Pangutana

◼ Angay bang motelepono sa Sosyedad aron pagbaton sa mga tubag sa mga pangutana sa Bibliya o alang sa personal nga tambag?

Daghang tawo nagagamit sa telepono aron mabuhat ang mga butang nga dali, apan sagad labaw pa sa kadali ang nalangkit. Sa kalibotan maoy kumon ang pagbutang nga panguna ang personal nga kasayon; ang mga tawo nagalikay sa paghago sa ilang kaugalingon.

Pagkalahi sa atong makaplagan diha sa tambag sa Diyos! Siya nagaawhag kanato sa pagpangita sa kahibalo sama sa natagong bahandi, nga nagapasabot sa atong pagkaandam nga maghago sa atong kaugalingon. Ang kasinatian nagapamatuod nga ang atong pagbuhat sa ingon mosangpot sa mas malungtarong katagbawan.​—Prov. 2:1-4.

Kana nga panikaysikay maoy haom kon ang usa ka pangutana motungha sa dihang nangandam ta alang sa tigom o kon giatubang ta ang usa ka personal nga suliran. Inay nga motelepono sa Sosyedad, kita makabenepisyo pinaagig personal nga pagpangdukiduki diha sa Bibliya ug sa atong mga basahon, ilabina ang Watch Tower Publications Index.

Human nga nahimo ta ang maong ‘pagpangita sa natagong mga bahandi,’ maduol ta ang usa sa lokal nga mga ansiyano kon gikinahanglan pa nato ang tabang. Ang mga ansiyano adunay kasinatian sa pagpangita alang sa impormasyon. Ang ilang balanseng tabang maoy ilabinang haom kon gikinahanglan ta ang tambag maylabot sa usa ka personal nga suliran o desisyon, kay duol sila nato ug sa atong situwasyon.​—Itanding Buhat 8:30, 31.

Kon maorag gikinahanglan gihapon ang dugang impormasyon nga diretso gikan sa Sosyedad, sagad mas maayo ang pagpadalag sulat. Kanang maong sulat magatugot ug panahon alang sa tubag nga mapasukad sa hustong pagdukiduki, nga sagad dili mahimo diha sa tawag sa telepono.