Pangutana

◼ Angay bang ipasa sa mga Saksi ni Jehova ang girekord o gikopya nga mga pakigpulong?

Kita nalig-on ug nadasig sa mga pakigpulong sa Bibliya. (Buh. 15:32) Busa gusto natong ipaambit kining makapadasig mga impormasyon sa mga wala makatambong. Tungod kay daghan nang gamit sa pagrekord karon, ang pakigpulong dali na lang irekord ug ipasa sa uban. Ang uban nagtigom ug girekord nga mga pakigpulong, lakip na kadtong gipahayag daghang tuig nang milabay, ug ila kining gipahulam sa ilang mga higala o gihatagan silag kopya niini. Ang uban naghimog mga Web site ug gibutang didto ang mga pakigpulong aron ma-download sa uban.

Siyempre, walay daotan kon magrekord tag mga pakigpulong nga atong magamit ug sa atong pamilya. Mahimo ganing magrekord ang mga ansiyano para sa masakitong mga membro sa kongregasyon nga dili makatambong. Apan dili nato ipasa ang girekord o gikopya nga mga pakigpulong tungod sa maayong mga katarongan.

Ang mga pakigpulong sagad gipahiuyon sa lokal nga mga panginahanglan, busa mahimong masaypan nato pagsabot ang mga punto diha sa rekording kay wala man kita mahibalo sa mga kahimtang sa dihang gipahayag kini. Malisdan usab kita sa pagtino kon kinsay nagpakigpulong ug kon kanus-a kini gipakigpulong, aron makasalig kita nga bag-o ug tukma ang mga impormasyon niini. (Luc. 1:1-4) Dugang pa, ang pagpasa ug girekord o gikopya nga mga pakigpulong makaaghat sa uban sa paghatag o pagdawat ug dili angayng pagtagad ug pasidungog.—1 Cor. 3:5-7.

Ang matinumanon ug maalamong ulipon naningkamot sa pagtaganag espirituwal nga pagkaon sa hustong sukod ug sa “hustong panahon.” (Luc. 12:42) Lakip niini ang mga pakigpulong diha sa mga kongregasyon sa mga Saksi ni Jehova, ug mga audio recording nga ma-download gikan sa opisyal nga Web site nga jw.org. Makasalig kita nga ang matinumanon ug maalamong ulipon ug ang Nagamandong Lawas niini magtagana sa atong panginahanglan aron malig-on ang atong pagtuo.—Buh. 16:4, 5.