Pagtanyag sa Maayong Balita—Uban ang Pagkamailahon
1 Usa ka dinasig nga proverbio nag-ingon: “Siya nga nagabantay sa pagkamailahon makakaplag ug kaayohan.” (Prov. 19:8) Ang kaalam niini nga mga pulong sagad namatud-ang tinuod diha sa atong buluhatong pagsangyaw. Pananglitan, pinaagi sa paggamit ug pagkamailahon ug taktiko, gihimo sa daghang magmamantala ang mga pagtutol nga mga kahigayonan alang sa dugang pagpamatuod. Sa unsang paagi kini mahimo?
PAGDUMALA SA MGA PAGTUTOL
2 Sagad natong ikahibalag ang mga tawong moingon, “Ako puliki.” Ang tagbalay tinuod ba gayong puliki, o siya miingon lang kaha niini aron dili malangkit sa tag-as nga panaghisgot? Ang pagkamailahon gikinahanglan. Kon siya daw dili gayod puliki, atong sulayan nga mabuntog ang iyang pagtutol. Kita makaingon, “Nan akong mub-on lang.” Human niana, kita makapamubo sa buot natong ihisgot, nga gihinumdoman ang giuyonang mub-on ang panaghisgot. Ingong sangpotanan sa atong konsiderasyon ug makapukaw-interes nga mga komento, ang tawo basin gani magpaila ug tinguha sa padayong panaghisgot dihadiha mismo.
3 Pananglit puliki gayod ang usa nga imong giduol. Kon kita moinsister o mamugos, basin kita makabiyag di-maayong impresyon. Kon ang usa ka tagbalay moanha sa pultahan nga may bitbit nga gamit sa pagluto ug atong nasimhot ang pagkaong giandam, siya gayod malagmit puliki. Busa ang pagkamailahon ug maayong panghukom gikinahanglan. Dili pagkamahunahunaon nga ipugos ang panaghisgot nianang panahona. Labing maayo pa nga hatagan na lamag usa ka ‘tract’ ang tagbalay ug mosugyot nga moduaw pag-usab sa ulahi. Kini magbiyag usa ka maayong impresyon, ug usa ka maayong pamatuod ang hayan ikahatag sa sunod nga panahong moduaw ang usa ka Saksi.
PAGSANONG SA TARAS SA MAONG TAWO
4 May okasyong ikahibalag nato ang mga tawong pugoso dihang kita moduaw kanila. Unsay atong buhaton niining hitaboa? Ang Proverbio 17:27 mitambag: “Ang tawong may salabotan maoy mabugnaw sa espiritu.” Pagkamaayo kaayong tambag! Ang malumong tingog nga nagapahayag ug kabalaka kasagarang magparelaks sa maong tawo. Dugang pa, kon sa taktiko atong madala siyang mosulti sa iyang kaugalingon sa usa ka butang nga maglambigit kaniya, siya mahimong dili kaayo mapanalipdanon. Bisan kon iyang pahunongon dayon ang panaghisgot, posible nga ang atong malumong tubag magbiya kaniya diha sa usa ka mas maayong panghunahuna ngadto sa buluhaton sa mga Saksi ni Jehova. Kana maayo unyang kahimoan. Siyempre, kon ang usa ka tagbalay maglagot ug masuko, labing maayo nga mobiyang hilom ug tingali mosulay sa pagpamatuod kaniya sa sunod nga higayon.
5 Unya dunay mga tawo kinsa, bisan tuod malantugion, hayan matim-oson. Niini nga mga kahimtang, kini lagmit usa ka tinuod nga pagsulay sa atong pagkamapailobon nga ipadayon ang panaghisgot uban kanila. Apan kon kita masabtanon, kita dili dayon magkanayon nga ang tagbalay dili interesado tungod kay siya lig-ong nagapahayag sa lahing panglantaw. Basin buot natong mosukna ug mataktikanhong mga pangutana sa pagpaningkamot nga matino kon nganong siya nagatuo niana ug unya ipakita kaniya ang giingon sa Bibliya maylabot sa gihisgotan. (Prov. 20:5) Gibase sa iyang pagsanong, kita makadesider kon maayo bang ipadayon ang panaghisgot.
6 Ang usa ka mailahong magmamantala nagaamgo nga ang panahon ug mga kahimtang sagad nagausab sa tinamdan sa tagbalay ngadto sa mensahe sa Gingharian. Ang iyang pagsanong basin lahi na gayod sa sunod natong pagduaw. Kita angayng mag-amping nga dili magdahom nga atong makuha ang negatibong pagsanong tungod lang sa paagi sa pagsanong sa tagbalay sa miaging higayon nga kita miduaw kaniya.
7 Ang pagdesider kon ipadayon ba ang usa ka panaghisgot dili sayon. Apan, pinaagi sa pag-ugmad sa arte sa pagpanudlo, kita mahimong mas epektibo sa pagtanyag sa maayong balita uban ang pagkamailahon, samtang nagalantaw kita kang Jehova sa pagpanalangin sa atong mga paningkamot.—1 Cor. 3:6; Tito 1:9.