Hupti ang Positibong Tinamdan
1 Pagkamakapahinam ang pagbasa nato sa kahibulongang mga pag-uswag nga nagakahitabo sa daghang kayutaan! Bisan pa niana, kita nakaamgo nga sa pipila ka dapit ang mga magmamantala sa Gingharian sagad makahibalag sa pagkawalay-pagtagad o pagbatok pa gani sa atong pagwaling buluhaton. Unsaon man nato sa paghupot ug positibong tinamdan kon kini mao ang kahimtang sa atong teritoryo? Unsaon man nato pagsanta ang negatibong tinamdan nga maghikaw kanato sa atong kalipay o magsumpo sa atong kasibot sa buluhaton nga paghimog mga tinun-an?
2 Ang positibong tinamdan magatabang kanato sa paghupot sa atong pagkatimbang. Bisan ubos sa masulayong mga kahimtang, dili nato angayng tugotan ang negatibong mga panghunahuna sa pagdominar sa atong panglantaw. Si Jesus mipahilunag hingpit nga sumbanan alang kanato. Pipila lamang ka tawo ang midawat kaniya. Daghan ang napandol sa iyang pagpanudlo. Ang relihiyosong mga pangulo naglaraw sa pagpatay kaniya. Siya gilud-an, gitamay, gibunalan, ug sa kadugayan gipatay. Apan, nakaplagan niya ang kalipay sa iyang buluhaton. Ngano man? Iyang giila ang kahinungdanon sa pagbuhat sa kabubut-on sa Diyos, ug wala siya mohunong.—Juan 4:34; 13:17; Heb. 12:2.
3 Mentinaha ang Tukmang Panglantaw sa Atong Ministeryo: Sa pagbuhat niini, kinahanglan natong hinumdoman nga kita adunay usa ka mensahe nga isalikway o supakon sa kadaghanang tawo. (Mat. 13:14, 15) Bisan pag ang mga apostol opisyal nga gimandoan sa paghunong sa pagpanudlo pinasukad sa ngalan ni Jesus, sila nagpadayon sa pagwali, ug ang pag-ani nagapadayon. (Buh. 5:28, 29; 6:7) Kita nakahibalo nang daan nga, sa pipila ka teritoryo, diyutay rang tawo ang magpatalinghog. (Mat. 7:14) Busa, may hinungdan kita sa pagmaya kon usa lamang ka tawo sa atong teritoryo ang magapatalinghog sa atong mensahe. Hinumdomi, usab, nga bisan pa kadtong mosupak kinahanglang mahatagag kahigayonan sa pagpatalinghog. (Ezek. 33:8) Ang pipila ka magsusupak sa kadugayan mausab ug mahimong mga magsisimba ni Jehova. Nan, kon sa tukma lantawon, ang atong ministeryo magadala kanatog katagbawan, bisan kon diyutay ra ang magpatalinghog. Ang pagkaanaa lamang nato diha sa mga pultahan uban sa mensahe sa Gingharian sa Diyos maoy usa na ka pamatuod.—Ezek. 2:4, 5.
4 Aduna kitay maayong katarongan nga magbaton ug positibong panglantaw. Ang kauswagan sa tibuok kalibotang buluhaton ug ang pagkaduol na sa dakong kasakitan angay nga magtukmod kanato sa pagbuhat sa atong labing maarangan. (2 Ped. 3:11, 14) Buot usab nato nga ang mga bag-ong nakig-uban magmapositibo sa paggamit kon unsay ilang nakat-onan. Kon ang pipila sa atong mga gitun-an sa Bibliya miuswag ngadto sa punto nga mahimo nang dili-bawtismadong mga magmamantala, ang bulan sa Agosto maoy maayong panahon sa pagpasugod kanila.
5 Bisan kon nagaalagad ingong mga magmamantala o mga payunir, maoy maayo ang paghupot sa hunahuna nga ang gipangayo ni Jehova kanato dili mabug-at. (1 Juan 5:3) Siya nagasaad sa pagsustento kanato. (Heb. 13:5b, 6) Bisan pa sa dayag nga kawalay-pagtagad, kinahanglang kita positibo ug magapadayon sa pagwali tungod kay kana maoy kabubut-on sa Diyos nga buhaton nato.—1 Tim. 2:3, 4.