Pagtabang sa Uban sa Pagkaplag sa Diyos
1 Si Jehova nagtagana kanato ug dagayang espirituwal nga pagkaon aron pagtabang sa katawhan sa pagkaplag kaniya. (Buh. 17:27) Sa Enero atong itanyag ang librong Pagpangita sa Katawhan sa Diyos o, ingong kapilian, ang librong Matuod nga Kalinaw ug Kasegurohan. Ang mosunod nga mga sugyot motabang kanato nga magmaandam sa pagpakita sa atong mga silingan sa panginahanglan sa “pagpangita kang Jehova” ug sa “pagsangpit kaniya samtang anaa pa siya sa duol.” (Isa. 55:6) Ang mga sugyot mahimong ipahaom sa lokal nga mga kahimtang.
2 Sa dihang nagatanyag sa librong “Pagpangita sa Katawhan sa Diyos,” makasugod ka pinaagig pag-ingon:
◼ “Makapainteres ang pakighimamat sa mga tawo sa nagkalainlaing relihiyon. Apan dili ka ba mouyon nga sagad ang mga tawo yano lamang nagasunod sa relihiyon sa ilang mga ginikanan inay kay sa pagpangita sa Diyos sa ilang kaugalingon? [Tugoting mokomento.] Kining libroha, Pagpangita sa Katawhan sa Diyos, nagasaysay sa sinugdan ug mga pagtulon-an sa dagkong mga relihiyon. Kini nagatubag sa mga pangutanang gikinahanglan natong tanan nga mahibaloan aron sa pagpangita sa Diyos.” Paklia ngadto sa panid 17, parapo 28; ug ipakita ang lima ka pangutana nga gitagad sa libro. Unya itanyag ang libro.
3 O, human nga ikapaila ang kaugalingon ikaw makaingon:
◼ “Tungod sa daghan kaayong relihiyon karon, nahibulong ka ba kon sa unsang paagi kita makaseguro kon giuyonan ba sa Diyos ang atong relihiyon?” Human sa pagkomento sa tagbalay, itumong ang iyang pagtagad ngadto sa kahon sa panid 377 sa librong Pagpangita sa Katawhan sa Diyos, nga nagapakita sa napulo ka paagi sa pag-ila sa matuod nga relihiyon, nga nagmatikod ilabina sa punto numero 7. Suknaang tagbalay kon siya mouyon ba nga ang usa nga nagabuhat sa matuod nga relihiyon angayng mobati nianang paagiha bahin sa ubang mga rasa ug mga nasyonalidad. Kon motugot ang panahon, tan-awa ang mga kasulatan nga gisitar, unya itanyag ang libro.
4 Daghan ang nakakaplag nga ang pagpakli ngadto sa usa ka kapitulo sa librong Pagpangita sa Diyos nga nagahisgot sa relihiyon sa tagbalay makatabang sa pagsikop sa iyang pagtagad. Hayan buot nimong sulayan kini sa dihang nagatanyag sa libro.
5 Kon ikaw nagagamit sa librong “Matuod nga Kalinaw ug Kasegurohan—Sa Unsang Paagi Imong Makaplagan?,” hayan buot nimong sulayan kini:
◼ “Ang matag usa buot gayod nga magkinabuhi sa usa ka kalibotan nga adunay kalinaw ug kasegurohan. Ikasubo ang pagsulti, nga wala nato kana masinatii sa atong kinabuhi. Unsay imong hunahuna nga kinahanglan natong buhaton aron mahimong usa ka katinuoran ang kalinaw ug kasegurohan? [Tugoting motubag.] Ang Diyos may gahom sa pagpahinabog kalinaw niining yutaa, ug siya nagsaad nga iya kanang buhaton.” Paklia ngadto sa hulagway sa panid 98, ug unya basahang Miqueas 4:3, 4. Itanyag ang libro, ug hikayang usa ka balikduaw.
6 Ang atong mga basahon nagpalihok sa linibong katawhan sa mas suod pang pagsusi sa Bibliya sa ilang pagpangita sa Diyos. Maoy atong pribilehiyo ang pagtabang kanila sa Enero.