Mga Panalangin nga Nagagikan sa Pagbuhat Duyog sa Uban
1 Gibati ba nimong adunay mga benepisyo nga mapahimuslan sa pagbuhat nga duyog sa uban diha sa ministeryo? Gibati kana ni Jesus. Bisan pag ang alanihon dako ug ang mamumuo diyutay ra, iyang gipadala ang 70 ka tinun-an ngadto sa uma “nga tinagduha.” Pagkamagantihong higayon ang nabatonan nilang tanan sa pagsangyaw sa “matag siyudad ug dapit nga didto siya mismo moadto”!—Luc. 10:1, 17; Mat. 9:37.
2 Makapadasig gayod ang pagbuhat duyog sa uban. Ang pipila kanato maoy maulawon ug malisdan sa pagduol sa mga estranghero. Ang pagbaton ug usa sa atong kiliran makahatag kanato ug pagsalig sa pagsulting maisogon sa Pulong sa Diyos. Kon may kauban kita, mahimong mas sayon alang kanato sa pagtuman sa buluhaton diha sa paagi nga kita nabansay. (Prov. 27:17) Ang maalamong tawo nag-ingon: “Ang duha labing maayo kay sa usa.”—Eccl. 4:9.
3 Maoy maayo nga magabuhat nga duyog sa nagkalainlaing magmamantala ug payunir. Ang mga kauban sa pag-alagad ni apostol Pablo naglakip kang Bernabe, Silas, Timoteo, ug Juan Marcos, ug sila nagpahimulos sa daghang panalangin samtang duyog nga nagasangyaw. Ang sama matinuod usab karon. Nakabuhat ka ba nga duyog sa usa nga dugay na sa kamatuoran? Human nga mapanid-an ang iyang kahanas sa pagpamatuod, hayan ikaw nakakuhag pipila ka maayong ideya nga nakatabang kanimo sa pag-uswag. Nakakuyog ka ba sa mga magmamantala nga may pagkabag-ohan pa? Nan mahimong napaambit nimo ang imong nakat-onan ug busa natabangan sila nga labawng magmaepektibo ug makakaplag ug mas dakong kalipay sa ilang ministeryo.
4 Nagadumala ka ba karon ug usa ka pagtuon sa Bibliya? Kon mao, nganong dili dapiton ang usa sa mga ansiyano o ang magtatan-aw sa sirkito sa pag-uban kanimo? Makaayo sa atong mga estudyante sa Bibliya nga makasinati sa mga magtatan-aw. Kon ikaw mag-ukon-ukon sa pagdumala sa pagtuon atubangan sa usa ka ansiyano, tingali andam siya nga modumala niana ug tugotan ka nga maniid. Pagkahuman, pangayoa ang iyang mga sugyot kon sa unsang paagi ikaw makaabag sa mas tuling pag-uswag sa estudyante.
5 Mahimong madasigong kauban sa dihang nagabuhat duyog sa uban. Magmapositibo sa imong mga komento maylabot sa teritoryo. Ayaw gayod pagtabi bahin sa uban o magreklamo bahin sa mga kahikayan sa kongregasyon. Padayong ipunting ang imong hunahuna sa ministeryo ug mga panalangin gikan kang Jehova. Kon buhaton nimo, ikaw ug ang imong mga kauban mouli nga narepreskohan sa espirituwal.
6 Ang imong mga kahimtang basin magpalisod kanimo sa pagbuhat nga makanunayon duyog sa uban. Bisan pa niana, kon ikaw makahimo, nganong dili sulayang magbaton ug pipila ka panahon sa pagbuhat nga duyog sa laing magmamantala? Kamong duha mapanalanginan gayod!—Roma 1:11, 12.