Tabangi ang Tagbalay sa Pagpangatarongan
1. Unsay labing maayong paagi sa pagsangyaw?
1 Unsay mas epektibong paagi sa pagsangyaw: ang pagkadogmatiko o kanang makatabang sa tagbalay sa pagpangatarongan aron iyang matimbangtimbang kon unsay husto? Gigamit ni Pablo ang pagpangatarongan sa nakigsulti siya sa mga Hudiyo sa Tesalonica, ug “ingong resulta ang pipila kanila nahimong mga magtutuo.” (Buh. 17:2-4) Unsay nalangkit sa pagpangatarongan sa uban?
2. Unsaon nato pagsundog si Pablo sa dihang magsangyaw?
2 Tagda ang Pagbati ug Kagikan: Aron matabangan ang tagbalay sa pagpangatarongan, tagda ang ilang pagbati. Gisugdan ni Pablo ang iyang pakigpulong sa dili magtutuong mga Grego sa Areopago pinaagi sa paghisgot ug mga punto nga ila nang nahibaloan ug gidawat. (Buh. 17:22-31) Busa kon mag-andam kag presentasyon, tagda ang kasagarang gituohan sa mga tawo sa inyong teritoryo. (1 Cor. 9:19-22) Kon may pagtultol, pangitag punto nga inyong gikauyonan, ug kanay hisgoti.
3. Sa unsang paagi ang mahanasong paggamit ug mga pangutana makatabang nato nga mas epektibong makapangatarongan sa uban?
3 Mahanasong Gamita ang mga Pangutana: Dili nato magiyahan ang usa ka tawo sa iyang destinasyon gawas kon nasayod ta sa iyang presenteng lokasyon. Dili usab nato matabangan ang tagbalay sa pagtimbangtimbang kon unsay husto gawas kon nasayod ta sa iyang opinyon. Aron mahibaloan ang gihunahuna sa iyang mamiminaw, si Jesus sagad mangutana una sa dili pa mangatarongan. Pananglitan, sa dihang may nangutana kaniya kon unsay buhaton aron mapanunod ang kinabuhing walay kataposan, gitino una niya ang hunahuna sa maong tawo sa wala pa motubag. (Luc. 10:25-28) Sa laing higayon, sa dihang sayop ang tubag ni Pedro, si Jesus mahanasong migamit ug mga pangutana sa pagtul-id kaniya. (Mat. 17:24-26) Busa kon ang tagbalay mangutana o may sayop nga opinyon, makagamit tag mga pangutana aron matabangan siya sa pagpangatarongan.
4. Nganong maningkamot ta nga tabangan ang tagbalay sa pagpangatarongan?
4 Kon tabangan nato ang tagbalay sa pagpangatarongan, atong gisundog ang Dakong Magtutudlo, si Jesus, ug ang ubang batid nga mga ebanghelisador sa unang siglo, ug kita nagpakitag pagtahod sa tagbalay. (1 Ped. 3:15) Ingong resulta, lagmit ganahan ra siyang mobalik ta.