Di Pormal

Kon Nganong Hinungdanon: Daghang tawo dili nato maabtan sa dihang kita mamalaybalay. Pero basig makauban nato sila sa publikong mga sakyanan, sa klinika, dihang break time sa trabaho o klase, ug sa uban pang mga kahimtang. Buot ni Jehova nga ang tanan makadungog sa mensahe sa Gingharian. (1 Tim. 2:3, 4) Kasagaran, kitay angayng mouna sa pag-estorya aron makasangyaw ta.

Kon Unsaon Kini Paghimo:

Magmapilion. Siya ba mahigalaon ug ganahang makig-estorya? Haom ba sa kahimtang nga mag-estorya mo? Ang ubang magmamantala motan-aw sa tawo ug dayon mopahiyom. Kon ang tawo mobalos ganig pahiyom, makig-estorya sila.
Pag-ampo kadiyot kon mahadlok kang makig-estorya.—Neh. 2:4; Buh. 4:29.
Sugdi ang estorya sa simpleng mga pulong, sama sa pagtimbaya. Sa dihang si Jesus nakig-estorya sa babayeng Samarianhon, wala dayon siya maghisgot sa Gingharian. (Juan 4:7) Mahimo pod nimong dayegon ang tawo aron magkaestorya mo, sama sa: “Buotan kaayo imong mga anak!” Puwede sab kang mangutana: “Nakakita ka sa balita gabii?”
Samtang nag-estorya mo, pangitag kahigayonan nga makasangyaw ka, pero ayaw pagdali. Hulata ang saktong panahon sa paghisgot sa maayong balita. Tingali mosulti kag makapainteres nga butang nga makaaghat niya sa pagpangutana. Pananglitan, kon pamilya ang inyong topiko, makaingon ka, “Naa koy nabasahan nga maayong tambag sa pagpadako sa mga anak.” Kon balita ang inyong gihisgotan, makaingon ka, “Abi nimo, naa koy nabasahang maayong balita.” Ayawg kaguol kon maputol ang inyong pag-estorya ug wala ka kasangyaw.
Pagdalag tract o ubang basahon nga ikatanyag nimo kon dunay interesado.

Sulayi Kini Karong Bulana:

Bisag kas-a lang kada semana, sulayi nga makasugod kag panag-estorya aron makasangyaw sa di pormal.