Pagkamakapaayo sa Pag-asoy sa Nahimo ni Jehova!

¹ Ang inspiradong magsusulat sa Salmo 48 miawhag kanilang diha sa Israel sa ‘pagmartsa libot sa Sion, ihapon ang iyang mga torre, suhiron ang iyang puy-anang mga torre, aron nga ilang ikaasoy kini sa umaabot nga kaliwatan.’ Nga napalihok pinaagig gugma kang Jehova, sila interesado gayod sa matag detalye nianang yutan-ong sentro sa teokratikanhong pagmando. Pagkabililhon gayod niining maong mga detalye tungod kay kini mao ang siyudad kaniadto nga gipahimutangan ni Jehova sa iyang kaugalingong ngalan! Sila magasugilon bahin niana, ug ilabina nga ilang paneguroon nga ang ilang kaliwatan makadungog mahitungod sa tanang butang nga ilang gimahal diha sa ilang kaugalingong mga kasingkasing.​—Sal. 48:12, 13.

² Kita nagakinabuhi karon sa panahon nga ang teokratikanhong pagmando sa Mesiyas ni Jehova nasentro dili na sa yutan-ong Sion apan sa langitnong Jerusalem. (Heb. 12:22) Ang Gingharian ni Jehova diha sa mga kamot ni Jesu-Kristo nagamando na sukad sa 1914. (Pin. 12:10) Ang kalihokan niini makapainteres kaayo kanato. Interesado usab kita kaayo diha sa paagi nga si Jehova nagtultol sa iyang mga alagad sa yuta aron ilang matuman ang iyang kabubut-on ingong makitang mga hawas nianang maong Gingharian. Ang madanihong mga detalye mahitungod niini gihubit sa atong bag-ong librong Mga Saksi ni Jehova​—Mga Magmamantala sa Gingharian sa Diyos. Pagkamalipayon nato sa dihang nadawat kini sa atong dili pa dugay nga “Balaang Pagpanudlo” Distritong Kombensiyon!

³ Sa Septiyembre 1, 1993, ang maong libro naluwatan na sa 20 ka pinulongan, ug ang paghubad ug pagpatik nagapadayon sa pagtagbaw sa mga panginahanglan niadtong nagasultig 13 pa ka ubang pinulongan. Nakabaton ba ug usa ka kopya ang imong panimalay? Ginabasa ba nimo kana? Ginasugilon ba nimo ang mga butang nga imong nakat-onan gikan niana?

⁴ Human nga matan-aw ang mga hulagway ug mabasa ang mga ulohan, ingon sa gisugyot sa kombensiyon, daghang igsoong lalaki ug babaye mibasa dayon sa pangunang kaundan sa materyal. Unsa man ang ilang mga komento? Ania ang pipila lamang:

⁵ Usa ka igsoong babaye misulat: “Kini lamang ang libro nga sukad akong nadawat nga gusto nakong taposon dayon aron mabasa nako pag-usab. Anaa na ako sa kapitulo 25 karon. Sa dugang nakong pagbasa, dugang nga molugmaw ang mga luha ug ang akong kasingkasing napuno uban sa gugma kang Jehova. Ang libro makapadasig kaayo ug makapalig-on sa pagtuo.”

⁶ Usa ka igsoong lalaki nga nag-alagad na kang Jehova sa kapin sa 40 ka tuig miingon: “Wala kaayo nako maamgohi kon unsa diay ka makaiikag kining libroha. Nagpulaw ako ug mibangon ug sayo ug naghuman sa pagbasa sa duha ka semana. Kini maoy usa gayod sa mga librong labing makapalihok nga sukad akong nabasa. Kini maoy usa ka obra-maestra sa pagpangdukiduki apan usa usab ka obra-maestra sa pagpalig-on.”

⁷ Usa ka Regular nga Programa sa Pagbasa: Ang pipila nga daling mibasa sa tibuok libro determinado nga mobasa niana pag-usab apan niining higayona diha sa mas hinay na nga paso.

⁸ Kon adunay labaw sa usa nga membro sa inyong panimalay nga anaa sa kamatuoran, hayan buot nimong gamiton ang mga bahin sa libro sa inyong pagtuon sa pamilya. Ang pipila ka pamilya nagsugod sa pagbuhat niana sulod sa pipila ka adlaw human nila madawat ang usa ka kopya sa kombensiyon. Kini wala magpasabot nga ang ubang mga butang, sama sa pag-andam alang sa Pagtuon sa Bantayanang Torre, pagapasagdan na. Apan imong makaplagang makapaayo kaayo sa paggamit sa laing 15 o 20 ka minutos sa pagbasa ug paghisgot sa materyal gikan sa librong Mga Magmamantala.

⁹ Ang ubang mga pamilya nagabasa ug duha o tulo ka panid​—tingali usa o duha ka sub-ulohan​—kada gabii una pa mobiya sa panihapon. Sa tinagsa mahimong nabasa na nila ang kadaghanan sa libro, apan sila makabenepisyo gikan sa mas hinay nga pagkobre uban ang kahigayonan sa paghisgot sa materyal. Ang pipila nga nagahimo niini nagaalagad na kang Jehova sa daghang tuig. Samtang sila nagabasa, daghang makalingaw nga handomanan ang mitungha. Kini nagapadasig sa ilang mga kasingkasing samtang ilang gihisgotan pagtingob ang ilang kaugalingong pakig-ambit sa mga hitabo bahin sa mga butang nga ilang ginabasa.

¹⁰ Tungod sa mga kahimtang diha sa imong balay, makaplagan mong magabasa nga mag-inusara. Usa ka igsoong babaye nga misulat sa Sosyedad nag-ingon: “Ako nagabasa niining libroha sa ginagmay sa usa ka panahon kada gabii una pa matulog. Kining libroha nagatukod diha kanako ug mas dulot nga pagpabili ug gugma sa kamatuoran, ug gibati kong mas suod kang Jehova ug mapasalamaton kaayo nga ako usa ka bahin sa iyang organisasyon. Giganahan gayod ako sa matag panid nga akong gibasa.”

¹¹ Bisan tuod dako ang libro, ang lainlaing mga seksiyon dili man. Ang pasiunang seksiyon maoy usa ka tulin apan makaiikag nga pagkobre sa mga hitabo gikan sa mga adlaw ni Abel ngadto sa tuig 1992​—diha lamang sa 108 ka panid. Ang ubang mga seksiyon maoy gikan sa 13 ngadto sa 150 ka panid. Ang kada usa niining mga seksiyona gibahin ngadto sa pipila ka kapitulo. Inay nga magdalidali niana, kuhaa ang usa ka seksiyon, usa ka kapitulo, o usa ka sub-ulohan sa usa ka higayon; magkalipay niana ug pahimusli ang labing maayo gikan niana.

¹² Paggahin ug Panahon sa Pagpamalandong Mahitungod sa Imong Ginabasa: Unsa man ang imong tumong samtang ikaw nagabasa? Ang yanong pagkobre sa mga panid​—paghuman sa libro​—kinahanglang dili mao ang imong tumong. Ang librong Mga Magmamantala nagaunod ug usa ka rekord sa imong espirituwal nga panulondon. Kinahanglang masayod ka niana pag-ayo. Gahinig panahon ang pagpamalandong mahitungod sa mga gipasabot sa imong ginabasa. Samtang girepaso nimo ang kalihokan sa karaang mga saksi ni Jehova, palandonga kon unsaon nimo pagsundog ang ilang pagtuo. (Heb. 12:1, 2) Sa dihang imong ginabasa ang bahin sa kaugmaran sa dakong apostasiya, hatagig espesyal nga pagmatikod ang mga lit-ag nga nakabitik niadtong nagpahilayo, uban ang tumong nga panalipdan ang imong kaugalingong espirituwalidad. Ug samtang ginarepaso nimo ang atong moderno-adlawng kasaysayan, panid-i ang espirituwal nga mga hiyas niadtong kinsa gigamit sa Diyos, kon sa unsang paagi gipasundayag nila nga ang pagbuhat sa kabubut-on sa Diyos mao ang labing hinungdanong butang sa ilang mga kinabuhi, ug kon sa unsang paagi sila misanong sa mga kahimtang​—ang pipila niana malisod kaayo​—nga gitugotan sa Diyos.​—Heb. 13:7.

¹³ Imong makaplagang makapalig-on sa pagtuo ang pagsusi sa mga detalye nga nagapakita kon sa unsang paagi si Jehova nagatultol sa iyang katawhan ngadto sa tin-awng pagsabot sa kamatuoran sa Bibliya nga gipahimuslan nato karon. Ang imong apresasyon sa makitang kahikayan nga gigamit ni Jehova motubo samtang mas masinati ka sa kaugmaran sa organisasyon. Bation gayod nimo ang kulbahinam samtang ginabasa nimo kon sa unsang paagi, diha sa katumanan sa tagna, ang maayong balita nakaabot sa labing halayong bahin sa yuta. Ang imong kasingkasing madasig pinaagi sa mga kasinatian sa mga matinumanong tawo sa tanang bahin sa kalibotan kinsa masibotong naghago sa pagmantala sa Gingharian. Ikaw mapalig-on sa pag-atubang sa personal nga mga pagsulay samtang imong basahon kon unsa ang naantos na sa matinumanong mga igsoong lalaki ug babaye tungod sa ilang gugma kang Jehova.

¹⁴ Human nga imong mabasa ang usa ka bahin sa materyal, gahinig panahon ang paghisgot sa tingob sa bili niini ug sa pagrepaso sa mga detalye. Kon may batan-on kang mga anak, ilangkit sila sa pagsaysay sa mga hulagway ug mosulti kanimo kon unsay ilang nahibaloan bahin sa mga tawo nga gipakita. Bisan ug nagainusara ka sa pagbasa, paningkamoti sa pagpaambit sa uban kon unsay imong nakat-onan. Diin tukma, gamita ang materyal sa mga balikduaw ug sa dihang nagadumala ug mga pagtuon sa Bibliya. Ang imong pagsubli niana magpatisok niana sa imong kaugalingong hunahuna ug kasingkasing, ug kini makapaayo usab sa uban.

¹⁵ Batoni ang Interes sa mga Detalye: Ang mga panahon nga imong gugolon sa pagbasa sa librong Mga Magmamantala kinahanglang makalilipay ug mapuslanon.

¹⁶ Buot ba nimong makaduaw ang imong pamilya sa pangulong-buhatan sa kalibotan sa mga Saksi ni Jehova? Ang mga panid 208-9 nagapakita sa mga pasilidad nga gigamit sa Sosyedad sa usa ka siglo ang milabay didto sa dapit sa Pittsburgh. Ang mga panid 216-17 magpasinati kanimo sa mga tinukod nga gigamit sa ulahi didto sa Brooklyn. Ang mga hulagway sa mga panid 352-6 makatabang kanimo sa paghanduraw sa pangulong-buhatan sa kalibotan karon. Ang mga kapitulo 26 ug 27 puno sa mga detalye bahin sa buluhaton nga gihimo sa Bethel, ug ang mga panid 295-8 nagahatag ug dugang impormasyon mahitungod sa kinabuhi sa Bethel.

¹⁷ Kadaghanan kanato dili makahimo sa pagduaw sa daghang sanga sa Sosyedad. Ang mga panid 357-401 sa librong Mga Magmamantala magdala kanimo libot sa kalibotan. Wala kinahanglanang magdalidali niana. Gugola ang pipila ka panahon sa matag dapit ug pagkalipay diha niana. Gamita ang mapa sa kalibotan sa mga panid 415-17 sa pagpangita sa matag dapit. Basaha ang mga komento nga nagaduyog sa matag hulagway sa sanga. Pinaagi sa indese makaplagan usab nimo ang ubang makaiikag nga impormasyon mahitungod sa matag nasod. Gamita kining maong kahigayonan sa pagkaila sa mga membro sa imong espirituwal nga pamilya sa ubang kayutaan.

¹⁸ Sa dihang ang mga tawo magtapok sa sosyal nga paagi, usahay sila magdula ug mga dula nga nagalangkit sa kahibalo sa sekular nga mga kamatuoran. Dili ba labaw kaayong makapaayo sa pagkahibalo sa talagsaong mga petsa ug mga hitabo sa moderno-adlawng kasaysayan sa katawhan ni Jehova? Makaplagan nimo ang daghan niana nga nalista sa mga panid 718-23 sa librong Mga Magmamantala. Kanang listahana nagataganag usa ka pasukaranang dugokan; imong ikadugang niana ang gikan sa mga detalye nga makaplagan sa ubang mga bahin sa libro. Gamita kana ingong basihanan sa pagrepaso. Ang mga batan-on sa pamilya malagmit daling makamemorya niana. Ang pipila kanatong mga edaran na mahimong hinay ug diyutay. Apan kini maoy mga detalye sa teokratikanhong kasaysayan nga kitang tanan makabenepisyo gikan sa pagkakat-on. Human nga imong makat-onan ang mga petsa ug pasukaranang mga kamatuoran, pagtukod diha niana nga pundasyon. Tan-awa kon unsa ka daghang detalye ang imong mahinumdoman bahin sa matag hitabo. Unya ipakigsulti ang bahin nga nahimo sa matag hitabo sa pagpalampos sa kabubut-on sa Diyos. Sunod, hisgoti kon sa unsang paagi kini nakaapektar sa imong kaugalingong kinabuhi ug kon sa unsang paagi ikaw mohaom diha sa ginabuhat ni Jehova.

¹⁹ Tan-awa ang mga Kahigayoanan nga Bukas Kanimo: Samtang imong ginabasa ug ginahisgotan ang Mga Saksi ni Jehova​—Mga Magmamantala sa Gingharian sa Diyos, imong makaplagan nga nabuksan sa imong panan-aw ang dakong katumanan sa Isaias 60:22. Ang libro mipahayag diha sa panid 519: “Ang katumanan sa saad nga ‘ang usa nga diyutay mahimong usa ka libo’ sa tino nahitabo, ug pagkamabungahon gayod! Sa kada usa sa kapin sa 50 ka kayutaan nga wala gani ing ‘usa ka diyutay’​—nga walay Saksi ni Jehova balik niadtong 1919, diin wala gayod sila makasangyaw​—karong adlawa dihay kapin sa usa ka libong magdadayeg ni Jehova. Sa pipila niining mga yutaa, karon adunay tinagpulo ka libo, oo, gani kapin sa usa ka gatos ka libo, ka mga Saksi ni Jehova nga masibotong mga magmamantala sa Gingharian sa Diyos! Sa tibuok kalibotan, ang mga Saksi ni Jehova nahimong ‘usa ka kusganong nasod’​—mas daghan pa ingong usa ka nahiusang tibuok-yutang kongregasyon kay sa indibiduwal nga populasyon sa bisan hain sa labing menos 80 ka nagmando sa kaugalingong mga nasod sa kalibotan.”

²⁰ Kanang maong buluhaton sa pag-uswag sa Gingharian wala pa gayod matapos. Sa kasukwahi, si Jehova nagpatulin niana ngadto sa wala pa mahibaloing gidak-on. Ngadto sa unsang gilapdon ikaw magapakig-ambit niiini? Nasayod ka ba gayod sa tanang kahigayonan nga bukas kanimo? Samtang makat-onan nimo kon unsa ang ginabuhat sa uban, hinaot ang imong kaugalingong kasingkasing mapalihok sa paghimo sa imong kaugalingon nga andam sa pagpakig-ambit sa bug-os sa dakong buluhaton sa atong adlaw nga gitultolan sa atong mahigugmaong Diyos pinaagi kang Jesu-Kristo.