Pagkuhag Kaayohan Gikan sa Atong mga Pakigpulong Publiko
1 Ang modernong kasaysayan sa mga Saksi ni Jehova tukmang gihubit diha sa Proverbio 4:18: “Ang dalan sa matarong sama sa kahayag nga nagakahayag ug nagakahayag hangtod sa pagkahingpit sa adlaw.”
2 Lagmit nga imong ikaasoy ang mga pananglitan kon sa unsang paagi kini tinuod sukad nga ikaw misugod sa pagpakig-uban sa katawhan ni Jehova. Ang mga tigom sa kongregasyon, apil ang mga pakigpulong publiko, nagatabang kanato sa pagsignunot sa nagauswag nga kahayag sa kamatuoran nga gitagana pinaagi sa “kasaligan ug mabuot nga ulipon.”—Mat. 24:45-47.
3 Bag-ong Materyal: Ang Sosyedad kanunayng nagabag-o sa mga laraw sa pakigpulong publiko. Ang lab-as nga materyal ginalakip ug ang hinungdanong mga puntos gitin-aw. Busa ang mga igsoon nga mohatag ug mga pakigpulong publiko sa kongregasyon kinahanglang mogamit lamang sa labing ulahing mga laraw aron ang ilang materyal kanunayng bag-o.
4 Aron makapahimulos sa bug-os gikan sa mga pakigpulong publiko, sulayi pagsubli ang labing ulahing impormasyon gikan sa mga publikasyon bahin sa ulohan nga hisgotan sa maong semana. Dayon, samtang maminaw sa pakigpulong, dahoma ang kaugmaran niining impormasyona. Matikdi ang bisan unsang bag-ong mga paagi sa pagpresentar nianang mga kamatuorana nga magamit sa umaabot. Kini magpaseguro nga ang pakigpulong makahupot sa imong interes ug makahimog praktikal nga kaayohan nganha kanimo sa personal.
5 Ang mga Pakigpulong Publiko Kinahanglang Magpasibot sa mga Mamiminaw: Sa dihang misulti si Jesus, iyang giabot ang mga kasingkasing sa iyang mga mamiminaw. Sa paniklop sa Wali sa Bukid ni Jesus, ang Mateo 7:28 nagtaho: “Ang epekto mao nga nahingangha ang mga panon sa katawhan sa iyang paagi sa pagpanudlo.”
6 Nga maghinumdom sa panig-ingnan ni Jesus, ang mga lawas sa mga ansiyano kinahanglang mag-amping sa pag-aprobar ug bag-ong mga mamumulong sa publiko, nga magtudlo lamang niadtong mga igsoon nga maayong mga magtutudlo, nga suod nga mosunod sa mga laraw sa Sosyedad ug makahupot sa pagtagad sa mamiminaw.
7 Ingon sa gitagna sa Isaias 65:13, 14, ang espirituwal nga tingusbawan sa katawhan sa Diyos magpadayon nga mahimong mas tataw. Ang kahikayan sa mga pakigpulong publiko maoy usa sa daghang paagi nga kita “gitudloan ni Jehova.”—Isa. 54:13.