Tabangi ang Uban nga Makakat-on Bahin sa Labing Bantogang Tawo
1 Daghan nga nakabasa sa librong Ang Labing Bantogang Tawo nga Nabuhi Sukad nagpahayag ug apresasyon sa epekto niini diha sa ilang mga kinabuhi. Ang usa misulat: “Sa dihang natapos ko ang libro, akong gibati ang ingon sa daw gidapit ako ni Jesus sa pagpakig-uban kaniya, sa pagkinabuhi diha sa iyang kiliran, sa pagpakig-ambit sa iyang mga pag-antos, iyang mga pagbati, sa matag bahin sa iyang ministeryo.”
2 Ang librong Labing Bantogang Tawo nagabulig kanato nga mas masinati dili lamang kang Jesus apan kang Jehova usab. (Juan 14:9) Usa ka 12-anyos-edad miingon mahitungod sa libro: “Kini naglipay kaayo nako nga ako miampo kang Jehova uban ang mga luha sa kalipay sa dihang natapos ko kini pagbasa. Sa kinasulorang bahin, ako napasaligan pag-usab nga si Jehova ug si Jesus nagabantay kanato.” Ang pagtuon niining libroha bahin sa kinabuhi ni Jesus nagahatag kanatog espesyal nga pagpanabot diha sa personalidad ni Jehova tungod kay si Jesus maoy “tukmang representasyon sa iyang pagkamao.”—Heb. 1:3.
3 Kapin sa 19 milyon ka kopya sa librong Labing Bantogang Tawo ang napatik na diha sa kapin sa 70 ka pinulongan. Usa ka interesadong tawo mihuman pagbasa niini sulod sa duha ka semana sa nahuptan kini. Ang usa ka klerigo mipahayag: “Dili ko ikabutang ang libro. Ang akong asawa ug ako nagabasa sa pipila niini kada gabii una pa kami matulog.”
4 Impormal nga Pagsangyaw: Usa ka igsoong lalaki nagpakita sa librong Labing Bantogang Tawo ngadto sa katawhan sa iyang dapit trabahoanan. Ang iyang isigkatrabahante naghimog listahan niadtong buot ug usa ka kopya. Siya nakapahilunag 461 ka libro! Ang lima niadtong nakadawat niini nagatuon na. Usa ka igsoong babaye, samtang nagbiyahe sakay sa ayroplano, nagpahiluna sa librong Labing Bantogang Tawo ngadto sa usa ka pari. Ang pari didto na sa Batikano sulod sa 40 ka tuig. Kitang tanan kinahanglang bug-os nga magpahimulos sa mga kahigayonan sa pagrekomendar sa maong libro ngadto sa uban.
5 Mga Batan-on Nagaapresyar Niini: Ang usa ka nuwebe-anyos-edad misulat: “Ang akong paboritong basahon mao ang Ang Labing Bantogang Tawo nga Nabuhi Sukad tungod kay daghan ang akong nakat-onan gikan niana.” Sa dihang mahibalag ta ang mga batan-on diha sa pag-alagad sa kanataran, angay nga gugolon ta ang panahon, kon mouyon ang ilang mga ginikanan, nga ikapakita ngadto niining mga batan-ona ang libro ug morepaso sa pipila ka dagkong puntos ug binatid-pagkabuhat nga hulagway niini. Sa dihang mahatagan ug kahigayonan sa pagkakat-on bahin kang Jesus, ang mga batan-on karong adlawa makapakiglabot kaniya. Si Jesus maoy maabiabihon nga tawo.—Mat. 19:14, 15.
6 Ang pagbasa sa librong Labing Bantogang Tawo makapausab sa mga kinabuhi sa katawhan. Gamita ang materyal diha sa kataposang panid sa pasiuna sa libro, ubos sa sub-ulohang “Mga Kaayohan sa Pagtuon Mahitungod Kaniya.” Kining materyala makabulig sa katawhan sa pagpunting kon unsay ilang makuha gikan sa pagbasa sa maong libro. Daghan sa inyong teritoryo mahimong motuwaw ingon sa gihimo sa usa ka tawo human niya mabasa ang libro: “Kini maoy labing maayong libro nga sukad akong nabasa! Kini nagpausab sa akong kinabuhi.”