Moambit Ka ba sa Impormal nga Pagsangyaw sa Disyembre?

¹ Ang atong regular nga rotina sa kinabuhi nagalakip sa tinong mga higayon sa pagpakigsulti sa katawhan bahin kang Jehova. Nagagahin tag panahon sa pormal nga pagsangyaw diha sa balaybalay, paghimog mga balikduaw, ug pagdumalag mga pagtuon sa Bibliya. Hinuon, adunay daghang impormal nga mga okasyon nga makasulti ta sa katawhan mahitungod sa kamatuoran. Gitawag ta kining impormal nga pagsangyaw.

² Ang pipila ka magmamantala nakakaplag og daghang kahigayonan sa pagpakigbahin niining pormaha sa ministeryo. Kitang tanan makapaningkamot nga magmaalisto nianang mga okasyona sa Disyembre samtang mobiyahe ta paingon ug gikan sa mga kombensiyon, nagabakasyon, ug nagaduaw sa mga paryente. Pahimuslan ba nimo ang mga kahigayonan alang sa impormal nga pagsangyaw niining bulana?

³ Himoang Abanteng mga Plano: Ang pagpangandam makapaarang nato nga makapamatuod sa impormal diha sa epektibong paagi. Aron pagtabang nato sa pagbuhat niini, kita nasangkapan kaayo sa nagakadaiyang mga basahon. Dugang pa sa Ang Bantayanang Torre ug Pagmata!, kita adunay ubay-ubay nga mga tracts nga nagapaila sa mga ulohang makapukaw sa interes. Adunay mga brosyur nga makadani sa katawhan sa nagkalainlaing mga kagikan ug mga relihiyon. Aduna usab kitay debulsang mga libro sa mga ulohang makapainteres karon. Haing mga basahona ang gikahimut-an mo sa paggamit? Hunahunaa kini ingong usa ka pamilya. Unya ensayoha kon unsay imong isulti sa dihang motungha ang tukmang okasyon.

⁴ Samtang Magabakasyon: Usa ka ekselenteng panahon sa impormal nga pagsangyaw maoy samtang anaa sa bakasyon. Nagaplano ka ba sa pagbiyahe pinaagig tren o bus? Nan pagdalag Bibliya ug usa sa mga basahon nga gihisgotan sa itaas. Ang pagbasa sa maong mga basahon diha sa publikong sakyanan sagad makatukbil og panaghisgot. Kon nagabiyahe ka pinaagig kotse, hunahunaa kon unsay imong isulti sa dihang mohunong ka sa pagpagasolina o diha sa usa ka restawran. Nianang mga okasyona, mahuptan mo ang gamayng suplay sa tracts nga dali rang ikahatag sa mga interesado. Kon ikaw makahapit sa usa ka matalan-awonong dapit o sa usa ka baybayon o parke, tingali masugdan mo ang panaghisgot pinaagig pag-ingon: “Dili ba nindot unta kon ang tibuok yuta lantawong sama niini?”

⁵ Diha sa Distritong Kombensiyon: Makakaplag usab tag mga higayon sa impormal nga pagpamatuod diha sa distritong kombensiyon. Daghan ang may kalamposan sa pagpakigsulti sa mga empleyado sa mga hotel o mga restawran o sa pagpakigsulti sa katawhan diha sa dalan o samtang nagahulat og sakyanan. Seguroang nataod ang usa ka lapel card sa panahon sa kombensiyon. Hayan makaadto ka sa usa ka tindahan ug tingali ang mga tawo mangutana kanimo kon unsay gihawasan sa maong lapel card. Kini mahimong motultol sa paghatag mog maayong pagpamatuod.

⁶ Ang mga bakasyon ug mga kombensiyon magatanyag kanatog pagrepresko ug lingawlingaw, apan dili nato sayloan ang mga kahigayonan nga anaa kanato sa paghatag og impormal nga pagpamatuod. Kining paagiha sa pagsangyaw maoy mabungahon, ug ang mga alagad ni Jehova kinahanglang makig-ambit niini. Sama kang Jesus, hinaot ang atong gugma alang sa isigkatawo mopalihok kanato nga mosulti diha sa matag tukmang okasyon.​—Mat. 5:14-16.