Pagtanyag sa Maayong Balita—Uban ang Pagkamailahon
1 Gipasiugda ni apostol Pablo ang panginahanglan sa paggamit sa pagkamailahon sa pagtanyag sa maayong balita ngadto sa katawhan nga lainlaing ang tinuohan ug mga kagikan. Sa atong adlaw, ang pipila ka tawo nagaangkon nga relihiyoso, samtang ang uban dili mahiligon sa espirituwal nga paagi ug walay pagpabili sa espirituwal nga mga bahandi. Ingong mga magmamantala sa maayong balita, ato gayong himoon ang mensahe sa Gingharian nga madanihon “ngadto sa tanang matang sa mga tawo” pinaagig paggamit sa pagkamailahon diha sa ministeryo.—1 Cor. 9:19-23.
SABTA ANG TAGBALAY
2 Ang paggamit sa pagkamailahon diha sa pag-alagad sa kanataran nagalangkit ug katakos sa pagpahiangay sa atong presentasyon ngadto sa mga intereses sa tagbalay. Nagakinahanglan kinig maayong pangandam pinaagig bug-os nga pagkasinati sa tumang pagkalainlain sa mga ulohan nga gitagad diha sa atong mga publikasyon.
PAGPAHAOM SA IMONG PRESENTASYON
3 Kon sa imong pagduol sa balay mapanid-an mo ang mga dulaan o mga bata, basin buksan mo ang karong Ulohan nga Mahisgotan pinaagig pag-ingon: “Kami nagpakisulti sa mga ginikanan diha sa komunidad bahin sa mga giya nga ilang gitagana alang sa ilang mga anak. Daghang ginikanan nabalaka maylabot sa kakulang sa moral nga giya alang sa mga bata diha sa eskuwelahan. Imo bang naobserbahan ang usa ka suliran maylabot niini?” Paminaw sa tubag sa tagbalay. Kon ang tubag nagabutyag nga ang tagbalay adunay relihiyosong hilig, ikaw makapadayon: “Makapainteres nga ang Bibliya nagpunting sa panginahanglan alang kanato ug sa atong mga anak sa pagdawat ug maalamong pagtultol. Matikdi ang giingon dinhi sa Proverbio 14:12.” Human mabasa ang teksto, ikaw makaingon: “May gibasa ko di pa gayod dugay nga nagpasiugda sa pagkamapuslanon sa tambag sa Bibliya alang kanato.” Paklia ngadto sa panid 174 sa Ang Bibliya—Pulong sa Diyos o sa Tawo? ug basaha ang kataposang parapo sa maong kapitulo. Itanyag ang libro sa ₱16.00.
4 Kon ang tubag sa tagbalay nagapakita nga wala siya ing pagpabili sa tambag sa Bibliya, ikapakita mo ang pagkamailahon pinaagig pagpahiangay sa imong presentasyon sa pag-ingon: “Mahimo bang mangutana ko nimo kon nganong nakadangat ka sa maong konklusiyon?” Human makapaminaw sa tubag, ikaw makapadayon: “Nasabtan ko kon nganong ingon niana ang imong pagbati. Sa pagkamatuod, di pa dugay may nabasa ako niining publikasyona nga akong mapaneguro nga makaplagan mong makapainteres.” Paklia ngadto sa panid 6 ug basahang mga parapo 3 ug 4. Usab, basaha ang unang tudling-pulong sa parapo 5 sa panid 7. Suknaa ang tagbalay kon buot ba niyang tagdon kon unsa ang gidawat sa ubang mga tawo ingong pamatuod sa pagkatinuod sa Bibliya.
5 Samtang kita nagaandam ug maayo ug nagapakitag pagkamailahon diha sa buluhaton ni Jehova, kita makahimo man sa pag-ingon sama sa apostol nga si Pablo: “Ako nahimong tanang butang ngadto sa tanang matang sa mga tawo, aron nga maluwas ko ang pipila.”—1 Cor. 9:22; Prov. 19:8.