Usa ka Sugo nga Atong Nabatonan

¹ Si Jesus nagsugo sa iyang mga sumusunod sa “paghimog mga tinun-an sa katawhan sa tanang kanasoran.” (Mat. 28:19) Sa 232 ka kayutaan ug mga grupo sa isla palibot sa yuta, kapin sa lima ka milyong magdadayeg ni Jehova nga Diyos ang nagataganag buhing pamatuod sa katumanan sa sugo ni Jesus. Apan komosta kita sa personal? Ato bang gihuptang seryoso ang sugo sa pagsangyaw?

² Usa ka Moral nga Obligasyon: Ang sugo maoy “usa ka mando sa pagbuhat sa gilagda nga kalihokan.” Kita gisugo ni Kristo sa pagsangyaw. (Buh. 10:42) Ang apostol Pablo nakaamgo nga nahipatong kaniya ang usa ka kinahanglanon, o moral nga obligasyon. (1 Cor. 9:16) Sa pag-ilustrar: Hunahunaa nga usa ikaw ka tripulante sa talilunod nga barko. Ang kapitan nagamando kanimo nga pasidan-an ang mga pasahero ug tultolan sila ngadto sa mga bote. Di ba nimo panumbalingon kanang sugoa ug sulayan lamang ang pagluwas sa imong kaugalingon? Dili gayod! Ang mga kinabuhi sa uban nameligro! Ikaw obligado sa moral nga paagi aron tumanon ang sugo sa pagtabang kanila.

³ Kita nakabaton ug diyosnong sugo sa pagpalanog sa pasidaan. Si Jehova sa dili madugay magatapos na niining tibuok daotang sistema sa mga butang. Ang minilyong kinabuhi nameligro! Tukma ba alang kanato nga di-tagdon ang kapeligrohan sa uban ug hunahunaon lamang ang pagluwas sa atong kaugalingon? Siyempre dili! Kita obligado sa moral nga paagi aron motabang sa pagluwas sa mga kinabuhi sa uban.​—1 Tim. 4:16.

⁴ Matinumanong mga Panig-ingnan nga Sundon: Ang propetang si Ezequiel mibatig responsabilidad sa paghatag ug mensahe sa pasidaan ngadto sa di-matinumanong mga Israelita. Si Jehova nagpasidaan kaniya sa mga sangpotanan kon siya mapakyas sa pagtuman sa iyang asaynment: “Sa dihang ako magaingon sa usang daotan, ‘Ikaw gayod mamatay,’ ug ikaw sa aktuwal dili magapasidaan kaniya . . . , siya ingong daotan, sa iyang kasal-anan siya mamatay, apan ang iyang dugo panilngon ko gikan sa imo gayong kamot.” (Ezeq. 3:18) Si Ezequiel matinumanong mituman sa iyang buluhaton bisan pa atubangan sa matig-ang pagsupak. Busa, siya nagmalipayon sa dihang gipakanaog ang mga paghukom ni Jehova.

⁵ Kasiglohan sa ulahi, ang apostol Pablo nagsulat bahin sa iyang responsabilidad sa pagsangyaw. Siya mipahayag: “Ako hinlo gikan sa dugo sa tanang tawo, kay wala ako magpugong sa pagsulti kaninyo sa tanang gimbut-an sa Diyos.” Si Pablo misangyaw sa publiko ug sa kabalayan sanglit iyang giila nga ang kapakyasan sa pagbuhat sa ingon makapahimo niyang sad-an sa dugo atubangan sa Diyos.​—Buh. 20:20, 26, 27.

⁶ Nabatonan ba nato ang kasibot ni Ezequiel? Matukmod ba kita sa pagsangyaw sama kang Pablo? Dugang pang linibo ang mosanong sa mensahe sa Gingharian ug mopahayag: “Kami mouban kaninyong katawhan, kay kami nakadungog nga ang Diyos uban kaninyong katawhan.” (Zac. 8:23) Hinaot nga ang atong gugma sa Diyos ug sa atong isigkatawo mopalihok kanato nga dili moundang. Kita aduna ing sugo nga nabatonan aron mosangyaw!