Pangutana

◼ Sa unsang paagi dumalahon ang mga butang sa dihang ang usa ka tagbalay moinsister nga ang mga Saksi ni Jehova dili maghimog dugang mga pagduaw nianang balaya?

Kon ang usa ka karatula diha sa pultahan tinong nagadili sa mga Saksi ni Jehova, angay nga atong tahoron ang ilang kagustohan ug likayan ang pagtuktok.

Usahay basin makita nato ang usa ka karatula nga nagadili sa mga tigbaligya o tigpangayo. Sanglit kay ginabuhat man nato ang mahigugmaong relihiyosong buluhaton, dili gayod kana maaplikar kanato. Maoy tukma nga mopadayon ug tuktokon kanang mga pultahana. Kon mobalibad ang tagbalay, kita makasaysay nga mataktikanhon kon nganong gibati natong dili mapadapat kanang mga karatulaha sa atong bahin. Dayon kon ang tagbalay mopatin-aw nga ang maong pagdili nagalakip sa mga Saksi ni Jehova, atong tahoron ang iyang kagustohan.

Sa dihang atong gikobrehan ang teritoryo, ang usa ka tagbalay basin maglagot ug moinsister nga dili na kita moduaw pag-usab. Kon siya modumili nga makigpangatarongan nianang butanga, kita angayng mosunod niining hangyoa. Ang usa ka penetsahan nga nota kinahanglang ibutang diha sobre sa teritoryo aron nga ang mga magmamantala nga magakobre sa maong teritoryo sa umaabot maglikay sa pagduaw nianang maong adres.

Hinuon, angay natong hinumdoman, nga kanang mga balaya dili gayod pagalikayan sa panahong walay tino. Ang presenteng mga nagapuyo niana basin mopahawa. Hayan makontak nato ang laing membro sa pamilya nga mosanong nga mauyonon. May posibilidad usab nga ang tagbalay nga atong gikaestorya mausab ug andam na nga magpaduaw kanato pag-usab. Busa human sa dugaydugay nga paglabay sa panahon kinahanglang magpakisayod kita sa mga namuyo aron tinoon ang ilang presenteng mga pagbati.

Ang payl sa teritoryo kinahanglang repasohon makausa sa tuig, nga nagalista sa mga balay diin kita gihangyong dili moduaw. Ubos sa direksiyon sa magtatan-aw sa pag-alagad, ang pipila ka hanas nga magmamantala ikatudlo sa pagduaw niining mga balaya. Sila makaingon nga sila miduaw aron pagsusi kon ang samang tagbalay nagapuyo pa didto. Kon may makataronganong pagsanong, ang mga pagduaw sa umaabot mahimo sa kasagarang paagi. Kon ang tagbalay padayon nga masinupakon, walay dugang mga pagduaw ang angayng himoon hangtod sa sunod tuig.