Buhata ang Tanang Butang Alang sa Himaya sa Diyos
1 Pagkamakapahayahay ang pakig-uban sa atong mga igsoon! (1 Cor. 16:17, 18) Atong ginahimo kini diha sa mga tigom, mga asembliya, ug diha sa ministeryo. Kita usab nagapakigsandurot sa dihang adunay atong mga bisita nga moduaw sa atong panimalay. Sa paghimo sa ingon, atong ginapakita ang pagkamaabiabihon ug nagadasigay sa usag usa.—Roma 12:13; 1 Ped. 4:9.
2 Organisadong Sosyal nga mga Kalihokan: Kita man “magakaon o magainom o magabuhat sa unsa pang mga butang,” kinahanglan natong ‘himoon ang tanang butang alang sa kahimayaan sa Diyos.’ (1 Cor. 10:31-33) Kining tambaga wala tumana sa pipila, busa ang mga problema sagad motungha tungod sa dagkong sosyal nga mga tapoktapok diin gipatugbaw ang kalibotanong kalingawan. Kini nahisama kaayo sa kalibotanong mga kalihokan, nga ang espiritu niini wala mahiuyon sa mga prinsipyo sa Bibliya.—Roma 13:13, 14; Efe. 5:15-20.
3 Gikataho nga adunay dakong gidaghanon sa mga Saksi nga nagtapok sa inabangang mga pasilidad diin sila gilingaw pinaagi sa eskiting, pagsayaw, ug pagkaon. Tungod sa kalisod sa tukmang pagdumala sa maong dagkong mga grupo, ang mga problema mitungha. Ang pagpinilyo, pagpatuyang sa alkoholikong mga ilimnon, ug gani nahitabo usahay ang imoralidad. (Efe. 5:3, 4) Ang maong sosyal nga mga tapoktapok wala magpasidungog kang Jehova. Hinuon, kini magdalag kaulawan diha sa kongregasyon ug magpapandol sa uban.—1 Cor. 10:23, 24, 29.
4 Ang mga Kristohanon gidasig sa pagpakitag pagkamaabiabihon, apan ang pagpasiugda kinahanglang mapunting diha sa espirituwal nga pagdinasigay. (Roma 1:11, 12) Ang ginagmayng mga salosalo kasagaran maoy labing maayo. Ang Atong Ministeryo nga libro nag-ingon sa mga panid 135-6: “May mga panahon, ang ubay-ubay nga mga banay dapiton ngadto sa usa ka panimalay alang sa Kristohanong panag-uban. . . . Nga makataronganon, silang mga naghikay o tagbalay kinahanglang mobati nga maoy sa personal responsable sa mga mahitabo. Sa paghinumdom niini, ang mailahong mga Kristohanon nakamatikod sa kaalam nga limitihan ang gidak-on sa maong mga grupo ug ang gidugayon sa maong mga katigoman.” Gipakita ni Jesus nga dili kinahanglang mag-andam ug daghang butang kon ang atong tumong mao ang pagdasig sa atong mga higala sa espirituwal.—Luc. 10:40-42.
5 Maoy usa ka maayong butang ang pagpakitag pagkamaabiabihon sa atong mga isigka-Kristohanon. Apan, adunay dakong kalainan tali sa kasarangang katigoman diha sa atong panimalay ug sa hinobrang kalihokan nga nagabanaag ug kalibotanong espiritu diha sa giabangang pasilidad. Sa dihang modapit ka sa uban ingong imong mga bisita, kinahanglang imong gamayon ang grupo aron imong maabaga ang bug-os nga responsabilidad kon unsa ang magakahitabo.
6 Pinaagi sa pagpakitag pagkamakasaranganon ug pagkamakataronganon diha sa sosyal nga mga kalihokan, kita makahimaya sa atong Diyos ug makapalig-on ngadto sa uban.—Roma 15:2.