Ginasuta ni Jehova—Nganong Makaayo?
1 Ang matag usa nagapangandoy sa maayong panglawas. Bisan pa, daghan kinsa nakapahimulos na sa maayong panglawas sa gihapon magpakonsulta sa pupanahon. Ngano? Nagatinguha sila nga mamatikdan ang bisan unsang pag-ugmad sa mga problema sa kahimsog aron nga kini maayo. Maoy labaw pa gayod ka hinungdanon nga mapanalipdan ang atong kahimsog sa espirituwal. Ang pag-uyon ni Jehova nagaagad sa padayong “mamahimsog sa pagtuo.”—Tito 1:13.
2 Karon ang tukmang panahon nga magpasuta ni Jehova. Ngano man? Tungod kay si Jehova anaa sa iyang balaan nga templo, ug siya nagasuta sa mga kasingkasing sa tanang tawo. (Sal. 11:4, 5; Prov. 17:3) Sama kang David, atong ginahangyo si Jehova nga tagaan kita sa bug-os nga pagsuta: “Sutaon mo ako, Oh Jehova, ug sulayan mo ako; ulaya ang akong mga amimislon ug ang akong kasingkasing.”—Sal. 26:2.
3 Kita kinahanglang mag-amping batok sa mga hulga sa atong espirituwal nga kahimsog nga tingali maggikan sa atong kinasuloran tungod sa atong di-hingpit nga unod. Ang Proverbio 4:23 nagatambag: “Labaw sa tanan nga pagabantayan, ampingi ang imong kasingkasing, kay gikan niini mao ang mga tuboran sa kinabuhi.”
4 Ang atong espirituwal nga kahimsog usab mahimong mahulga pinaagi sa daot, imoral nga kalibotan nga nagapalibot kanato. Kon tugotan nato ang atong kaugalingon nga masuod kaayo niining daotang sistema, kita mahimong mosugod sa paghunahuna sama sa panghunahuna niini ug mag-ugmad sa kalibotanong mga tinamdan. O kita mahimog mosagop sa usa ka kalibotanong estilo sa kinabuhi ug matakdan sa espiritu sa kalibotan.—Efe. 2:2, 3.
5 Si Satanas mahimong maggamit sa pagpanglutos sa paningkamot nga mapukan kita sa espirituwal. Sa kasagaran gayod, siya malipotong nagagamit sa kalibotanong mga pangibog aron sa paghaylo kanato. Si Pedro nagaawhag kanato sa ‘padayong paghupot sa atong panimuot ug magmabinantayon,’ sanglit si Satanas maoy “sama sa usa ka leon nga nagangulob, nga nagapangita ug usa nga matukob.” Kita gidasig nga ‘bumarog batok kaniya, magpabiling lig-on diha sa pagtuo.’—1 Ped. 5:8, 9.
6 Adunay panginahanglan sa pagpanalipod sa atong espirituwal nga kahimsog pinaagi sa padayong paghupot sa atong pagtuo nga lig-on ug sa pagpalig-on niini matag adlaw. Ang apostol nga si Pablo nagarekomendar nga atong sulayan ang atong pagtuo nga mapinadayonon. Sama gayod nga kita maalamong magsunod sa praktikal nga pahimangno nga ihatag kanato sa kasaligang doktor, kita usab maminaw ni Jehova sa dihang ang Iyang espirituwal nga pagsuta magpadayag ug usa ka problema nga nanginahanglang tul-iron. Kini magpaposible alang kanato sa “pagkanapasibo ug balik.”—2 Cor. 13:5, 11.
7 Si Jehova sa pagkatinuod mao ang dakong Tagsuta. Ang iyang pagpanusi maoy tukma kanunay. Pinaagi sa iyang Pulong ug ‘ang matinumanong ulipon,’ siya nagalagda ug usa ka mahimsog espirituwal nga pagkaon. (Mat. 24:45; 1 Tim. 4:6) Ang regular nga pagkaon niining maong kalan-on sa balay ug sa mga tigom sa kongregasyon magpahimo kanatong mahimsog sa espirituwal. Ang regular nga ehersisyo sa espirituwal diha sa ministeryo makaayo usab. Busa, atong ginadawat ang regular nga pagsuta ni Jehova, masaligon nga siya padayong magahupot kanato diha sa labing maayong espirituwal nga kahimsog.