Dapita ang Uban sa Pagsunod sa Labing Bantogang Tawo
1 Sa Mateo 5:14, si Jesus nag-ingon sa iyang mga tinun-an: “Kamo mao ang kahayag sa kalibotan.” Ang mga sumusunod ni Jesus mosulti gayod sa katawhan bisan diin bahin sa mahigugmaong tagana ni Jehova alang sa kaluwasan pinaagi kang Jesus. Uban niana sa hunahuna, sa Disyembre atong gipaabot ang pagtanyag sa librong Ang Labing Bantogang Tawo nga Nabuhi Sukad. Ania ang pipila ka sugyot nga mahimong buot nimong gamiton.
2 Human ipailang kaugalingon, makaingon ka:
◼ “Daghan ang nahibulong kon sama sa unsa si Jesus sa dihang siya nagkinabuhi ingong tawo sa yuta. Sa imong hunahuna sa unsang mga paagi siya lahi sa uban? [Tugoting motubag.] Kining libroha, Ang Labing Bantogang Tawo nga Nabuhi Sukad, nagaasoy sa iyang kinabuhi ug ministeryo, ug nagasaysay kon unsang matanga sa tawo siya. Human mabasa kini, ang pipila mibating maorag sila nakahigayon sa pagpakig-uban kaniya sa personal.” Ipunting ngadto sa unang ilustrasyon sa libro. Dayon paklia ngadto sa pasiuna, ug basaha ang ikaduhang parapo ubos sa sub-ulohang “Mga Kaayohan sa Pagtuon Mahitungod Kaniya.” Itanyag ang libro.
3 O makaingon ka ug sama niini:
◼ “Sulod niining panahona ang mga tawo nagahunahuna mahitungod kang Jesus. Bisan pa niana, tungod kay daghan kaayong daotang mga butang ang nagakahitabo sa tibuok kalibotan, ang pipila hayan mahibulong kon si Jesus nagatagad ba gayod kanato. Unsay imong pagbati bahin niana?” Tugoting motubag. Pakliang kapitulo 24 sa librong Labing Bantogang Tawo, ug hisgoti sa mubo kon nganong mianhi si Jesus sa yuta. Unya basaha ang Juan 15:13, nga nagapasiugda sa kinasingkasing nga gugma ni Jesus sa uban. Batoni ang kinabag-ohang mga magasin, usa ka brosyur, o usa ka tract nga ikatanyag kon dili dawaton ang libro.
4 Ania ang laing sugyot:
◼ “Kadaghanan sa mga batan-on nagalantaw ug mga sumbanan aron sundon, apan ang maayong mga sumbanan malisod pangitaon. Si Jesu-Kristo nagapahilunag hingpit nga panig-ingnan alang sa tanan. [Basahang 1 Pedro 2:21.] Ang iyang tibuok nga kinabuhi nasentro diha sa pagsimba sa iyang langitnong Amahan. Unsay imong hunahuna nga mahisama unya kon dugang mga tawo ang nagsulay nga mahisama kaniya?” Tugoting motubag. Isaysay kon sa unsang paagi ang librong Labing Bantogang Tawo makatabang kanatong tanan aron mahimong mas maayong mga Kristohanon.
5 Hayan buot nimong gamiton ang sama niini:
◼ “Sa dihang hisgotan sa usa si Jesu-Kristo, daghang tawo ang nagahunahuna kaniya ingong usa ka bata o ingong usa ka nagaantos nga tawo nga hapit nang mamatay. Ang ilang hunahuna bahin kang Jesus nagalangkit lamang sa iyang pagkahimugso ug pagkamatay. Apan ang nalampos ni Jesus sulod sa iyang tibuok kinabuhi nagaapektar sa matag tawo sa yuta. Mao kana kon nganong hinungdanon nga makat-onan nato kutob sa atong maarangan ang bahin sa kahibulongang mga butang nga iyang gibuhat alang kanato.” Basahang Juan 17:3. Paklia ang unang panid sa pasiuna sa librong Labing Bantogang Tawo, ug basaha ang ikaupat nga parapo. Isaysay kon sa unsang paagi ang libro mabatonan ug magamit alang sa personal nga pagtuon.
6 Seguroang makahupot ug usa ka talaan sa interes aron nga makahimo ka ug mga balikduaw. Magmasiboton gayod kita sa pagtabang sa mabuot-kasingkasing nga mga tawo aron mahimong mga sumusunod sa atong Manluluwas, si Jesu-Kristo.—Mat. 16:24.