Pangutana

◼ Diha sa usa ka teokratikanhong kasal, pila man ka testigos ang kinahanglang anaa aron mopirma sa kontrata sa kaminyoon uban sa duha nga gikasal?

Gikan sa mga sulat nga among nadawat, makita nga kining pangutanaha nakapahinabog pipila ka kabalaka sa ubay-ubay nga mga igsoon. Ang pipila adunay daghang testigos sa ilang mga kaminyoon, nga nakapatukmod sa uban sa pagsulat sa Sosyedad. Aron mabatonan ang hiniusang panglantaw sa maong butang, malipay mi sa paghatag sa mosunod nga mga puntos.​—1 Cor. 1:10.

Ang The Watchtower sa Hunyo 15, 1952 sa panid 360 mipahayag: “Ang pangasaw-onon ug ang pamanhonon gikinahanglang presente ug mopirma atubangan sa mga testigos nga ilang gidawat ang mga obligasyon sa kaminyoon; ug halos ang tanang estado ug mga probinsiya nagakinahanglan og duha ka testigos ingon nga dugang pa sa nagkasal nga ministro sa pagpirma sa sertipiko sa kaminyoon.” Ang artikulo nagapasiugda usab niining puntoha pinaagig pagbutang og gamay nga hulagway nga nagapakita lamang sa duha nga giminyo, duha ka testigos, ug ang nagkasal nga ministro. Dinhi sa Pilipinas, duha lamang ka legal nga testigos ang gikinahanglan, ingon sa gipakita sa kamatuoran nga ang luna nga gigahin diha sa Marriage Contract alang lamang sa duha ka testigos.

Tungod kay ang bugtong katuyoan sa mga testigos mao man lamang ang pagtagbaw sa legal nga mga kinahanglanon sa kaminyoon, nan ang bisan unsang labaw niini maoy sobra na ug wala-kinahanglana. Busa, nganong buot man sa bisan kinsang mga igsoong lalaki ug babaye nga magbatog labaw kay sa duha ka tawo nga mopirma sa dokumento sa ilang kaminyoon? Kita kaha nagasunod sa usa ka kalibotanong kostumbre? Kita ba anaa sa kapeligrohan nga mapasiatabon sa atubangan sa uban?​—1 Juan 2:15-17.

Gibati namong ang pamaagi sa itaas sa pagbaton lamang og duha ka testigos, usa ka lalaki ug usa ka babaye, nga mopirma sa Marriage Contract angayang sundon sa tanang natungdan sa umaabot nga teokratikanhong mga kasal nga gidumala sa tinudlo-Sosyedad nga tigkasal. Gilaoman nga kining maong impormasyon makaabag sa tanan nga makabaton og mas makataronganong panglantaw niining butanga kay sa nahitabo sa pipila ka kaso sa nangagi.