Malipayong Dayega si Jehova sa Adlaw-Adlaw!
1 Ang makalilisang nga kalangitan nagapahayag sa himaya ni Jehova sa “adlaw ngadto sa laing adlaw.” (Sal. 19:1-3) Kon ang walay-tingog, walay-kinabuhing mga linalang kanunayng nagadayeg kang Jehova, dili ba angay nga kitang intelihenteng mga tawo mobating matandog sa pagbayaw sa atong tingog sa pagdayeg kaniya sa tanang panahon alang sa iyang di-hitupngang mga hiyas ug mga kalamposan? Kinsa ba ang labaw pang takos sa atong malipayong pagdayeg kay sa atong halandong Maglalalang?—Sal. 145:3, 7.
2 Sa Adlaw-Adlaw: Ang inspiradong salmista misulat: “Sa adlaw-adlaw imantala ang maayong balita sa kaluwasan pinaagi niya. Kay si Jehova dako ug takos kaayo sa pagdayeg.” (Sal. 96:2, 4) Kini ba mapadapat lamang sa mga payunir? Dili! Kini ba nagapasabot nga kitang tanan kinahanglang mosugid ngadto sa uban bahin kang Jehova bisan kanus-a ug bisan diin kita makahimo niini, bisan sa mga adlaw nga wala kita moduyog sa ministeryo sa kabalayan? Oo! Ang panginahanglan sa pagdayeg kang Jehova sa matag adlaw ug pagsugid sa uban bahin sa iyang pamaagi sa kaluwasan maoy dinalian. Ang katawhan kinahanglang mahibalo nga si Jehova mao ang Hari sa Walay Kataposan ug nga Siya mihatag na sa pagmando sa kalibotan ngadto sa Iyang hinimayang Anak, si Jesu-Kristo. Ang gugma alang kang Jehova ug sa katawhan maoy padayong magpasulti kanato bahin niining maong mensahe ug bahin sa iyang mga tagana alang sa kaluwasan sa bisan asa nga adunay mga tawong makaplagan.—Sal. 71:15.
3 Matag adlaw sa iyang yutan-ong ministeryo, si Jesu-Kristo nagpahimutang sa labing maayong panig-ingnan ingong dayag nga magdadayeg kang Jehova. Siya miingon: “Ako sa dayag nagadayeg kanimo, Amahan, Ginoo sa langit ug yuta.” (Mat. 11:25) Ingong katinuoran sa iyang pulong, bisan asa si Jesus, siya naghimaya kang Jehova sa publiko. Ug bisan diin managpundok ang mga panon sa katawhan—sa mga sinagoga man, sa templo sa Jerusalem, sa ibabaw sa bukid, o sa kabaybayonan—siya midayeg kang Jehova. Kon suod natong sundon ang mga lakang ni Jesus pinaagi sa pagmentinar sa adlaw-adlaw, masubayong kalihokan sa publikong paghimaya kang Jehova, atong masinati ang mangayaon, malipayong mga resulta.
4 Pagsanong sa Pagdapit: Ikaw ba mosanong sa pagdapit sa pagdayeg kang Jehova sa publiko sa matag adlaw? Hinumdomi, ang edad dili babag. Ang Salmo 148:12 nagadapit sa batan-ong mga lalaki, mga ulay, mga tigulang, ug mga batang lalaki sa pagdayeg kang Jehova. Mga batan-on, inyo bang dayegon si Jehova taliwala sa mga eskulmet ug mga magtutudlo panahon niining bag-ong tuig sa pagtungha? Mga hingkod, ang inyo bang kaubanan sa trabaho nagapakadungog bahin kang Jehova ug sa iyang mga katuyoan, sa dihang adunay tukmang panahong magkahisgotay? Kitang tanan kinahanglang maghimo sa pakighisgot maylabot kang Jehova ingong bahin sa atong kinabuhi sama ra sa pagginhawa ug pagkaon. Bisan pa kon ang walay-pagtagad nga mga tawo dili manumbaling sa atong ginasulti, adunay Usa nga nagapatalinghog, ug siya magaganti kanato.—Mal. 3:16.
5 Samtang nagakaduol ang kataposan ning sistemaha, ang pagdapit nagaabot ngadto sa kinatumyan sa yuta: “Dayega si Jah, kamong katawhan!” (Sal. 106:1) Hinaot nga ang atong singgit sa pagdayeg labaw pang mokusog sa matag pag-agi sa adlaw aron ang tanan mahibalo nga ang Usa kansang ngalan mao si Jehova mao ang Hataas Uyamot ibabaw sa tibuok yuta.—Sal. 83:18.