Ang Bibliya—Kinadugayang Modernong Basahon sa Katawhan
1 Sanglit kay ang Bibliya maoy Pulong sa Diyos, kita masaligon nga kana mohatag ug mosaler nga mga tubag sa moderno-adlawng mga gumonhap. Ug ang kapunongan ni Jehova nagataganag mapuslanong tabang sa pagkaplag sa maong mga tubag diha sa mga publikasyon maingon man sa ‘videos.’ Busa, kami malipay sa pagpahibalo nga ang Ingles nga bersiyon sa The Bible—Mankind’s Oldest Modern Book, ang ikaduha sa tulo ka ‘videos’ nga nagbutyag sa pagkainspirado sa Bibliya, sa pagkakaron mabatonan na dinhi sa Pilipinas. Kini 40 ka minutos ang gitas-on.
2 Sama sa unang ‘video’ niini nga serye, kining ikaduha nagalig-on usab sa pagsalig diha sa Bibliya ingong balaang giya. Nagagamit kinig mga hulagway nga gikuha sa kayutaan sa Bibliya ug sa mga museyo libot sa kalibotan aron buligan kitang amgohon kon sa unsang paagi si Jehova mipreserbar sa Bibliya latas sa kasiglohan nganhi sa atong adlaw. Imong masabtan kon sa unsang paagi ang pagkatukma sa Bibliya namentinar bisan pa sa padayong pagkopya ug paghubad. Imong masabtan kon sa unsang paagi kini napreserbar bisan pa sa hilabihang pagsupak. Imong makita usab ang buhing pamatuod kon sa unsang paagi ang Bibliya nagpausab sa mga kinabuhi sa mga tawo alang sa ikaayo gayod.
3 Kini nga ‘video’ mahimong mapuslanon alang sa panaghisgot sa Bibliya sa pamilya ug sa mga ginatun-an sa Bibliya—sama ra gayod sa nahiuna. Kita masaligon nga ang paggamit niini pagapanalanginan ni Jehova. Maorder na kini karon pinaagig inyong departamento sa literatura diha sa kongregasyon ingon sa gihisgotan ubos sa Mga Pahibalo. Ang ‘video’ nga Jehovah’s Witnesses—The Organization Behind the Name mabatonan na usab karon. Kining ‘videos’ magamit lamang diha sa ‘VHS recorders’ ug dili mosaler diha sa ‘Betamax recorders.’