Bag-ong Libro Nakaikag sa Minilyon
USA ka bahin sa mga “Mahigugmaon sa Kagawasan” nga mga Kombensiyon nga misugod sa miaging Hunyo mao ang pakigpulong “Ang Labing Bantogang Tawo nga Nabuhi Sukad.” Ang talagsaong bahin niini mao ang pagluwat sa libro nga dunay samang ulohan. Kapin sa unom ka milyong mga tawo sa tibuok nga yuta ang nakatambong na niini nga mga serye sa mga kombensiyon ug nakadungog na sa pakigpulong, nga makita uban ang diyutayng kausaban diha sa nag-unang duha ka artikulo niining magasina.
Kapin sa 12 ka milyong mga kopya sa Librong Ang Labing Bantogang Tawo nga Nabuhi Sukad ang napatik diha sa 60 ka pinulongan. Kini mabatonan pa gani sa mga pinulongang Albaniano, Croatiano, Hungariano, Macedoniano, Polako, Ruso, Serbiano, ug Sloveniano sa Silangang Uropa. Ilabinang nalipay ang kapin sa 74,000 nga mitambong sa pito ka kombensiyon didto sa Unyon Sobyet sa pagdawat niini diha sa Ruso nga pinulongan.
Sinugdanan sa Libro
Ang materyal sa basahon makita sa sinugdan diha sa seryal nga porma sa 149 ka sunodsunod nga mga isyu sa Ang Bantayanang Torre, nagsugod sa Oktubre 1, 1985, nga isyu. Daghang mga magbabasa miingon nga sila nasubo sa dihang nahunong ang seryal sa isyu sa Hunyo 1, 1991. Ang 12-anyos nga Melissa, sa Italya, nakahilak sa gibasa niya ang kataposang asoy diha sa Ang Bantayanang Torre. “Sa gabii una pa ang among kombensiyon,” siya miingon, “ako nag-ampo kang Jehova nagahangyo sa usa ka basahon bahin sa kinabuhi ni Jesus. Sa gitanyag ang libro, ako mipakpak nga way-hunong.”
Ang materyal nga gipatik nga sunodsunod diha sa Ang Bantayanang Torre giedit ug giusa diha sa usa ka bag-o matahom nga pagkailustrar, 448-panid nga libro sa 133 ka kapitulo. Ang paningkamot gihimo aron ikatanyag ang matag pakigpulong nga gihatag ni Jesus ug ang matag narekord nga hitabo sa iyang yutan-ong kinabuhi, lakip ang tanan sa iyang mga sambingay ug mga milagro. Sa nahaigong sukod, ang tanan giasoy nga sunodsunod sumala sa pagkahitabo. Sa kataposan sa matag kapitulo, adunay usa ka listahan sa mga teksto sa Bibliya nga gibasehan sa kapitulo.
Ikaw hayan maghunahuna, ‘Aw, nabasa ko na diay ang maong libro tungod kay gibasa ko man ang seryal diha sa Ang Bantayanang Torre.’ Apan ang mga magbabasa sa Bantayanang Torre nakadawat sa asoy sa kinabuhi ni Jesus diha sa gamay nga mga bahin lamang nga gitanyag diha sa mga artikulo nga mitungha sa matag duha ka semana kapin sa unom ka tuig. Bisan tuod matulon-anon ang mga artikulo diha sa seryal nga porma, palandonga ang kahinam sa pagbasa sa tibuok asoy diha sa mubo nga panahon ug makita ang tibuok nga hulagway sa labing bantogang tawo nga nabuhi sukad!
Makapalig-on sa Pagtuo
“Natapos ko pagbasa ang publikasyon sulod sa duha ka semana,” mitaho ang usa ka babaye gikan sa Washington D.C., U.S.A. “Samtang ako nagabasa, mitulo ang mga luha gikan sa akong mga mata. Ako mohunong sa pagbasa ug mag-ampo ug mohilak. Kini mipabati kanako nga ako didto gayod mismo uban kang Jesus, nag-antos uban kaniya. Bisag usa ka semana na ang milabay human nga nabasa ang libro, ang mga luha sa gihapon mitubod sa akong mga mata samtang palandongon ko ang akong gibasa. Gibati ko nga mas suod pa kang Jehova sa paghatag niya sa iyang Anak.”
“Natapos ko pagbasa ang libro mahitungod kang Jesus karong adlawa,” usa ka babaye gikan sa Pittsburgh, Pennsylvania, U.S.A., misulat. “Kadto talagsaon. Dihay mga luha sa akong mga mata samtang nagabasa ako sa pipila ka kataposang kapitulo. Ang pagbasa nga kas-a ra sa basahon maayo gayod kaayo. Dili ko gayod matukib ang gibati ko niana—gawas lamang nga kini nagustohan ko pag-ayo!”
Ang matahom nga mga ilustrasyon sa libro nakaamot sa emosyonal nga epekto, sama sa giingon sa usa ka mapabilhong magbabasa: “Kini mipabati kanako ingon sa daw madunggan ko ang ilang paghilak tungod sa namatay nga bata (kapitulo 47) o nga kita nahibalo sa gihunahuna ni Jesus sa dihang ang babaye nga gitalinug-an mihikap kaniya ug naayo (kapitulo 46). Ang mga ekspresyon sa ilang dagway maoy tinuod kaayo nga makapahinuklog. . . . Inay usa ka trabaho ang pagbasa, kining basahona naghimo niana nga samag kalingawan o kalipay sa kataposan sa akong adlaw. Ang makapatandog nga paagi sa pagkasulat sa basahon nagtagad dili lamang sa gibuhat ni Jesus kondili naghatag ug paaninaw sa iyang gihunahuna ug gibati.”
Nagkalainlaing Kagamitan
Daghan ang misugod sa paggamit sa libro diha sa ilang pamilyahanong pagtuon sa Bibliya. “Kami dunay tulo ka anak,” misulat ang mga ginikanan gikan sa Silverton, Oregon, U.S.A., “ug kining libroha maayo gayod alang sa among ‘pagtuon sa pamilya matag gabii.’ Sa pagkatinuod, pagkatukma nga atong tun-an nga maampingon ang kaagi sa atong mahigugmaong Hari, si Kristo Jesus.”
Usa ka tin-edyer gikan sa Hapon miingon: “Ang akong amahan nagabasa niini kanamo samtang kami magpahayahay human sa among panihapon. Ingong pamilya, kami nagsugod ug basa gikan sa sinugdan, apan midesider ako sa pagbasa ug usa ka kapitulo kada gabii gikan sa likod sa libro sa dili pa matulog. Apan, ang libro makaiikag kaayo nga sagad ala una na sa buntag una ko himatikdan ang oras.”
Daghan ang nahibulong kon unsa ka daghan sa mga detalye ang nalakip sa asoy. “Daghan kaayo akog nakat-onan nga wala ko mahibaloi,” misulat ang usa ka Saksi. Usa ka sulat gikan sa California, U.S.A., miingon: “Ang akong asawa ug ako nakadangat sa kamatuoran nga kapin na sa 35 ka tuig, ug kami matinuorong makaingon nga wala pa kami makabatog publikasyon nga ingon niini ka makapahinam.”
Ang libro makatabang gayod sa pagpukan sa kabakakan nga ang mga Saksi ni Jehova dili motuo kang Jesus. Usa ka mapasalamatong magbabasa mikomento niining paagiha: “Dili ko makabutang niini, kay kini ang labing dakong tubag sa pagkaignorante niadtong kinsa moingon nga ang katawhan ni Jehova dili motuo o mopasidungog kang Jesu-Kristo. Ang himoon lang nato karon mao ang pagpahimutang niini diha sa ilang kamot niining tubag sa ilang pagkaignorante.”
Sa pagkatinuod kining libroha bililhon kaayo diha sa ministeryo sa mga Saksi ni Jehova. “Gihatagan nako ug usa ka kopya niini ang usa ka babaye nga akong ginatun-an sa Bibliya,” misulat ang usa ka Saksi, “ug ang epekto niini diha kaniya maorag milagro. Siya nagatuon sa mga usa ka tuig na, ug naglisod ako sa pagpatambong niya sa mga tigom.” Human nga nabasa sa estudyante ang 45 ka kapitulo sa bag-ong libro, ang Saksi miasoy, “miingon siya kanako nga siya motambong na sa tigom sa Dominggo tungod kay panahon na alang kaniya nga mobarog.”
Bililhong mga Bahin
Sa pagkatinuod, Ang Labing Bantogang Tawo nga Nabuhi Sukad nagatagana ug usa ka komentaryo sa mga Ebanghelyo. Ang mga pagpatin-aw sa daghang butang nga gisulti ug gitudlo ni Jesus gitagana, sa ingon ang basahon magamit ingong usa ka bililhong gamit sa panukiduki, kay kini suod nga nagsubay sa mga asoy sa Bibliya.
Ang usa ka linain maayong bahin sa paninugdan mao nga ang tanan giasoy sumala sa pagkasunodsunod sa panahon nga nahitabo. Ang yanong pagpakli sa mga panid sa basahon uban niini sa hunahuna maoy usa gayod ka tabang sa pag-ila kon kanus-a, sa pagdagan sa ministeryo ni Jesus, nga nahitabo ang pila ka hitabo. Ang mga magbabasa sa mga Ebanghelyo sagad nakasugat ug daw mga panagsumpaki. Ang bag-ong libro, bisag wala kaayo mohatag ug dakong pagtagad niini, nagapaharmoniya niana diha sa presentasyon niini.
Ingong mga Kristohanon, tinong dili gayod nato buot nga mapasagdan ang maampingong pagtuon sa kinabuhi sa atong matinumanong Panig-ingnan, si Jesu-Kristo. Busa, atong palandongon pag-ayo ang mga asoy sa Ebanghelyo uban sa tabang sa bag-ong librong Ang Labing Bantogang Tawo nga Nabuhi Sukad.