Husto ba ang Imong Paggamit sa Pulong sa Diyos?
1 Si Jesu-Kristo mao ang labing bantogang magtutudlo nga sukad nabuhi sa yuta. Iyang gitandog ang mga kasingkasing sa katawhan, gidasig ang ilang mga emosyon, ug gipalihok sila sa maayong mga buhat. (Mat. 7:28, 29) Iyang gigamit kanunay ang Pulong sa Diyos ingong pasukaranan sa iyang pagpanudlo. (Luc. 24:44, 45) Si Jesus nagpahiluna ug ekselenteng panig-ingnan alang sa iyang mga sumusunod pinaagig hustong paggamit sa Pulong sa Diyos.—2 Tim. 2:15.
2 Ang apostol Pablo usab maoy talagsaong panig-ingnan sa epektibong paggamit sa Pulong sa Diyos. Nagbuhat pa siyag dugang kay sa pagbasa lamang sa Kasulatan ngadto sa uban; siya nagsaysay ug nangatarongan kon unsay iyang gibasa, nga nagpasundayag ug pamatuod gikan sa Pulong sa Diyos nga si Jesus mao ang Kristo. (Buh. 17:2-4) Sa susama, ang disipulong si Apolos “sinati kaayo sa mga Kasulatan,” ug iyang gigamit kini sa husto sa dihang nagpasundayag sa kamatuoran.—Buh. 18:24, 28.
3 Mahimong Magtutudlo sa Pulong sa Diyos: Ang modernong-adlaw nga mga magwawali sa Gingharian nakapahimulos ug maayong kalamposan sa pagtudlo sa katawhan pinaagig pagpunting ngadto sa ug pagpangatarongan gikan sa Bibliya. Sa usa ka kaso, usa ka igsoong lalaki nakahimo sa paggamit sa Ezequiel 18:4 ug nalangkit nga mga teksto sa pagpangatarongan ngadto sa usa ka pastor ug tulo sa iyang mga sakop maylabot sa dulnganan sa daotan ug sa matarong. Ingong resulta, pipila ka membro sa maong iglesya misugod sa pagtuon, ug usa kanila sa ulahi midawat sa kamatuoran. Sa laing kaso, usa ka sister gihangyo sa pagsaysay ngadto sa magsusupak nga bana sa usa ka interesado kon nganong ang mga Saksi ni Jehova dili magasaulog ug Pasko ug mga adlawng natawhan. Samtang iyang gibasa ang Kasulatanhong mga tubag nga deretso gikan sa librong Nangatarongan, ang tawo mipahayag sa iyang pag-uyon. Ang iyang asawa nalipay pag-ayo nga siya miingon: “Motambong kami sa inyong mga tigom.” Ug ang bana miuyon!
4 Gamita ang Tabang nga Mabatonan: Ang Atong Ministeryo sa Gingharian ug ang programa sa Tigom sa Pag-alagad nagatabang kanato diha sa paggamit sa Pulong sa Diyos. Daghang magmamantala ang nagpahayag ug apresasyon sa pagkalainlain sa mga presentasyon nga gipatik ug gipasundayag alang sa atong kaayohan. Ang Nangatarongan Gikan sa Kasulatan naundan sa daghang sugyot kon unsaon sa pagsaysay sa hustong paagi sa kapin sa 70 ka pangunang ulohan gikan sa Pulong sa Diyos. Ang Kahibalo nga Motultol sa Kinabuhing Walay Kataposan nagataganag laktod nga sumarya sa tanang pangunang pagtulon-an sa Bibliya nga kinahanglang masabtan sa mga bag-ohan. Ang mga tun-anang 24 ug 25 sa Giya sa Tunghaan sa Teokratikanhong Ministeryo nagapakita kanato kon sa unsang paagi ang batid nga mga magtutudlo tukmang makapaila, makabasa, ug makapadapat sa kasulatan. Angay natong gamitog maayo kining tanang tabang nga dali natong mabatonan.
5 Sa dihang atong gamiton sa tukma ang Pulong sa Diyos, atong makaplagan nga kini “buhi ug gamhanang nagalihok . . . ug arang makaila sa mga hunahuna ug mga tuyo sa kasingkasing” niadtong kinsa atong sangyawan. (Heb. 4:12) Ang kalamposan nga atong mapahimuslan tungod niana motukmod kanato sa pagsulti sa kamatuoran nga mas maisogon pa gayod!—Buh. 4:31.