DIHANG MAGSUGOD UG PANAG-ESTORYA
LEKSIYON 2
Natural
Prinsipyo: “Ang pulong nga gisulti sa hustong panahon—maayo gyod kaayo!”—Prov. 15:23.
Ang Gihimo ni Felipe
1. Tan-awa ang VIDEO, o basaha ang Buhat 8:30, 31. Dayon konsideraha ang mosunod nga mga pangutana:
Giunsa pagsugod ni Felipe ang panag-estorya?
Nganong natural ni nga paagi sa pagsugod ug panag-estorya ug sa pagtudlo sa kamatuoran sa maong tawo?
Unsay Atong Makat-onan Kang Felipe?
2. Kon himoon natong natural ang panag-estorya, lagmit mahimong komportable ang atong kaestorya ug basin maminaw siya sa atong mensahe.
Sundoga si Felipe
3. Maniid. Ang ekspresyon sa nawong ug linihokan sa usa ka tawo daghag ikasulti bahin niya. Sa imong tan-aw, andam ba siyang makig-estorya nimo? Puwede nimong sugdan ang paghisgot bahin sa Bibliya pinaagi sa pagpangutana, “Nahibalo ba ka nga . . . ?” Ayawg pamugos sa pagpakig-estorya sa tawong dili gustong makig-estorya.
4. Magpailob. Ayaw unag hisgoti ang bahin sa Bibliya. Hulata ang hustong panahon nga mahisgotan nimo ni sa natural nga paagi. Usahay, nagpasabot tingali ni nga kinahanglan kang maghulat sa sunod ninyong panag-estorya.
5. Mag-adjust. Ang imong kaestorya maghisgot tingali ug topiko nga lahi kay sa imong gidahom. Busa mahimong andam sa paghisgot ug topiko nga makapainteres sa imong kaestorya, bisag magpasabot na nga maghisgot kag topiko sa Bibliya nga lahi kay sa imong gihunahuna.