“Mga Dulumtanan sa Tanang Kanasoran”

¹ Sa di pa dugayng katuigan kitang tanan nagmaya sa kahibulongang mga panalangin nga nasinatian sa katawhan ni Jehova libot sa kalibotan. Ang paglegal sa buluhaton sa Malawi human sa 26 ka tuig sa mangtas nga pagdaogdaog nakapaagay sa atong mga luha sa kalipay. Kita nakaginhawag lawom sa kahupayan sa dihang ang Komunismo nahugno sa Silangang Uropa nga misangpot sa pagpagawas sa linibo natong mga igsoon. Kita nagbantay uban ang kahangawa samtang ang atong kagawasan sa pagsimba gihagit sa Gresya; kita nabayaw sa dihang naangkon nato ang kadaogan sa kinatas-ang korte sa Uropa. Kita nalipay sa pagkadungog bahin sa pagpalapad sa mga sanga sa Sosyedad nga nagpaposible sa paggama sa dagkong gidaghanon sa literatura alang sa mga nagapangita sa kamatuoran. Kita nahingangha sa dihang atong nadungog nga kapin sa 7,400 ang nabawtismohan sa kombensiyon sa Kiev, Ukraine. Oo, kining dramatikanhong mga pag-uswag sa buluhaton sa Gingharian nakapalambo gayod sa atong kalipay!

² Samtang daghan ang hinungdan nato alang sa pagmaya, kinahanglang magbantay kita batok sa sobrang pagsadya. Ang usa ka gidaghanon sa paborableng mga taho makapahunahuna nato nga ang pagsupak nagakakunhod ug ang katawhan ni Jehova nakabaton ug pag-uyon libot sa kalibotan. Kanang maong panghunahuna mahimong malimbongon. Samtang nabatonan nato ang pipila ka kadaogan ug milampos sa pagwagtang sa mga babag sa maayong balita sa pipila ka kayutaan, kinahanglang dili nato kalimtan nga wala mausab ang atong relasyon sa kalibotan. Kita “dili bahin sa kalibotan.” Nga ingon niana, kita segurado nga mahimong “mga dulumtanan sa tanang kanasoran.” (Juan 15:19; Mat. 24:9) Samtang magapadayon pa kining sistemaha sa mga butang, walay kausaban ang lagda nga “ang tanan kanila nga nagatinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.”​—2 Tim. 3:12.

³ Ang kasaysayan nagapamatuod sa pagkatinuod niining pasidaana. Samtang si Jesus mihatag ug kahibulongang pamatuod atubangan sa mga magmamando ug sa ilang mga ginsakpan, siya nag-antos sa inadlaw nga pag-abuso ug diha kanunay sa kapilegrohan nga patyon. Bisan pag nakahimog daghang tinun-an ang iyang mga apostol, nakig-ambit sa pagsulat sa Kristohanong Gregong Kasulatan, ug nagpasundayag ug katingalahang mga gasa sa espiritu, sila gidumtan usab ug gidagmalan. Bisan pa sa ilang maayong panggawi ug gugma sa silingan, ang mga Kristohanon giisip ingong usa ka talamayong “sekta” nga ‘sa bisan diin ginasultihan ug pagbatok.’ (Buh. 28:22) Samtang ang Kristohanong kongregasyon karon ginagamit ni Jehova diha sa kahibulongang paagi sa pagpalampos sa iyang kabubut-on, kanunay kining ginasupak sa matag elemento niining daotang sistema sa mga butang. Walay katarongan sa pagdahom nga mohunong ang pagsupak.

⁴ Sa unang siglo, si Satanas naglutos sa mga tinun-an ni Jesus sa nagkadaiyang mga paagi. Ang mga magsusupak nagsultig tumang kabakakan nga nagmisrepresentar kanila. (Buh. 14:2) Sila migamit ug mga panghulga aron sulayang hadlokon sila. (Buh. 4:17, 18) Ang maisogong mga panon sa katawhan nagsulay sa pagpahilom kanila. (Buh. 19:29-34) Sila gibilanggo sa walay hinungdan. (Buh. 12:4, 5) Ang mga maglulutos sagad naggamit sa pisikal nga kapintasan. (Buh. 14:19) Sa pipila ka kaso ang mga inosente gipamatay. (Buh. 7:54-60) Si apostol Pablo sa personal miantos sa kadaghanan niining mga pag-abuso. (2 Cor. 11:23-27) Ang mga magsusupak naggamit sa matag kahigayonan sa pagbabag sa pagsangyawng buluhaton ug sa pagpaantos niining maong matinumanong mga magbubuhat.

⁵ Karong adlawa si Satanas nagagamit sa samang mga taktika. Ang bug-os nga mga bakak sa sayop nagahulagway kanato ingong nagiyahan-sa-sayop nga sekta o kulto. Sa pipila ka kayutaan, ang mga awtoridad nagbando sa atong literatura. Ang atong pagtahod sa pagkabalaan sa dugo ginatamay sa publiko. Sa katuigang 1940, ang masuk-anong mga panon sa katawhan nga nayugot tungod sa isyung pagsaludo sa bandera miatake sa atong mga igsoon ug nagdaot sa ilang kabtangan. Linibo ang nabilanggo tungod sa isyu sa neyutralidad. Sa pamunoang igihan o totalitaryong mga kayutaan ang atong mga igsoon sayop nga gisumbong ingon nga subersibo, nga misangpot sa linibo nga gipangsakit ug gipamatay diha sa mga prisohan ug mga kampong konsentrasyon. Kining maong pagpit-os tin-awng nagapakita nga kita mga tumong sa pagdumot nga wala ing matarong nga hinungdan.​—Tan-awang Mga Magmamantala, kapitulo 29.

⁶ Unsa ang Anaa sa Ugma-damlag? Samtang ang katawhan ni Jehova ngadtongadto mahimong makabaton ug pipila ka kahupayan sa pipila ka bahin sa kalibotan, ang kinatibuk-ang kahimtang nagapabiling sama. Ang Yawa nagapadayon sa pagkasuko tungod sa iyang pagkaunlod sa 1914. Siya nasayod nga mubo na ang iyang panahon. Ang iyang kapungot segurado nga mosamot samtang ang dakong kasakitan nagakahiduol na. Siya bug-os nga nagapakiggubat batok sa naentronong Hari, si Jesu-Kristo, ug siya determinadong makig-away hangtod sa pagkatapos. Siya ug ang iyang mga demonyo makapahungaw sa ilang kasuko ngadto lamang sa katawhan ni Jehova dinhi sa yuta, kinsa matinumanong “nagasunod sa mga sugo sa Diyos ug may buluhaton sa pagpanaksi bahin kang Jesus.”​—Pin. 12:12, 17.

⁷ Busa samtang kita nagalantaw sa umaabot, kinahanglan kitang magmatinud-anon. Walay katarongan sa paghunahuna nga ang Yawa mohunong o molunga. Ang pagdumot batok kanato niining kalibotana moulbo sa bisan unsang panahon ug sa bisan haing dapita. Sa daghang kayutaan ang atong kagawasan sa pagsangyaw nakab-ot lamang human sa dugayng pakigbisog. Kanang kagawasana mahimong huyang kaayo. Ang dramatikanhong mga pag-alsa mahimong kalit mahitabo, nga makapahinabog mga kagubot ug mga abuso sa tawhanong mga katungod.

⁸ Ang karon nga tingusbawan ug kagawasan nga atong gipahimuslan sa pipila ka kayutaan mahimong matapos sa hinanali, nga magapahinabog samang mga pag-abuso nga giantos sa atong mga igsoon sa nangagi. Dili gayod nato tugotan ang atong kaugalingon nga malukmay ngadto sa espiritu sa kawalay pagtagad, nga magahunahuna nga ang atong mga kaaway naparot na. Ang pagdumot niining kalibotana mahimong dili kanunay mapadayag sa bug-os, apan nagapabilin kining mainiton. Ang Pulong sa Diyos nagapakita nga ang pagsupak sa kalibotan mosamot samtang nagakaduol ang kataposan. Busa kinahanglan kitang magbantay, nga nagapakita sa atong kaugalingon nga “mabinantayon ingon sa mga halas apan inosente ingon sa mga salampati.” (Mat. 10:16) Kinahanglan kitang makaamgo nga aduna kita ing “kusganong pakigbugno” hangtod gayod sa kataposan, ug ang paglahutay mao ang yawi sa atong paglabang-buhi.​—Jud. 3; Mat. 24:13.

⁹ Sa atong dapit, ang pagwaling buluhaton mahimong mauswagon nga walay bisan unsa mang pagbalda sa mga magsusupak. Kini makapahunahuna nato nga walay katarongan sa seryosong kabalaka. Bisan pa niana, adunay panginahanglan sa pagkamabinantayon. Ang mga kahimtang mahimong daling mausab. Nga walay pasidaan, ang mga magsusupak makatuboy sa pipila ka isyu ug gamiton kana batok kanato. Ang mga apostata kanunay nagapangita alang sa pipila ka hinungdan sa reklamo. Ang masuk-anong mga klerigo mahimong magsaway kanato sa publiko. Ang atong mga plano sa pagtukod ug usa ka Kingdom Hall hayan makapatunghag kasumpakian sa tibuok kasilinganan. Ang negatibong mga pahayag batok kanato basin himoon diha sa mga pamantalaan. Ang ilado lokal nga mga tawo mahimong magbutangbutang kanato, nga magpahinabo sa atong mga silingan nga mabinatokon sa dihang kita moduaw. Bisan kadtong anaa sa atong kaugalingong panimalay mahimong magalutos kanato. Busa adunay panginahanglan sa pagkamabinantayon, nga nagaamgo nga ang pakig-away sa kalibotan buhi kaayo, ug mahimong motungha kini sa bisan unsang panahon.

¹⁰ Sa Unsang Paagi Kini Angayng Magaapektar Kanato? Kining tanan magaapektar sa atong panglantaw sa ugma-damlag. Sa unsang paagi? Kini ba angayng magpahadlok kanato maylabot kon unsa gayoy atong pagaantoson? Kita ba angayng mohinay sa atong pagwaling buluhaton kay ang pipila diha sa atong komunidad nadisturbo niana? Aduna bay katarongan sa pagbating nasamok kon kita gibugalbugalan? Ang binagis nga pagtratar kinahanglan bang makahikaw sa atong kalipay sa pag-alagad kang Jehova? Aduna bay pagkawaypiho bahin sa sangpotanan? Wala, wala gayod! Nganong wala man?

¹¹ Kinahanglang dili gayod nato kalimtan nga ang mensahe nga atong gimantala nagagikan, dili kanato, kondili kang Jehova. (Jer. 1:9) Kita ubos sa obligasyon sa pagsanong sa awhag: “Sangpita ang iyang ngalan. Ipahibalo taliwala sa katawhan ang iyang mga pakiglabot . . . sa tibuok yuta.” (Isa. 12:4, 5) Iyang gitugotan ang pagdaogdaog sa iyang katawhan alang sa usa ka tinong katuyoan, nga mao, ‘aron ikamantala ang iyang ngalan sa tibuok yuta.’ (Ex. 9:16) Kita nagabuhat sa buluhaton nga gisugo ni Jehova, ug siya mao ang nagahatag kanatog kadasig sa pagsulti uban ang kaisog. (Buh. 4:29-31) Kini mao ang labing hinungdanong buluhaton nga mahimo niining kataposang mga adlaw sa daang sistema.

¹² Kining maong kahibalo nagahatag kanatog kaisog sa pagbarog nga malig-on sa pagsupak ni Satanas ug niining kalibotana. (1 Ped. 5:8, 9) Ang pagkasayod nga si Jehova uban kanato magahimo kanatong “maisogon ug kusganon,” nga nagawagtang sa bisan unsang hinungdan sa kahadlok. (Deut. 31:6; Heb. 13:6) Samtang sulayan nato kanunay ang pagkamataktikanhon ug pagkamakataronganon sa dihang ginahulga sa mga magsusupak, ipatin-aw nato nga kita determinadong “sugton ang Diyos ingong magmamando inay kay sa mga tawo” sa dihang ginahagit ang atong pagsimba. (Buh. 5:29) Kon adunay kahigayonan sa pagsulti sa atong depensa, buhaton nato kana. (1 Ped. 3:15) Hinuon, dili nato usikan ang atong panahon sa pagpakiglalis sa gahiang mga kabatok kinsa interesado lamang sa pagdaot kanato. Inay kay sa pagsulay sa pagbalos sa dihang sila sa binakak magpasangil kanato, kita moingon lamang nga “pasagdi nga maingon sila.”​—Mat. 15:14.

¹³ Ang atong paglahutay latas sa mga pagsulay nagapahimuot kang Jehova. (1 Ped. 2:19) Unsa man ang bili nga kinahanglan natong ibayad alang sa maong pag-uyon? Kinahanglan ba kitang mag-alagad nga walay kalipay tungod kay kita gidumtan ug gisupak? Dili gayod! Si Jehova nagasaad sa pagganti sa atong pagkamasinugtanon uban ang “kangaya ug pakigdait.” (Roma 15:13) Bisan pa sa hilabihang pag-antos, si Jesus nagpabiling malipayon tungod sa “kangaya nga gibutang atubangan kaniya.” (Heb. 12:2) Ang sama niana tinuod kanato. Tungod kay ang ganti sa paglahutay dako kaayo, kita mapalihok sa “pagmaya ug lukso sa kangaya” bisan pag kita magaantos sa malisod nga mga pagsulay. (Mat. 5:11, 12) Bisan sa mga panahon sa kalisdanan, kini nga kangaya maoy, sa kaugalingon, usa ka hinungdan sa pagdayeg kang Jehova.

¹⁴ Aduna bay pagkawaypiho bahin sa kataposang sangpotanan, nga makapahinabo kanato sa pagpanagana? Wala, ang sangpotanan sa panag-away tali sa organisasyon ni Jehova ug sa kalibotan ni Satanas nahukman dugay na kanhi. (1 Juan 2:15-17) Bisan unsa man ka hilabihan ang pagsupak, si Jehova magahatag kanato sa kadaogan. (Isa. 54:17; Roma 8:31, 37) Bisan pag bug-os kitang ibutang sa pagsulay, walay makapugong kanato sa pagdawat sa ganti. Wala kitay hinungdan sa “pagkabalaka sa bisan unsang butang,” tungod kay si Jehova nagahatag kanatog kalinaw ingong tubag sa atong mga pangamuyo.​—Filip. 4:6, 7.

¹⁵ Busa kita nagapasalamat kang Jehova sa matag panahon nga atong madungog nga ang atong mga igsoon nga naluwas gikan sa paglutos o nahatagan ug kagawasan sa pagwali sa kanhing gidili nga mga dapit. Kita nagamaya sa dihang ang bag-ong mga kahigayonan gibuksan alang sa linibong sinserong mga tawo sa pagpatalinghog sa mensahe sa Gingharian. Kita mapasalamaton sa dihang si Jehova nagahatag kanatog kadaogan sa mga pakig-atubang sa mga magsusupak. Kita nahibalo nga siya magapanalangin sa atong buluhaton sa bisan unsang paagi nga gikinahanglan aron mabayaw ang iyang matuod nga pagsimba ug magpasulod sa “tilinguhaon” nga mga tawo gikan sa tanang kanasoran.​—Hag. 2:7; Isa. 2:2-4.

¹⁶ Sa samang panahon, kita nasayod nga ang atong kaaway, si Satanas, gamhanan kaayo, ug siya kusganon gayong magasupak kanato hangtod sa kataposan. Ang iyang mga atake mahimong dayag ug daotan kaayo, o mahimong kini malinglahon ug malimbongon. Ang paglutos mahimong moulbo sa hinanali diha sa kanhi malinawong mga dapit. Ang mga magsusupak mahimong madagmalon sa mga pagpaningkamot sa paglupig kanato. Sa igong panahon mahimong klaro unya kanilang tanan nga sila maoy “sa tinuod nga mga mag-aaway batok sa Diyos,” ug siya magalaglag kanila. (Buh. 5:38, 39; 2 Tes. 1:6-9) Sa kasamtangan, bisan unsa man ang atong ginaantos, kita determinado sa pagpabiling malig-on sa pag-alagad kang Jehova ug sa pagwali sa mensahe sa Gingharian. Kita mao ang labing malipayong katawhan sa nawong sa yuta, sa pagkasayod nga ‘sa pagkahimong inuyonan atong madawat ang purongpurong sa kinabuhi.’​—Sant. 1:12.