Ipahayag ang Kulba-hinam nga Mensahe sa Pinadayag

¹ Ang librong Pinadayag nagatabang kanato sa pagsabot sa kulba-hinam nga mensahe nga narekord sa basahon sa Pinadayag. Tabangi ang uban sa pagpabili sa maong mensahe pinaagig pagpaila niining libroha diha sa ministeryo sulod sa Marso. Makaplagan nimong mapuslanon ang mosunod nga mga sugyot sa pagpangandam sa imong presentasyon.

² Human sa tukmang pagtimbaya, makaingon ka niini:

◼ “Nadunggan na ba nimo ang bahin sa upat ka magkakabayo sa Pinadayag? [Tugoting motubag.] Nahibalo ka ba nga kining maong simbolikong mga magkakabayo maoy bahin sa usa ka tagna sa Bibliya nga nagatagnag mga hitabo sa atong panahon? [Tugoting motubag.] Interesado ka ba nga makasabot niining tagnaa ug kon unsay kahulogan niini nganhi kanato?” Kon ang interes gipakita, ikapunting nimo ngadto sa mga ilustrasyon sa kapitulo 16 sa Pinadayag nga libro ug ipatin-aw ang pipila ka bersekulo diha sa tataw nga letra. O makakomento ka sa pipila ka bahin sa panan-awon pinaagig paggamit sa tract nga Kini Bang Kalibotana Molungtad? Itanyag ang libro ug hikayang makabalik aron makahisgot ug dugang bahin sa panan-awon ug sa kahulogan niini.

³ O tingali buot nimong sulayan ang paagi nga sama niini:

◼ “Nadungog na ba nimo ang terminong ‘Armageddon’? [Tugoting motubag.] Daghan ang nagahunahuna nga kini nagatumong sa usa ka nukleyar nga gubat tali sa mga gahom sa kalibotan. Sa pagkatinuod, ang Armageddon maoy usa ka butang nga lahi gayod. Sumala sa Bibliya, kini magakahulogan ug dagkong mga kausaban, nga mosangpot sa usa ka kalibotan sa malungtarong kalinaw.” Depende sa pagsanong tawo, ikapunting mo ang usa ka kasulatan sama sa Pinadayag 16:16 o Salmo 37:10, 11 ug unya pakliang kapitulo 39 sa librong Pinadayag. Kon gipakita ang interes, itanyag ang libro. Kon wala, tagda ang tukmang mga puntos diha sa tract nga Kini Bang Kalibotana Molungtad?

⁴ Mahimong mapukaw nimo ang interes pinaagig paggamit niining sugyota:

◼ “Sulod niining bulana, daghang tawo ang nagahunahuna bahin sa kamatayon ug pagkabanhaw ni Jesu-Kristo. Nahibulong ka ba kon unsa ang iyang ginabuhat sukad sa iyang pagkabanhaw? Daghang hitabo sa atong adlaw nalambigit sa presenteng papel ni Jesus diha sa katuyoan sa Diyos. Ang pipila niana ginahubit sa basahon sa Pinadayag. Buot ba nimong makakat-on pa ug dugang maylabot sa katuyoan sa Diyos sa pagpadala sa iyang Anak sa yuta ug kon unsay kahulogan niana alang kanimo ug sa imong mga minahal?” Mahimong madala nimo ang pagtagad ngadto sa mga parapo 1 ug 2 sa kapitulo 41 sa librong Pinadayag o ipatugbaw ang tukmang mga puntos gikan sa kinabag-ohang mga gula sa Ang Bantayanang Torre o Pagmata! O buot nimong gamiton ang tract nga Kinabuhi sa Malinawong Bag-ong Kalibotan sa pagpukaw sa dugang interes.

⁵ Seguroa nga madapit ang bisan kinsa nga nagapakitag interes sa pagtambong sa Memoryal. Uban sa panalangin ni Jehova, makahimo ka sa pagtabang sa usa sa ‘pagpaminaw sa mga pulong niini nga propesiya ug mosunod sa mga butang nga nahisulat niini.’​—Pin. 1:3.