Pagpauswag sa Atong Kahanas sa Ministeryo—Pagtubag sa mga Tigsumpo sa Panaghisgot

Kon Nganong Hinungdanon: Pananglitan nahibalo ka nga may taliabot nga katalagman. Mamatay ang mga tawo kon dili sila moikyas. Adtoon nimo ang usa ka silingan aron pasidan-an siya, pero moingon siya nga daghan siyag trabaho. Siyempre, dili dayon ka mawad-ag interes sa pagtabang niya! Daghan sa atong teritoryo dili mamati kanato kay wala sila mahibalo nga ang atong mensahe makaluwas ug kinabuhi. Sa atong pagduaw, tingali puliki sila. (Mat. 24:37-39) O basin nakadungog silag bakak nga impormasyon bahin kanato. (Mat. 11:18, 19) Lagmit nagtuo sila nga pareho ra ta sa ubang relihiyon nga dili maayog binuhatan. (2 Ped. 2:1, 2) Kon ang tagbalay dili interesado sa sinugdan, dili ta dayon mawad-ag interes sa pagtabang nila.

Kon Unsaon Paghimo Kini:

Una mosangyaw, palandonga ang mga tigsumpo sa panaghisgot nga posible nimong maatubang ug kon unsaon kana pagtubag.
Kon ang tagbalay mopahayag ug pagtutol, paningkamoting mapadayon ang panaghisgot sa malumong paagi. Mahimo nimo siyang hatagag komendasyon. Pananglitan, kon moingon siya nga duna na siyay relihiyon, makatubag ka, “Maayo kay relihiyoso ka. Ganahan kong makig-estorya ug mga tawong sama nimo.” Usahay, makapadayon ka sa pagsangyaw kon imong sabton ang ilang pagbati o kahimtang. Pananglitan, kon siya moingon nga puliki siya, makaingon ka: “Nasabtan ti ka. Pero sa di pa ko mobiya, may ihatag ko nimo.” Lain pa, kon ang tagbalay moingon nga dili siya interesado, makapangutana ka: “Sa unsa ka dili interesado, sa Bibliya, o sa relihiyon?”
Gamita ang maayong panghukom. Hinumdomi nga dili pugson ni Jehova ang mga tawo sa pagpamati. (Deut. 30:19) Ang matag usa adunay tulubagon kang Jehova. (Gal. 6:5) Kon mobalibad gyod ang tagbalay, labing maayo nga mobiya na lang ta. Kon sabton nato ang iyang pagbati, basin maminaw na siya sa sunod nga magmamantala nga makasangyaw niya.—1 Ped. 3:15.

Sulayi Kini Karong Bulana:

Human makaatubang ug tigsumpo sa panaghisgot, hisgoti uban sa imong partner kon unsay mas maayong paagi sa pagtubag niadto.