Ang Gahom sa Pulong sa Diyos
1 Ang Pulong sa Diyos gamhanan. (Heb. 4:12) Karong adlawa, ang ebidensiya niini makita sa dihang ang minilyon sa mga kinabuhi nausab samtang ang katawhan nagahimog personal nga pagpadapat sa kon unsay ilang nakat-onan gikan sa Bibliya.—Roma 12:2.
2 Aron ang katawhan makabenepisyo sa mga pagtulon-an sa Bibliya, kinahanglang ilang ilhon ang Bibliya ingong ang Pulong sa Diyos. (1 Tes. 2:13) Sa Disyembre makahimo ta sa pagtabang sa katawhan nga makakat-og dugang bahin sa kahinungdanon sa Bibliya pinaagig pagtanyag sa New World Translation of the Holy Scriptures ug sa librong Ang Bibliya—Pulong sa Diyos o sa Tawo? diha sa atong pag-alagad sa kanataran.
3 Nganong dili repasohon ang pipila ka makaiikag nga mga bahin sa librong Pulong sa Diyos? Ang listahan sa mga kaundan motultol kanimo ngadto sa mga kapitulo nga nagahisgot sa mga milagro, gikaingong mga panagsumpakiay, siyentipikanhong panag-uyon, mga tagna, ug uban pang mga ulohan. Adunay daghang hulagway ug mga ilustrasyon. Kining mga bahina makapaarang nato nga motanyag sa libro uban ang tiunayng kadasig.
4 Unsaon man nato paggamit kining libroha uban sa mga tagbalay nga nagatuo na nga ang Bibliya maoy Pulong sa Diyos? Ang interes maugmad pinaagig pagpatugbaw sa bisan hain sa kapitulo 2, nga nagahubit sa asoy sa pagpakigbisog sa Bibliya nga molungtad, o ang kapitulo 14, nga nagadasig sa magbabasa sa pagdawat sa tabang aron nga mas makasabot sa kahulogan sa Bibliya alang kanato karong adlawa. Ang pagbasa sa mga kasulatan nga gipamatikod diha sa kapitulo 14 magpaseguro sa tagbalay nga ang inyong panaghisgot maoy pinasukad-Bibliya.
5 Daghan ang midumili sa pagdawat sa Bibliya ingong ang Pulong sa Diyos tungod sa panggawi sa Kakristiyanohan. Ang kapitulo 3, “Ang Mini nga Higala sa Bibliya,” magamit gayod nga epektibo niining situwasyona.
6 Sa dihang mobasa ta gikan sa atong Bibliya, ang tagbalay hayan mokomento sa katin-aw sa pinulongang gigamit diha sa New World Translation. O makaplagan tingali natong ang tagbalay nagapakitag interes sa atong mensahe apan wala magbatog Bibliya. Niining mga kahimtanga mahubit ta ang talagsaong mga bahin sa Bibliyang gigamit ta ug ang mga katarongan kon nganong gipalabi ta kini kay sa uban. Lakip sa ubang butang, ikapunting ta ang listahan sa “Bible Words Indexed” nga makabulig sa pagpangita sa sinati nang mga kasulatan. Usab, ang “Bible Topics for Discussion” sa luyo sa Bibliya makaabag sa pagpangitag mga tubag sa daghang kasagarang gisuknang mga pangutana.
7 Pinaagi sa Bibliya, si Jehova nagapasinati nato sa iyang kahibulongang personalidad. Hinaot nga gamiton ta ang New World Translation ug ang librong Pulong sa Diyos sa pagtabang sa uban nga makakat-on mahitungod sa gahom sa iyang Pulong.—2 Cor. 10:4.